Yela 105
105
Korowii ne o nɛra
1Hé jam Korowii
dɛ́ yerɛ o sɔn,
hé ɡel harɛre nɛra bwa
jemɛ waa waa ɛa.
2Hé ɡo yela kpɛɛro, dɛ́ bol
o nyokpowe-ɛɛla wa.
3Hé ɡel he sie lɛ o sɔn
waa do ɡoroŋ la ta,
nɛra haa dɛ tomɔ,
hé ɡel he sie lɛ.
4Hɛ́ɛ soŋe Korowii
dɛ́ na o kpeɡri,
dɛ́ɛ tomɔ saŋ bɛlbwa.
5Hé lii o nyokpowaa waa ɛa,
o wejena ne o waa
aa dɔ kasinteŋ la wa,
6he Abraham naanar,
haa ɛ Jekɔb bibaala waa le
heyaa tɛ o te la.
7Onee Korowii yaa dɛ tomɛ,
o bol harɛ nɔ ta nɛra
waa dɛɛ pa bole.
8Wɛɛ lii o fɔo la waa
saŋ bɛlbwaa,
o nyoa waa baɡɛ naanar
kaɡboŋa baa ka ba la bwa.
9Wɛɛ teŋɛ fɔo o ne
ya naa Abraham aa fɔwa,
ne nyoa waa baɡɛ
Aesek la taa.
10Korowii ne Jekɔb fɔwɛ fɔo,
o do le saŋ bɛlbwa dɛɛ la.
11O ŋɔ, “He ne he naanaree
mɛɛ ba Keenan harɛ
kpɔe tɛ,
ó ɛ he kapɛrɛ kon.”
12Gɛ saŋ dɛ Korowii nɛra
aa kanɛ,
dɛ ɛ hɔɔhra
do Keenan harɛ ta.#Mma 7:7
13Dɛ harɛre taa ba do
dɛɛ ɡaaɡe.
Ba le harɛ bɛl ta naa,
dɛ ba kaa bɛl ta.
14Kɛ Korowii ta ɡelɛ
nomɛlbwa fiɡ ba,
ba lɛɛ nomanta,
o kah koranar ŋɔ,#Mum 35:5
15“Nomɛlbwa bɛ nɔn
kpɔ leɡe
n bonɔɔna maa lee
ba cheɡ tɛ n te nɔ,
he bɛ n keamere nɔ
bini bɛlbwa ha.”
16Korowii ɡelɔ
lɔr chole harɛ la ta,
kondikwaa bwa chɔɡ.#Mum 41:54-57
17Kɛ dɛ o tɔ sie
ɡel ba yoɡ Josef,
Ijipt harɛ ta kɛ yom.
18Ba kpɔ bune jɔɡrɔre
do o nakpale ne o baŋa,
19ka tel kɛŋɔ waa waa bola
aa ɛa.
Korowii waa laanee baɡla
kɛŋɔ o waa la ɛ kasinteŋ.
20Belaa Ijipt kooro
waa dɛ di kora harɛre
nɛra nɛɛ la, ɡel ba ka
leo ba tɛo.
21O kpɔɔ chɔ harɛ la nyoa,
wɛɛ nyiŋi o kwaa bwa ta,
22dɛɛ di kpeɡri
o nomonjena bwa nɛ,
dɛɛ baɡle o nomonome
baa dɛ jao la wa.
23Ate, Jekɔb ne o bii ir dɛ kaa
Ijipt harɛ ta ka so
kɛŋɔ hɔɔhra ken.
24Korowii kpɔ ba ɛ o nɛra,
dɛ ɡel ba mun ya ɡwaa
ba dɔma.#Kaa 1:7-22
25O berɛ Ijipt harɛ tena liire,
dɛ ɡel ba hah o nɛra,
dɛ dɔ liichɔɡa tɛɛ ba.
26Belaa o tomɛ o bonɔɔna
Mosis ne Arɔn waa lee
ba tɛ o te la.
27Ba kaa ɛ nyokpowaa
ne wekpeɡa ba bini
Ijipt harɛ ta.#Kaa 7—12
28O ɡelɔ biro tenten ba tɔ
harɛ la bwa ta, kɛ Ijipt tena
ta o waa ta teŋɛ.
29O ɡelɔ ba neerare berɛ
chal a pɛŋa bwa serewe.#Kaa 7:20
30Sapone baa su
harɛ la ta bobɛlbwa,
hale koodem ne
ba chɔɔbɔra bwa.
31Korowii bol wa,
asɛ chwɛɛhne
ne konjeɡre ba su harɛ
la ta bwa,
32dɛ ɡel dombwea ber
ba bwaala,
asɛ bwaala kɔɡre
dɛɛ nyɛɡle.
33O chɔɡ ba daa kooni,
dɛ kuuɡi harɛ la daa bwa.
34O bol waa asɛ tontombɛ
ba su harɛ la ta bwa,
baa wola won kura.
35A di harɛ la ta
konlwɛɛ te bɛlbwa,
hale koo kondikwaa bwa.
36O kpoo Ijipt tena
bibanloɡla bwa,
dem bɛlbwa bibanloɡle
ta kae.
37Belaa Korowii tɔ
Israel tena sie le
Ijipt harɛ ta, ba cheɡɛ
suuɡapoŋa ne
suuɡaswɛm ba bwara
do kpeɡri.
38Ijipt tena la sie lɛo kɛŋɔ
Israel tena la aa dɛ kaa,
dɛkalkɛ dɛ ba dɛ ɔm ba.
39Korowii ɡelɔ bam bɛl
waa do jaŋne kaa nyundua
tɔ Israel tena sie,
dɛɛ baɡ ba ŋwɛnɛ,
asɛ nii waa tɛra kaa
nyundua
ɡe tɔ ba sie jwaana,
dɛɛ chaah ba ba vala bini.#Kaa 13:21
40Ba bɔɔro kondikwaa
baa di wa,
asɛ o tɛɛ ba chayambwibwi
ba chwe, dɛ le kondikwaa
ne nyundua
ba tɛɛ ba ba di vaɡre.#Kaa 16:13-14
41O ɡelɔ bwe bini pere,
asɛ nee le dɛɛ palɛ kɛŋɔ,
nenapale ken,
pua hɛŋle ɡbo harɛ ta.
42Korowii lii nyoa waa
baɡɛ o bonɔɔ Abraham,
o do ɡoroŋ la wa.
43Gɛɛ a do Korowii tɔ
o nɛra waa lee ba tɛ o te la
sie le Ijipt harɛ,
asɛ ba ɡo yela dɛ do
lɔŋɔre dɛɛ hɛɡre.
44O kpɔ nɛra bane harɛre
ne ba kooni tɛɛ ba a berɛ
ba kapɛrɛ kwa,
45ɡɛ aa ɛ ásɛ baa teŋɛ
o Mmarare, ne waa
waa do ba a ta la ta.
Hé kpɛɛ Korowii!
Currently Selected:
Yela 105: mzw
Highlight
Share
Copy
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
