Aesaya 47
47
Babelɔn paɡra wa
1Korowii ŋɔ,
“Babelɔn, bwɛjen baa
wola yoi dɛ pɔ he nɛ,
he do kɛŋɔ bitolo
waa wola baa jemɛ.
Tu he kookara ta,
dɛ́ ba so harɛ.
Taraken baa hen ɡbɛɡbɛ kpa,
he berɛ yom.
2Ka namɛ men nam ta,
laa kon haa kpɔa bɔle
sie la kpɔ,
dɛ́ laa yal ɡbaa he hwie ta,
dɛ́ jo neerare le a baŋ.
3Nɛra ɛɛ nae kɛŋɔ he cheɡɛ
mumɡbal,
baa na sihiih haa dia.
Mɛɛ bɔe he wechɔɡa kemee,
maa nomɛlbwa nɛɛ sune.”
4Ya Lɛɛ, Israel Nɛŋɡoroŋ,
Koranar Bwa Kooro
yaa dɛ tomɔ la.
5Korowii ŋɔ, “Babelɔn
haa do kɛŋɔ bitolo,
so harɛ biro ta jeiih ken.
Baa hen harɛ nɔ ta bwa
bwɛɛre
haŋkooroo yerɛ kpa!
6N baah fa di
n nɛra Israel tena nɛ,
n tɛr ba deŋne kɛŋɔ
n nɛra laa ban ken,
dɛ kpɔ ba do hen Babelɔn
nɔn ta.
He ta ba nɛɛ sune,
hale banɔ la baa hwɛɛhra
kwaraa la,
he do ba hɔhɔrɔwa.
7He fa ŋɔ hɛɛ teŋɔɔ dɛ ɛ
haŋkooro saŋ bɛlbwa
dɛɛ la,
anomanta, he ta ɡɛ we-ɛɛla
nɔ kpɔe do he liire bini,
a ba ɛ kɛŋɔ hɛɛ lii ɡɛ aa
dɛ ba he chiɡa.
8No, he dɛ di he bwara,
dɛɛ lii kɛŋɔ wobɛlbwa toole
dɛ́ won ɛɛ.
He ŋɔ he ne Korowii kɛrɛdɛ,
dɛ ŋɔ, nomɛlbwa toole
he habɔɔ.
He ta liire kɛŋɔ hɛɛ ɛ
luhaahnee bwa,
haa biseo ɡee di.
9Gɛ webele anɛ nɔ ɛɛ piɡri
tɔpebeŋkpoŋii.
Ane he kaberere bwa,
hɛɛ di bisewee,
he jaa sewɛ.
10He kpɔ he te dawɛ
he wechɔɡa ɛɛ ta, dɛ ŋɔ,
‘Nomɛlbwa aa men na.’
He wejema ne he liire wili
dɛ ɡel he ŋɔ, ‘Menee men.
Nomɛlbwa toole
n habɔɔ kpa.’
11Wekpeɡa ɛɛ pui,
he bebee waa bwa
aa won sɔɔh a nyoa.
Siswɛm waa ɛɛ pui,
waa haa wola a waa deere
bwa piɡri.
12Anomanta, ir nyu ne,
dɛ́ do sie he kaberere ne he
dobodobo we-ɛɛla aa wara
he le a ne bechale saŋ,
dɛɛ ɛa la.
A ken ɛɛ won ɛ waane,
he ken ɛɛ won kpɔ
aah he dɔma.
13Jae bwa haa dɔa habɔɔ,
he ta kpeɡri bɛlbwa dɔe.
Gel wejerema baa jemɛ
weweela wa,
dɛɛ baɡle waa aa dɛ ba
chiɡa korobie bɛlbwa ta,
ir ba lɛɛ le waa
aa dɛ ba he pui la ta.
14Na, ba do kɛŋɔ kpɔɡhole,
nii ɛɛ fuuh baa.
Hale baa won lɛ ba te
le ninlao la ta kwara.
Gɛ nii la ta doe kɛŋɔ
nii haa won la a jwɛɛh
ka ŋwee.
15Waa nɛra haa le he bechale
saŋ dɛɛ la ba be baa jae
la aa dɛ ba ɡela he na
laanee.
Bɛlbwa ɛɛ nyin bɔree
dɛ́ chwa kaa,
bɛlbwa aa lee do, dɛ́ lɛɛ.”
Currently Selected:
Aesaya 47: mzw
Highlight
Share
Compare
Copy
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
