Aesaya 48
48
Israel tena deŋnekpeɡ wa
1Korowii ŋɔ,
“Hé no, Jekɔb naanar
baa bera dɛɛ yerɛ
heyaa Israel tena
he le Juda dea,
he dɛ ŋwɛɛ men Korowii
sɔn, dɛɛ ɛ kɛŋɔ
he dɛ tomɛ Korowii
Israel tena aa dɛ tomɔ la,
kɛ haa waa haa dɛ bol la ɛ.
2He dɛ́ maŋkura he te ŋɔ
he le bwɛjen Jerusalam,
dɛ ŋɔ he kpɔ he te dawɛ
men Koranar Bwa Kooro,
Israel tena
aa dɛ tom mɛ la nɛ.
3Fini laa n le dɛ bol waa aa ɛa.
N bola biɡri asɛ he jemɛ,
buɡ la taa n den ɡel a ɛ.
4Dɛ n jemɔ kɛŋɔ he deŋne
kpeɡri kɛŋɔ buni,
he lwɛɛma do kpeɡri
kɛŋɔ bwe.
5A waa ɡela n bol waa aa
dɛ ba bala kerekere la,
dɛ bol waa aa dɛ ba chiɡa
mɔɔ á chiɡ,
ásɛ he bɛ ba ŋɔ he voɡaa ɡela
a chiɡ.
6He no waa n fa aa bola
baɡle heyaa asɛ a ɛ ɡɛ.
A chɛ kɛŋɔ hé sɛh
kɛŋɔ a ɛ kpela.
Le fini dɛɛ kaa mɛɛ bol wefala
aa sɔah maa wola
he be bolɛ la he bee.
7Tarakenii mɛɛ ba ɡela a chiɡ.
Waa aa do ɡɛ ta chiɡe bwa.
Ane chiɡo ka aa, he fe ŋɔ
he jemɛ a wa.
8N jemɔ kɛŋɔ he waa ta
kasinteŋ dɔe,
he ɛ nɛra bane baa jema kɛ
ɡaeh tenaa heya.
A waa haa wola waa nɔ
bwa no la.
9N sɔn ne kpɛɛra waa mɛɛ
lawɛ bambile he nɛ,
ásɛ dɛ bɛ heyaa ba chɔɡ.#Mal 3:6-7
10N do heyaa weweele ta,
dɛ daah heyaa na,
kɛŋɔ ba yon do suuɡapoŋ
nii ta dɛ mwɛɛlo la.
Kɛ n nao kɛŋɔ haa siwi su.
11N ɡbaɡba waa n ɛa ɡɛ.
Maa ɡel n sɔn chɔɡ,
maa ɡel he kpɔ jirima
aa chɛ mɛ la tɛ nomɛl.”
Israel tena dɔ ba te le Babelɔn lɔɡa
12Korowii berɔ ŋɔ, “Hé no n be,
Israel tena maa yerɛ heya.
Menee Korowii,
menee komɛlbwa sitɔɔ,
ne muŋkaa.
13N ɡbaɡbaa kpɔ nɔn pa harɛ
mun, dɛ kpɔ n nɔndiɡ
baŋre nyundua.#Hib 1:10
N yera aa, a dɛ ba n be.
14Hé bwa ba cheme dɛ́ no.
Voɡa la bini umee wona
baɡle anɔ nɔɔ?
Nɛn maa leo la ɛɛ yo Babelɔn
tenaa. Wɛɛ ɛ waa
maa dɛ nyin kɛ o ɛ bwaa.
15Menee pili nyoa dɛ yerɔ,
menee leo dɛ ɡel o won
ɛ o toma bwa ka tonɛ.
16Hé suuh tel n be,
dɛ́ ba no waa nɔ.
Le waa nɔ mumpar bwa n ta
wobɛlbwa bolɛ a sɔh heya,
n wobɛlbwa maa bol la,
a dɛ ɛ kpela.”
Nemenɛ Korowii cheɡɛ o
Doma ta, dɛ tom mɛ.
17Waa Korowii, waa ɛ he Lɛɛ,
Israel Nɛŋɡoroŋ
la aa dɛ bolee nɔ,
“Menee Korowii
haa dɛ tom mɛ la,
menee dɛɛ chaɡle heyaa
anɔ la aa wera tɛ heya,
dɛ berɛ dɛɛ chaɡle heyaa
ŋwɛnɛ aa chɛ kɛŋɔ
hé kpɔ o ta.
18Dɛ he fe cheɡ deŋne
n waa ta naa,
he fe dɔ deŋnesɔɔhna
kɛrɛdɛ,
kɛŋɔ nenabɔɔ waa wola
hweeh bwa,
dɛ́ dɔ kpeɡri kohona kɛŋɔ
mpo nehɛma ken,
dɛ́ won wobɛlbwa ɛɛ á toɡre.
19He naanar fe ɛɛ warɔ kɛŋɔ
mpo nyoa hɛŋle ken.
N fe nyiŋ ba kɛrɛdɛ ba dɔma
bɛ won chɔɡ ba,
ásɛ ba sɔn bɛ he.”
20Hé le Babelɔn harɛ ta,
hé chwa le o nɛra bini!
Hé kpɔ silɛɛ taa bol
bobɛlbwa ŋɔ,
“Korowii lɛ o bonɔɔna
Israel tena.”#Sek 2:6
21Waa kpɔ ba kpɔ pua hɛŋle
ɡbo harɛ ta la,
nyɔɡre ta ban kpoe.
O ɡelɔ nee bule le bwe ta
tɛɛ ba.
O pere bwe nee palɛ le o
ta.#Kaa 17:6; Kur 20:11
22Korowii ŋɔ, “Bosɔɔhna toole
dɛ tɛ wechɔɡ-ɛɛra.”
Currently Selected:
Aesaya 48: mzw
Highlight
Share
Compare
Copy
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
