Neehum 3
3
Niniwe tena bwɛɛlɛ
1Bwɛjen nɛŋkpoa ne
nyosonteŋna aa su
o ta la tena bwɛɛlɛ.
Kondɔɔh su he bwa,
he dɔma ɛɛ ba a pae kaa.
2Hɛɛ no chweremi
baa dɛ cha jaɡre,
ne a torɔɡore baa vɔrɔwa
pɛla nakpale sii,
ne chwae jaɡre
aa dɛ chwa kohona,
dɛ kwaa baa vɔwa pɛl jaɡre
la jaeh aa dɛ jah sii.
3Laa tena soɡe jaɡre ta
dɛɛ chwa dɛ́ ka yo,
dɛɛ beɡre kerele fal fal,
lampeare ɛɛ nyɛɡle
al-al ken.
Nɛra serewɔ pirim,
lala daŋɛ chɔ
ba ta nyoa dɔe,
nɛra ɛɛ laala.
4A bwa cheɡɛ Niniwe tena
baa do kɛ hanjwamane
la pɛlchɔɡa ta.
Ba cheɡɛ voɡra nɛɛ dɛ ɡel
nɛra pɛla do ba nɛ.
Ba kpɔ jwamane ŋwɛnɛ ta dɛ
lawɛ harɛre nɛra kɛrɛdɛ
yoma, ne sɔm ŋwɛnɛ ta,
dɛ lawɛ nɛra bane ɡe.
5Koranar Bwa Kooro ŋɔ,
“Niniwe, n cheɡɛ he nɛ.
Mɛɛ laa he yalee kpɔ
he mun ta,
dɛ́ ɡel harɛre nɛra bwa nae,
ásɛ sihiih kpoe ba siwi ta.
6Mɛɛ kpɔ doŋaa ta he nɛ,
n siwi aa hen su,
dɛ́ ɡel nɛra bwa
kpɔ sie pa he nɛ.
7Nomɛlbwa waa nae
la ɛɛ le habɔɔ dɛ́ ŋɔ,
‘Niniwe chɔɡɔ kwaraa.
Umee dɛ́ wi tɛo wɔ?
Leperaa ń dɔ nɛn
ó larawe o bwara ɔ?’ ”
8He ɡwaa bwɛjen Tebes
waa chɔ Nael Moo nyoa
nee bar o bwa la kɛɛ?
Nee laanee tɔɔ ɡbemɡbe,
dɛ do kɛŋɔ danjwɛ.
9Onee dɛɛ nyiŋi Itiopia
ne Ijipt harɛre ta,
o kpeɡri ta nyoa dɔe,
Put ne Lebya harɛre nɛra
bwa ɡe jao dɛɛ chao.
10Kɛ ba wono ba yo he nɛra,
dɛ laɡ ba kaa harɛfale bɛl ta.
Ba lawɛ bechale dɛ kpɔ
ba cha harɛ ba bini toɡri
chɔ fɔɡbaahna.
Ba lawɛ nomonjena
dɛ bil daa ba nyuune ta,
dɛ kpɔ jɔɡrɔre do sitɔɔla.
11Gɛɛ he Niniwe tena ɡe ɛɛ
ba dɛɛra dɛ́ chwa ka sɔh,
dɛ́ nyin bɔr ka marɛ
he dɔma bɛ heyaa na.
12Dekpeɡa aa tɔ heyaa
ɡbemɡbe la bwa do kɛŋɔ
fiɡ daa aa nɔnɛ
a nɔnloɡla,
dɛ ba yiiɡi daa la aa,
o nɔna yon ba lee naate
waa dia la nyoa bini.
13He laa tena bwa
berɛ haahna.
He bwɛjena doonyoo pilo
paɡri nɛɛ tɛ he dɔma,
a doonyoo ɡbeni bwa fuoh.
14Hé dɔ nee cheɡ kohona,
tɔe baa dɛ ba ba tɔ heyaa
do la wa.
Hé nyiŋi he dekpeɡa ta
a do kpeɡri.
Hé ɡbɛr teera dɛ́ saa a lawɛ,
dɛ́ kpɔ he te
dɛ́ teŋe berekese.
15Belaa nii ɛɛ ba heyaa fuih,
ba kpoo heyaa laa ta,
dɛ́ he heyaa kɛŋɔ tontombɛ
yon di kwaa la.
Hé ɡel he nɛra warɛ
kɛ hɔɔhre, kɛɛ tontombɛ.
16He ɡelɔ he bonadiire warɛ
dɛ ɡwaa weweela.
Kɛ ba do kɛŋɔ tontombɛ ken,
dɛ́ chɔɡ harɛ kwaa bwa
kwaraa dɛ́ ir kaa.
17Nɛra baa dɛ daah heya,
ne nɛra baa dɛ ɛ toma
koodem bela la,
ba do kɛŋɔ tontombɛ
aa wura ba maɡre
danjwɛɛre ta waa saŋ,
dɛ wee baa le aa,
a yon ir kaa la,
nomɛlbwa aa wola bela
aa ira kaa jemɛ.
18Asiiria koojen, nɛra baa dɛ
nyiŋi he harɛ ta kɛ peteɡra
la bwa chɔɔɡɔ.
He nomonjena bwa serewɔ.
He nɛra la bwa peɡrɔ
dɛ do bwea dor,
nomɛlbwa toole
dɛ́ boa ba nyoa.
19Komɛlbwa aa won ɡel
he ŋwɛra tonɛ,
bola baa do heyaa la
ɛɛ kpoo heyaa.
Nomɛlbwa waa no he waa sie
ɛɛ lɛo dɛ́ lɔ kpaŋa ta
he nɛɛ a wa.
Umee wola he nyubinikpeɡ
haa ɛa aa wola nyoa dɔe
la nyoŋwaara nae ba nɔ?
Currently Selected:
Neehum 3: mzw
Highlight
Copy
Compare
Share
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
