Yak 3

Mledi mlɔ binemi ʋe aʋa

1Mɛ benemi ba, aní mlɔ petee mladzì badɔbasɛ ɛ. Lɛ ese linu si mlete si biaxwa litsi tsiitsii ni blɔ badɔbasɛ ba sani banɔ gɔgɔ ba. 2Blɔ petee kwita kese. Pɔ̀ xe ɔnɔ ɔlɛ gi ɔʋíta kese liwewe ní yɛ kipaniɛ mɛ ɛ, kɔlɔ aflɔ lɛ aatani yɛ isu aʋa kuŋa a.

3Xe kwikpɛ bala ʋa ní isɔ ʋa inugu le me tɔ benu kutu aki blɔ ɛ, kuzɛɛtani ba tsinɔ ní niklɔ gi kwipɛ ɛ. 4Loo mlegyo initsahu le edi, kiliɛ gi ikeme e, xe awɔ gagla la izeku le fɛ ɛ, akufa sisami atɔ ko bizɛkɔɛ gyɔ lɛ ɛtsini niklɔ gi ohuku ye apɛ si itrɛ ɛ. 5Niteme ke kinemi ye kilɛ. Kinu kisugyaɛ kapɛ sisami atɔ, pɔ̀ kizɛtani isu kudɔ̀ ni eboe ʋidi. Gyo le di kiliɛ gi ɔfinyimi aatani liŋwafu ʋidi kifu kukpɛ ɛ! 6Lɛ kinemi ye kilɛ ŋwisi kifu kinɛ ɛ. Kinu kidɔ zimizi gi kikpasi ní blɔ isu ya mɛ bidɔ mɛ kusi i, kizezizi ɔnɔse lo, lɛ kizɛkpɛ blɔ ligbã́ nɛ mɛ bede ʋa kifu, lɛ kifu moni ye kizɛkpɛ kinemi ye kifu yɛ ɛ. 7Ɔnɔ gbagbe aatani kumla, lɛ amla baga ede ede, kudzɔʋi yɔ, bagaa ʋa gi bizeti i, ani akpa la. 8Pɔ̀ ɔnɔnɔ ɔ́tani kinemi ye kumla a. Ki nyani, lɛ báma kɛ aʋa kuŋa mɛ ɛ, kinu aɖi zimizi. 9Kuzɛɛkɔ kɛ edo blɔ Ɔkaɛ nì Aya ɖase, lɛ kuzɛɛkɔ kɛ xo ifi ikpɛ banɔ dzedze ba gi Aya abitɛ ɛ, gi beyi ye e. 10Ɖase kudodo ni ifi kuxoxo bizɛdɔ onugu tole lɔ ya ké me. Mɛ benemi ba, líma si lize nite e. 11Kenipeʋiatɔ kalɛ gi kizɛɛki kumwɛni ani kuni gyigyi dɔni linitɔ tile me na a? 12Mɛ benemi ba, ɔmumɔɛ ose ɔ́tratani mangɔ kuyo o, lɛ wain ehuʋi la átratani atɔ kuyo o, lɛ kumwɛ linitɔ kyɛ ɛ litrátani kuni gyigyi kukɔ ɔ.

Kuboete ede taʋa

13Banɔatɔ balɛ ni mlɔ kusi gi béte liboe, xe benu eboe ese na a? Bebu le abasɛ gani ba agbã́ gbã na ni ba kiboebitɛ gi bɛbitɛ ní kusububɔ ni kuboete me. 14Pɔ̀ xe ní wɔ ɔna nɔ mɛ ɛ, kaŋuzã, kutitii ani amimi bilɛ wɔ ɛ, kɔlɔ wukíta kese ní anukwarɛ su gani kusufeke ni wɔ kuboeteo me e. 15Kuboeteo klɔ elue kúdɔ lifunu ne e, kelea me kunɛ kunu, kisugya mɛ ni ozimizi ye kunɛ. 16Niklɔ gi kaŋuza ni amimi bilɛ ɛ, niklɔ kapisa ni kuzimizi kakaa elu bilɛ.

17Pɔ̀ kuboeteo liɔ gi kwidɔ lifunu ne e, kɔsu kwidra ní ɔtɔpu kɔ, kunu kusuyɔ, kwiplɛ litɔ kese, lɛ kunu kunɔdimɛnɔ ɔ, kwiyi nì asigaga didi, lɛ eboe gbã kubitɛ kulɛ ní kɔ mɛ ɛ, kúkpɛ ɔha ni kulɛlɛ ni aŋumɛboebitɛ ɛ. 18Lɛ Ligbã́ flɔflɔ lɛ ɛ, linu kidiliɛ gi kido edɔni esebi ala gi baguvu ba bɛkpɛ ní kusuyɔ mɛ ɛ.

Currently Selected:

Yak 3: avn

Highlight

Compare

Copy