Neehum 1
1
1Waa aa chiɡ bwɛjen Niniwe, Korowii bol baɡle Neehum waa le Ɛlkɔs chaahna ta, asɛ o chwerɛ bil laanee nɔ.
Korowii baah di Niniwe tena nɛ
2Korowii dɛ mee,
dɛ ɡel o dɔma wechɔɡa
ɛɛ ɡure ba nɛ.
O baah dɛ di ba nɛɛ wɛɛ
bɔ ba kem bwaawee ne,
dɛɛ tɛr banɔ la
baa haoh deŋne.
O teŋɔ kpɔ o bandia
dɛɛ ta o dɔma nɛ.#Kaa 20:5
3Korowii baah
aa di warawara,
o dɔ kpeɡri kohona.
Waa wechɔɡ-ɛɛ bɛlbwaa
ɡel dɛ o ta o deŋne tɛrɛ.
Bobɛlbwa Korowii
aa dɛ valɛ la,
belaa kawulewule
ne dompeu ɛɛ ta,
asɛ baama ɛ
o nakpale tutuɡ.
4O dɛ bol wa mpo hweeh,
dɛ́ ɡel neerare bwa hweeh.
Basan harɛdɛɛɡe ne
Kaamɛl Bwejen bwa dɛ hol,
asɛ Lɛbanɔn daa fee bwa
ɡe ɛɛ serewe.
5Bwejena dɛ jiɡri o sie,
deŋɡarere ɛɛ mwɛɛ.
Korowii leɔ dɛɛ ba naa,
harɛ bwa ne nɛra
baa lɔ o ta bwa dɛ chel.
6O baah diu waa, umee
dɛ́ won che a nyoa ɔ?
Umee dɛ́ won ba o sie
o bandichɔɡe ta nɔ?
O baah diu kohona naa,
a do kɛŋɔ baa fuɡe
nii ta ken,
bwea bwa dɛ peɡri
burbur ken o sie.
7Korowii wer,
o kpɔ nɔn dɛɛ tɔ o nɛra nɛɛ
ba wenaale tɔpere,
dɛɛ nyiŋi nɛra
baa dɛ yaradao nɛ.#Jɔn 10:7
8Kɛ Niniwe te, wɛɛ chɔɡoo
kɛŋɔ nee waa sua
dɛɛ chɔɡ kwa,
ásɛ dɛ doŋi o dɔma ta
biro ta.
9Korowii vɔrɔwa bɛlbwa dɔma
aa vɔrɔwa la,
wɛɛ chɔɡ a bwaa,
wekpeɡa bɛlbwa aa berɛ
ba nɛɛtena kpa.
10He sennyɔɔra,
nii ɛɛ fuh heyaa kɛŋɔ sɔɔhne
aa kaɡre dawii baah ken.
11Niniwe, he taa nɛnchɔɡe le
dɛɛ vɔrɔwe Korowii vɔrɔwa,
dɛɛ baɡle nɛra
wechɔɡa ŋwɛnɛre.
12Anomanta, kenii Korowii ɛɛ bol o nɛra Juda tena be,
“A lole kɛŋɔ Asiiria tena
kpeɡri, dɛ warɛ dɛ dɔ nɛra
bá ba cha ba,
kɛ mɛɛ chɔɡ baa le harɛ
nɔ ta bá he kwaraa.
Juda tena, menee ɡela
he fa na wahala,
kɛ maa berɛ ɡel
he na ɡɛ kpa.
13Mɛɛ teŋe kpeɡri Asiiria
tena aa dɛ di he nɛɛ la taa,
dɛ́ chaa jɔɡrɔre
aa vɔrɔwe heyaa la.”
14Kenii Korowii bol
he Asiiria tena waa bil,
“Haa naanaree dɔ
dɛ́ kpɔ he sɔna pa ba.
Mɛɛ chɔɡ voɡa haa sɛah
daa nee, dɛ anɔ la haa loɡa
a do he voɡa deene bini la.
Mɛɛ kwi he lalbɔɔ bil,
dɛkalkɛ he waa ta tɔnɔ
bɛlbwa dɔe.”
15Hé ha sie nyiŋi bwejena dor!
Nɛn waa kpoŋe
amanesoma dɛ valɛ bela,
dɛɛ bol deŋnesɔɔhna wa.#Aes 52:7
Juda tena,
hé di he tɔpejena la,
dɛ́ kpɔ kwaa haa baɡɛ
Korowii nyoa la ba tɛo.
Nyubinikpeɡ tena aa
heyaa ba yo he harɛ ta
kpa.
Mɛɛ chɔɡ ba bwaa kwaraa.
Currently Selected:
Neehum 1: mzw
Highlight
Copy
Compare
Share
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
