Aesaya 13
13
Korowii bol Babelɔn tena chɔɡa wa
1Babelɔn waa Korowii aa kpɔa baɡle Emɔɔs bie Aesaya chaahna ta laanee nɔ.
2Hé kpɔ laa fraŋkaa ka pa
deŋɡare daa
aa wola toole o ta,
ásɛ dɛ kpɔ takpeɡ ŋɔ
laa tena ba,
dɛ́ ir nɔɔra baɡ ba
bá ka jo nɛnjena bwɛɛ la ta
dɛ́ yoo ba.
3Korowii nɛra waa lee ba cheɡ
tɛ o te,
dɛ yerɛ o banyoola ŋɔ
bá tɛr nɛra baa dɛ ɛo
bandiwaa la deŋne.
Ba sie dɛ lɛ kan
waa doa la ta,
dɛ́ ɡel ba won pɔ nɛra la nɛ.
4Hé no! Gbɔɡa dɛ le bwejena
dor dɛɛ ba birbir
kɛ nɛnlaa aa dɛ valɛ ken,
kɛ harɛre nɛra ne ba
koranar
aa baa pɛ ken.
Nemenɛ Korowiirii
dɛɛ yer ba bá kaa laa la.
5Ba le harɛre jaɡa bojaŋ
dɛɛ ba.
Bandia nee Korowii ɛɛ ba
ba ne,
bá ba chɔɡ harɛ la bwa.
6Hé kpɔ nɔɔra dawɛ nyu
dɛ́ wi.
Tɔpere Korowii aa lea cheɡ
la telo.
Korowii Waa Ɛ Kpeɡri Bwa
Dɔɔ la tɔpere waa
dɛ ba nɛra chɔɡa la telo.
7Gɛ saŋ telaa, nomɛlbwa
bwara ɛɛ yɔroo,
ásɛ ba hwɛɡa ɡe tonɛ.
8Ɔmee ɛɛ chole ba nɛɛ,
ba bwara wee ba chweeh,
baa beɡre ba te kɛŋɔ loltea
aa lɔ haah.
Ba nyoa ɛɛ kpoo kohonaa,
ásɛ sihiih kpo ba, baa nyiŋi
dɔŋa.
9Hé na! Tɔpere Korowii aa lea
cheɡ la dɛ ba.
Awola tɔpere la
aa werii do kwara,
o baah ɛɛ diu taeh.
Wɛɛ ɛ harɛ nɔɔ kɛŋɔ
pua hɛŋle ɡbo harɛ ken,
dɛ́ chɔɡ wechɔɡ-ɛɛra
le o ta.
10Weweela aa chaah ɡɛ saŋ,
wee aa bɔr
chaahna ba kpa,
korobie ɡe aa won chaah.#Mat 24:29
11Korowii ŋɔ,
“Mɛɛ ba chɔɡ harɛ nɔɔ.
Mɛɛ tɛr wechɔɡ-ɛɛra
deŋnee ba wedoŋa wa,
dɛ́ ɡel ɡɔɔra
nɛra aa dɛ ɡɔɔ
ba te la teŋe.
Dɛ́ ba banɔ la baa
dɛ ɛ mbarafo la ɡe ne harɛ.
12Nɛra baa le a nyoa ɛɛ ka
tama kenii,
ba waa do tɔɡre
ɡwaa suuɡaswɛm tenten.
13Mɛɛ ɡeloo nyundua yiiɡi,
ásɛ harɛ jiɡri
dɛ́ le o chebɔr,
ɡɛ tɔpere men
Koranar Bwa Kooro
aa baɡle
n bandia harɛ nɔ ta la.
14Hɔɔhra baa soɡe Babelɔn ɛɛ
lɔɔ peɡre,
dɛ́ kaa ba harɛre ta
kɛŋɔ kpaahna aa jo
kweɡli baah a lɔ peɡre la.
Baa chwao peɡre kɛŋɔ peera
aa wola teɡre dɔe ken.
15Nomɛlbwa baa lawɔ la,
baa yaɡɔɔ kere nee kpo.
16Baa cheo dɛɛ nyiŋi ba lɔɔ
ba bii kpoo, dɛ́ jo ba
deremi
dɛ́ bal ba laala dɛ paɡɛ ba
haahna ɡe.”
17Korowii ŋɔ,
“Hé no! Mɛɛ ɡeloo Midia
tena ba yo Babelɔn tena.
Ba waane laa
suuɡapoŋa wa,
haa won kpɔ suuɡaswɛm
yaɡ ba sen.#Jer 51:11; Dan 5:28
18Baa kpɔ ba tori ne hɛmaa
le bonɔɔna nɛɛ dɛ́ kpoo ba.
Ba te waane laa
bechasɔɔhne wa,
ba ta tedoma dɔe tɛ
bechajeɡre ɡe.
19Babelɔn kora wer
ɡwaa bwɛɛre bwa kora,
bela tena kpɔɔ dɛɛ ta nyoa.
Kɛ men Korowii, mɛɛ chɔɡ
kora laanee kɛŋɔ maa ɛ
Sodom ne Gomoora la.#Mum 19:24
20Nomɛlbwa aa belaa so kpa
bwa, nɛra ba taa dɛ lol ba
ne banɔ la ba ta
aa dɛ ba ba lola bwa.
Arab tena baa vala dɛɛ valɛ
aa ba tɛnte deene
baŋre bela,
peteɡra kwara aa ba
peeraa teɡɛ la bela
á ka di kpa.
21Pua hɛŋle ɡbo harɛ ta ola
dɛ ba bela doe
dɛɛ si deremi la bini,
kwiure sɔh a kɔne bela,
ásɛ kpɔɡ bini ola aa do
kɛŋɔ boohna do bela
dɛɛ jah.
22Kalampoŋare ɛɛ dɛɛ si
dekpeɡa binii,
ásɛ ɡboli si koranar
dedɛɛɡa bini.
Babelɔn chɔɡa saŋ telo,
waa jaŋɛ kpa.”
Currently Selected:
Aesaya 13: mzw
Highlight
Share
Copy
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
