Yela 107
107
Yela tɔn nuete
(Yela 107—150)
Korowii wer waa doa kpɛɛra
1Hé kpɔ jam tɛ Korowii,
dɛkalkɛ o waa wer,
o nyina waa dɛ nyin yaa
lole saŋ bɛlbwa dɛɛ la.
2He nɛra Korowii aa lɛ heyaa
la, hé bol
o kpɛɛra waa baɡle nɛra,
dɛkalkɛ o lɛ heyaa
le he dɔma nɔn ta,
3dɛ lawɛ heyaa le harɛfala
ta ba le wee leebɔr,
dɛ́ ba kaa wee cholibɔr
ne weekaŋle nyundua,
dɛ́ ba kaa
weekaŋle harɛbɔr.
4Bane nyoɡre pua hɛŋle ɡbo
harɛ ta bela,
ba ta bwɛɛ bɛlbwa nae
dɛ́ ka so o ta.
5Lɔr ne nyɔɡre kpo ba,
asɛ ba hwɛɡa bwa tonɛ.
6Asɛ ba wahala nae bini la,
ba wi no Korowii,
asɛ o lɛɛ ba le suna
baa dɛ di ta.
7O tɔ ba sie dɛ kpɔ ba pa sie
kaa bwɛjen baa ka so o ta.
8A chɛ kɛ bá kpɔ jam tɛ
Korowii,
o nyina aa wola jaɡa dɔe,
ne nyokpowaa waa ɛa
tɛɛ ba la wa,
9dɛkalkɛ o tɛ nɛra nyɔɡre
aa dɛ kpo ba nee ba nyɔ,
dɛ tɛ banɔ la lɔr aa dɛ kpo
ba ɡe kondikondɛɛɡa ba di.
10Dɛ ba bini bane soɡe
biro tenten ta, ba do ba
jɔɡrɔre dɛ laɡ ba do dea,
ba bwara ɛɛ nyɛɡ,
11dɛkalkɛ ba ɛ Nemenɛ
Korowii deŋnekpeɡ,
dɛ vɛh waa waa baɡ ba ta
teŋa.
12Anomanta, o do ba
dɛ ɡel ba ɛ tomkpeɡa
dɛ ba koh,
ba ta nomɛlbwa dɔe
o lɛɛ ba.
13Asɛ ba wahala nae bini la,
ba wi no Korowii,
asɛ o lɛɛ ba le suna
baa dɛ di ta.
14O laɡ ba le biro tenten ta
dɛ chaa jɔɡrɔre
baa kpɔa do ba.
15A chɛ kɛ bá kpɔ jam
tɛ Korowii,
o nyina aa wola jaɡa dɔe,
ne o nyokpowaa waa ɛa
tɛɛ ba la wa,
16dɛkalkɛ o kuuɡi ayaawa
ɡbeni, dɛ teŋni
bune baa kpɔa kaɡra.
17Deŋnekpeɡ we-ɛɛla ɡelɔ
ba bini bane ɡɛn,
ba wechɔɡa ɡel ba
bwara ɛɛ nyɛɡ,
18dɛ baa kondikwa
kwaraa nyin dɛ na,
dɛ so dɛɛ kpa seo.
19Asɛ ba wahala nae bini la,
ba wi no Korowii,
asɛ o lɛɛ ba le suna
baa dɛ di ta.
20O nyoa wobol chaah ba,
dɛ lɛɛ ba le seo ta.
21A chɛ kɛ bá kpɔ jam tɛ
Korowii,
o nyina aa wola jaɡa dɔe,
ne o nyokpowaa waa ɛa
tɛɛ ba la wa.
22A chɛ kɛ bá kpo kwaa
ba ɛ sarahare
dɛ́ jam Korowii,
dɛ́ kpɔ silɛɛ ɡo yela
baɡle waa waa ɛa.
23Bane kpɔ stiimaere dɛɛ
kpɔ mpo sie, dɛ kaa nyin
ba nyoa kondikwa.
24Ba na waa Korowii aa ɛa,
nyokpowaa waa ɛa
mpore ta.
25O nyoa wobol ɡelɔ
peukpeɡ ta, asɛ dɛ ir
mpo nehɛma kohona.
26Nehɛma la ɡɔɔ stiimaere
la kaa nyundua a ba
le vil bini, dɛ ɡel nɛra
baa lɔ a bini bambile teŋe.
27Ba valɔ dɛɛ yɛɛɡe
kɛŋɔ sennyɔdɛɛra ken,
ba ta hwɛɡa bɛlbwa dɔe.
28Asɛ ba wahala nae bini la,
ba wi no Korowii,
asɛ o lɛɛ ba le suna
baa dɛ di ta.
29O ɡelɔ peukpeɡ la nyoa sɔɔh,
asɛ nehɛma la ɡel lɔe.
30Nehɛma la nyoa
aa sɔɔhna la, ba sie lɛo,
asɛ o tɔ ba sie ba bela
baa dɛ nyin ba chuɡe.
31A chɛ kɛ bá kpɔ jam tɛ
Korowii,
o nyina aa wola jaɡa dɔe,
ne o nyokpowaa waa ɛa
tɛɛ ba la wa.
32A chɛ kɛ bá bol ɡɛ o sɔn
aa kana nɛnlaa baah,
dɛ́ kpɛɛro bela ba
nomonjena
aa chema o Dea.
33O ɡelɔ nenabɔɔne
hweeh pua hɛŋle ɡbo harɛ,
buli ɡe ɡel pala,
34dɛ ɡel harɛ waa wera berɛ
harɛ komɛlbwa aa
wola won do wer o ta,
nyubinikpeɡ tena
ba fa aa soɡe bela la wa.
35O ɡelɔ pua hɛŋle ɡbo harɛ
berɛ taama, asɛ nee ɛɛ palɛ
harɛ waa hola ta.
36O tɛ nɛra lɔr aa dɛ kpo ba
ŋwɛnɛ ba ba so bela,
asɛ ba ma bwɛjen
dɛ so o ta.
37Ba parɛ daa kooni,
asɛ a nɔnɛ kɛrɛdɛ ba chaa.
38O swee ba andɛɛɡa
ba dɔ bii kohona,
ba nae ɡe ya kohona.
39Korowii nɛra dɔma aa fiɡ
ba dɛ pɔ ba nɛɛ nomanta,
a ɡelɔ ba nyoa sɔɔh
baa di suna.
40Korowii siwi ta ba nɛra
baa dɛ fiɡ ba la sui,
a ɡel ba do pua hɛŋle
ɡbo harɛ ta,
bela ŋwɛnɛre aa wola
toole dɛɛ ɡaaɡe.
41Kɛ o lawɛ nɛŋɡwɛɡra
le ba wenaale ta,
dɛ ɡel ba bii warɛ
kɛŋɔ peera ken.
42Nɛra ba wa aa toɡra
nao ba sie lɛ,
kɛ nyubinikpeɡ tena te,
ba helɔ.
43Nɛra baa jemɛ waa la,
bá kpɔ ɡɛ waa nɔ
do ba liire bini,
dɛ́ lii Korowii nyina
aa wola
jaɡa dɔe la wa.
Currently Selected:
Yela 107: mzw
Highlight
Share
Copy
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
