Aesaya 46
46
Babelɔn voɡa wa
1Korowii ŋɔ,
“Babelɔn tena voɡa Bel
ne Nɛbo
baa dɛ toma la di sihiih,
ba paa dawɛ keeɡore ta
a ɛ bontɔɡa a chea dɛɛ koh.#Jer 51:44
2Voɡa la ta wone lɛ a te,
ba dɔma cheɡɛ a bwa kaa.
3Israel tena haa kaa la bwa,
hé no n be.
Menee nyiŋi he nɛɛ le
ɡɛ saŋ baa lolɛ bwa.
4Menee dɛɛ ba he nɛɛ nyiŋa,
dɛ́ ka tel he hwɛɛhra saŋ
he nyumpona aa to.
Menee ta heya,
mɛɛ chwaa heyaa,
dɛ́ kpoŋe heya, dɛ́ lɛ heya.
5Umee hɛɛ ba men kpɔe
maɡɔɔ?
Umee do kɛ men ɔ?
6Bane fuɡe suuɡaswɛm ne
suuɡapoŋa le pure bini,
dɛ kpɔa dawɛ kon baa kpɔa
dɛɛ kari kwaa ta.
Ba kpɔa tɛ nɛn waa dɔ
suuɡaswɛm kpɔe dɛ ɛ
kwaa wejema
o kpɔ kwaa voɡ,
asɛ ba ɡuŋi dɛɛ tomɔ.
7Ba ɡɔɔro dɛ chwaa,
dɛ choɡo cheɡ o chebɔr aa,
dɛ o cheɡɔ,
waa won tu nakpala.
Ba yerɔ waa won sɛh.
Waa won lɛɛ ba
le ba wahala ɡe ta.
8Wechɔɡ-ɛɛra, hé lii waa nɔ,
dɛ́ ɡel a ka he nyu bini.
Hé ɡel he siwi swɛɛ a ta.
9Hé lii waa aa chiɡa saŋ la.
N ɡboo Korowii,
n dɔŋ toole.
10N bol waa aa dɛ ba
chiɡa mɔɔ a ba,
saŋ la bwaa n le baɡle
anɔ la a taa dɛ ba bala.
N ŋɔ waa maa maɡla bil bwa
ɛɛ ɛo, mɛɛ ɛ anɔ la bwa
n tea aa tooraa.
11Mɛɛ yerɛ nomɛlee le
bojaŋ harɛ wee leebɔr,
ásɛ o ba tawɛ harɛ nɔ ta
nɛra
baah ta kɛŋɔ kela ken,
dɛ́ ba tonɛ anɔ la maa
maɡla bil bwa.
Waa maa bola la,
anee dɛɛ ba ɛɛ.#Kur 23:19
12Hé no n be, deŋnekpeɡ tena,
he ne waa aa toɡra baah
jaŋne.
13N dɛ ba n waa aa toɡra ne.
A toole bojaŋ,
aa biɡri kwaraa.
Mɛɛ lɛ Jerusalam tenaa,
dɛ́ ɡel ba dɔ n jirima.”
Currently Selected:
Aesaya 46: mzw
Highlight
Share
Compare
Copy
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
