Neehum 2
2
Bwɛjen Niniwe chɔɡa wa
1Niniwe#2:1 Asiiria bwɛjenii Niniwe. tena, nomɛl dɛ ba ba yo heya.
Hé daah he dekpeɡ la!
Hé ta sie ŋwɛnɛ ta!
Hé che kiŋkiŋ,
dɛ́ kpɔ he te ka yo!
2Korowii berɔ dɛɛ ba
Jekɔb jirima kpɔe tɛo,
kɛŋɔ waa kpɔ Israel tena
jirima tɛɛ ba la.
A lole kɛŋɔ nɛnchɔɡa
chɔɡ ba bwa,
harɛ la chɔ pɛɛ,
dɛ chɔɡ ɡrepo daa baa kpɔ
a nɔna dɛɛ ɛ sen bwa.
3Kwaa Niniwe dɔma
aa kpɔa dɛɛ tɔ
ba te ɡbemɡbe laa ta
la swɛɛrɔ,
laala baa doa ɡe swɛɛ.
Torɔɡore baa vɔwa pɛl
jaɡre nɛɛ
dɛɛ la laa bune dɛ nyɛɡle,
awola baa kpɔ ba te
dɛɛ kaa laa la.
Ba ir ba lampeare nyundua
dɛɛ aah ba.
4Laa tena kpɔ torɔɡore
baa vɔwa pɛl jaɡre
dɛɛ che a bini la
chwa jo fɔɡbaahna,
dɛ la dɛɛ ba fɔɡbaah bɛlbwa ta.
Ba do kɛ baa choŋi
kapɛle ken,
dɛ teŋe wɔrɔbe nɛɛ baa kaa,
kɛŋɔ bwaala aa dɛ nyɛɡle
ken.
5Niniwe laa nomoa le
o laa tena baa kpeɡa,
kɛ ba lɔ nakpale ŋwɛnɛ ta
dɛɛ ba.
Ba chwao dɛ ka marɛ
bwɛjen la danjwɛ,
dɛ kpɔ kon tɔ ba te ɡbemɡbe.
6Gbeni baa kpɔa tɔ
nee la nyoa la pilo,
asɛ koodem la bwa kuuɡi.
7A chɛ kɛ Niniwe chɔ pɛɛ,
ásɛ ba lawɛ o nɛra
laa ta kaa.
O toli ɛɛ wiu kɛŋɔ kwehre
ken, dɛɛ lɔ ba bambile
á baɡle kɛ ba dɛ di suna.
8Nɛra le Niniwe dɛɛ kaa
kɛŋɔ nee aa pala le tam ta
ken.
Ba bala dɛ yer ba ŋɔ,
“Hé ɡel! Hé ɡel!”
Kɛ nomɛlbwa aa habɔɔ
berɛ.
9Hé pa ba suuɡapoŋa
ne ba suuɡaswɛm
kɛŋɔ laa ta kwa.
Kondɔɔh su bwɛɛ la bwa,
a ta nyoa dɔe.
10Niniwe bwa chɔɡɔ,
ba pa o kwaa bwa kwaraa,
o chɔ pɛɛ.
Ɔmee su o nɛra bwa,
ba natuune sɔɔh,
ba bwara ɛɛ sa,
ba siebɔra ɡwaŋre.
11Bɔkwa waa pu bwɛɛ o fa
aa do kɛŋɔ nyujentena sobɔr
laɔ?
Niniwe tena fa aa lɔ
ba bwɛɛ kɛŋɔ nyujente
ombal ne onnee,
dɛ so bela dɛɛ dɛ́ɛ a bii,
a ne a biirii ba dɛɛ ka,
aa wola komɛlbwa ɔmɛ.
12Ba do kɛŋɔ nyujente
aa kpo ol, dɛ peeɡe o bini
tɛ o haah ne bii,
dɛ che ol la su o bɔɔ bini.
13Koranar Bwa Kooro ŋɔ,
“N cheɡɛ he nɛ.
Mɛɛ fuh torɔɡore haa vɔwa
pɛl jaɡre laanee.
Baa kpoo he laa tena
laa taa,
dɛ́ pa laala haa paa
le bane be la.
Baa he toroma taa no
kpa bwa.”
Currently Selected:
Neehum 2: mzw
Highlight
Copy
Compare
Share
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
