Hosia 4
4
Korowii ne Israel tena dɔe wa
1Korowii ŋɔ
o ne Israel tena dɔɔ,
dɛ ŋɔ bá no waa
waa dɛ bol. O ŋɔ,
“He waa ta kasinteŋ dɔe,
he ta nyina ɡe dɔe,
haa men jemɛ harɛ nɔ ta.
2Taahna wobol ɡboo
lɔ he nyoo,
he dɛ teŋe nyosone,
dɛɛ kpoo dɔŋa, dɛɛ ŋwɛ,
dɛɛ chɔɡ yal, dɛɛ ɛ anɔ la
aa wola were bwa dɛɛ ja.
Nɛŋkpoa ɡboo
harɛ nɔ ta bwa.
3A ɡɛ nomanta, harɛ la holɔ
dɛ chɔɡ,
ásɛ kwaa aa lɔ o ta bwa
serewe.
Kpɔɡ bini ola ne jumbii
dɛ mpo bini pɛŋa bwa
dɛ serewe.”
4Korowii berɔ ŋɔ,
“Bɛlbwa ne o dɔŋ bɛ dɔ,
bɛlbwa bɛ o dɔŋ pwah.
He do kɛŋɔ nɛra
baa dɛ pwah sɔfore.
5Chɔɔ ne jwaana bwaa
hɛɛ lɔ na,
he ne Korowii keamere
bwa.
Gɛɛ mɛɛ ba Israel
waa ɛ he nya la chɔɡa.
6N nɛra aa wola men Korowii jemɛ
nomanta, ba dɛ serewe.
He sɔfore, haa wola n waa ta
teŋɛ nomanta,
n ɡe vɛh heya.
Haa vɛh men Korowii haa dɛ
tom mɛ webaɡla ta teŋa
nomanta,
n ɡe ɛɛ vɛh he biirii.
7He sɔfore, haa dɛ warɛ la,
dɛ he dɛ ɛɛ mɛ
wechɔɡa kohona.
Anomanta, mɛɛ ɡeloo
he jirima berɛ sihiih.
8N nɛra wechɔɡa taa
he sɔfore che dɛɛ dɔ he te,
anomanta, he dɛ nyin
ba na dɛɛ ɛ
wechɔɡa kohona.
9Gɛ maa dɛ ba nɛra la ɛɛ
laanee
mɛɛ ba he sɔfore ɡe ɛɛ.
Men Korowii ɛɛ tɛr
he bwa deŋnee,
dɛ bɔ heyaa kem a wa.
10Hɛɛ di kondikwaa,
kɛ haa vaɡɛ,
dɛ́ bɔ jwamane,
kɛ he mun aa ya bwa,
dɛkalkɛ he vɛh men Korowii
dɛ kpɔ he te tɛ voɡa ane.
11Sembena ne anfala nyɔe
chɔɡ n nɛra liire baa
waa mun no.
12Daa baa teŋa ɛ voɡa
taa baa la dɛ kaa bɔɔ
ba nyuune wa,
ásɛ daa la ɛɛ bol waa
ba be.
Ba laa ba te kpɔ men Korowii
baa dɛ tom mɛ nɛ,
kɛŋɔ hanjwamane
dɛ kaa tomɛ voɡa ane.
13Bwejena doree baa ɛ
sarahare,
dɛɛ fuh saraha kwaa
deŋɡarere ta,
ne dajena bwa soo siwi
a chunchule aa soma lɔɡre.
A cheɡɛ a ta he bihaahna
kpɔ ba te do jwamane ta,
asɛ he bibaala haahna ɡe ɛɛ chɔɡ yal.
14Maa he bihaahna baa dɛ
bɔ jwamane la deŋnee tɛr,
ɡɛɛ maa wola he bibaala
haahna ɡe deŋnee tɛr
ba yal chɔɡa wa.
He baala nɔ ɡbabir deŋnee
mɛɛ ba tɛra,
dɛkalkɛ he ne haahna la
dɛ bɔ jwamane dɛ kaa ɛ
saraha voɡa ta,
nɛra baa wola waa mun
no la ɛɛ heo!
15A lole kɛŋɔ he Israel tena le
n habɔɔ,
he bɛ ɡel Juda tena ɛ ɡɛ
dɛ́ di a bolchɔɡe.
He bɛ Gelɡal la,
he bɛ Bɛt Avɛn#4:15 Bɛt Avɛn munii nyubinikpeɡ dem. ɡe la.
He bɛ men dɛɛ ŋwɛɛ ŋɔ
men Korowii ta aa lole!
16Israel tena deŋne kpeɡri,
kɛŋɔ naneenanar a deŋne
aa kpeɡa ken.
Ɛrɛɛ men Korowii ɛɛ ba
wona kpɔa la dibɔr kɛŋɔ
baa teɡɛ pebiiri
dɛɛ la dibɔr ɔ?
17Israel tena#4:17 Israel tena nɔ, ba berɔ dɛɛ yer baEfrem tena. kpɔ ba te
jo voɡa toma ta, hé ɡel ba.
18Ba nyɔ sen tonaa,
ba ka dɛ bɔ
ba jwamane la ja.
Ba sie dɛ lɛ sihihwaa ta
ɡwaa anɔ la
aa tɛɛ ba jirima.
19Kawulewule ɛɛ tao kpɔ
ba kaa,
ásɛ sihiih kpo ba sarahare
baa dɛ ɛ voɡa ta la wa.”
Currently Selected:
Hosia 4: mzw
Highlight
Copy
Compare
Share
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
