Aesaya 14
14
Israel tena bojaŋ harɛfale ta lee ba wa
1Korowii ɛɛ dɔ tedomaa tɛ Israel tena,
wɛɛ berɔ lee ba tɛ o te ja,
dɛ́ kpɔ ba ba so ba ɡbaɡba
harɛ ta.
Hɔɔhra ɛɛ ba ja ba nɛɛ
ba ne ba pɛ so.
2Harɛre nɛra ɛɛ cha baa dɛ
kpɔ ba ba,
ba ɡbaɡba harɛ ta.
Ásɛ Israel tena berɛ kpɔ
harɛre
la nɛra berɛ ba yoma
Korowii harɛ
waa kpɔa tɛ Israel tena
la ta.
Nɛra Israel tena fa aa lɔ ba
lɔɡa la berɛ ba do ba lɔɡa,
ásɛ dɛ baa tom ba.
3Awola tɔpere Korowii aa tɛ heyaa ona le weweele ne hɔhɔrɔwa dɛ dochɔɡa he fa aa lɔ a ta la, 4hɛɛ kpɔ yelee sɛɡle Babelɔn kooro dɛ ŋɔ,
“Hé na ɡɛ nyubinikpeɡ te la
aa bera sɔɔh!
Hé na ɡɛ o bandia
aa ba a jaɡa!
5Korowii kuuɡi wechɔɡ-ɛɛra
daŋɡbale,
o ɡelɔ koranar kpeɡri sɔɔh.
6Banee kpɔ bwaawee dɛ do
nɛra ba ta
ba lɔɔra ɡelɛ bwa,
harɛre nɛra baa pɔ ba nɛɛ la,
ba ta ba fiiɡa ɡelɛ bwa.
7Harɛ bwa dɔ deŋnesɔɔhna,
nomɛlbwa ɛɛ ɡo yela
silɛɛ ne.
8Lɛbanɔn harɛ peleme daa,
ne anɔ la aa jaa kwaraa
sie lɛ wechɔɡ-ɛɛ
la kora la ɡui
wa, dɛɛ ŋɔ,
‘Taraken baa ba he ne harɛ nɔ,
nomɛlbwa toole
dɛ́ teŋe yaa kpa.’
9Lala kpɔ ba te ba sie beɡre
baa kpa Babelɔn kooro bala.
A ɡelɔ nɛra ba fa aa dɛ di
kpeɡri harɛ nɔ ta
dɛ sewɛ la ir dɛɛ jaamo.
Nomonome ba fa aa
dɛ di kpeɡri harɛre ta
ir ba kookane ta dɛɛ kpao.
10Ba bwa ɛɛ ŋɔ o bee ŋɔ,
‘He ɡe sɔɔhnɔ ɡɛ
yaa doa nɔ,
ya bwa kɛrɛdɛ!
11He jenu bwa tonɛ lalabwɛ,
janjela baa lɔa dɛɛ duuri
bwa chiɡo.
Dudulee he kalaŋ,
dɛ tɔe yal.’
12Babelɔn kooro, na ɡɛ haa le
nyundua ba le harɛ.
Chɔmbibi wewee,
chɔmbibi bonɔɔ!
Ba taɡɛ ta harɛ,
nɛn he fa aa pɔ harɛre nɛ!#2Te 2:3-4, 8
13He fa liiro ŋɔ,
‘Mɛɛ teehnoo kaa nyundua.
Korowii weweela baŋ lee mɛɛ
ba n kookara kpɔe ka cheɡ,
dɛ́ so kɛŋɔ kooro weekaŋle
nyunduabɔr bwejen la ta,
bela kwaa aa bea baa wola
an na aa dɛ cheme la.
14Mɛɛ teehnoo ka so baama baŋ,
dɛ́ ɛ n te kɛŋɔ
Nemenɛ Korowii ken.’
15Kɛ ane a bwa,
Korowii ba he ne harɛ,
dɛ kpɔe kaa lala huɡribɔr
bɔɔ bini.
16Banɔ la baa nae la ɛɛ nyiŋii
jeiih ken, dɛɛ lii ŋɔ,
‘Baa la waa ɡela harɛ jiɡri
dɛ ɡel koranar chel laanee
nɔ kɛɛ?
17Onee chɔɡ bwɛjena dɛ ɡel
bela bwa berɛ
pua hɛŋle ɡbo harɛ,
waa wola nɛra baa laɡ ba laa
ta kpɔe ta la aa?’
18Koranar baa serewa la
bɛlbwa chɔ
o ɡbaɡba lalbɔɔ bini,
ba ɛ ba ŋwama la a do wer.
19Kɛ he te, ba kpɔe viɡri
kɛŋɔ baa teŋe daa ta ken,
ba ta hen huɡe.
Nɛra baa ka laa ta
la lalaa tɔ he nɛ,
ba kpɔ he ne ba bwa ta
bwebɔɔ bini dɛ tiɡri he nɛ.
20Ba ta hen huɡe kɛŋɔ baa
huɡe he bala koranar la,
dɛkalkɛŋɔ, he chɔɡ he harɛ,
he kpoo he nɛra.
Baa wechɔɡ-ɛɛra naanar
sɔnee yerɛ kpa bwa.
21Kwaa bɔr dɛ́ kpoo o naanar
ba naawa chɔɡre
baa ɛa la wa,
ásɛ ba bɛ ir
dɛ́ ba lɛ harɛ nɔ dɔɔh,
dɛ́ ma bwɛjena o ta bwa.”
22Koranar Bwa Kooro ŋɔ,
“Mɛɛ ka che bwɛjen
Babelɔn ne o nɛra nɛɛ
dɛ́ kpoo ba
maa komɛlbwaa ɡel,
bechale ɡba aa ka, o sɔn he.#Jer 51:49-50, 62
Men Korowiirii ŋɔa.
23Mɛɛ ɡeloo bela berɛ kataŋa
ne kwiure dobɔr,
dɛ́ ɡbaa bela bwa ó chɔɡ.
Men Koranar Bwa Kooroo bola.”
Korowii bol Asiiria tena chɔɡa wa
24Koranar Bwa Kooro ŋwɛɛrɔ ŋɔ,
“Waa maa vɔrɔwa la,
anee dɛɛ ba ɛɛ,
anɔ la aa dawɛ n sie la ɡee
mɛɛ ba ɛɛ.
25Mɛɛ chɔɡ Asiiria tenaa le n
harɛ ta,
mɛɛ tiɡri ba nɛɛ Israel harɛ
bwejena ta,
dɛ́ lawɛ n nɛra le Asiiria tena
kpeɡri baa dɛ di ba nɛ,
kɛŋɔ baa kpɔ daa dawɛ nae anɛ
baŋa ta a pɛ dɛɛ ɛ toma la.
26Waa nɔɔ n vɔrɔwe bil dɛɛ ba
ɛɛ harɛ ta bobɛlbwa.
N ir nɔn dɛ́ tɛr harɛre nɛra deŋne.”
27Waa Koranar Bwa Kooro
aa vɔrɔwa nɔ,
umee dɛ́ won bera ɔ?
O ir nɔn dɛ́ tɛr nɛra deŋne,
umee dɛ won ŋɔ o be
ŋɔ o bɛ ɛɔ?
Korowii bol Filisti tena chɔɡa wa
28A bena Kooro Ahas aa chɔ o banɔn ta,#2Ko 16:20 waa aa le Korowii be ba laanee.
29Filisti tena, daŋɡbala baa
kpɔa lɔɔ heyaa ka la kuu,
kɛ he bɛ ɡel he sie lɛ he
hɛɡre.
Harɛkon sewaa, onchɔɡe kɛ
domkpule dɛ́ chiɡ o naa ta,
ásɛ o bii ɡe do kɛŋɔ doh
dɛ́ ir.
30Nɛra baa nyaa kohona ɛɛ dɔ
kwaa dɛɛ di,
ásɛ banɔ la ba soɡa bini
aa kpeɡa tɛɛ ba ɡe dɔ bɔr
chɔ bosɔɔhna ta,
komɛlbwa aa ban ɛ.
Kɛ he Filisti tena te,
lɔree mɛɛ ba kpɔe
kpoo heyaa he mun he
harɛ la ta.
He bini bɛlbwa aa kae ba.
31Hé do lɔŋɔre dɛɛ wii,
he banɔ la
haa lɔ bwɛjena bini la!
Filisti tena,
hé ɡel he bambile teŋe!
Yoyoora tenten le weekaŋle
nyunduabɔr dɛɛ ba,
kɛŋɔ ninchuu ken,
dɛ bwa pɛ dɛɛ ba ba yo
heya.
32Webesoo yaa ba toroma
baa le harɛ la ta ba la
chaŋa ɔ?
“Korowii kpɔ Saayɔn cheɡ,
ásɛ o nɛra baa dɛ na
wahala dɔ bɔr so
dɛ́ dɔ ba nyu.”
Currently Selected:
Aesaya 14: mzw
Highlight
Share
Compare
Copy
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
