Yak 2

Mlakíbitɛ aŋumɛboe

1Mɛ benemi ba, ŋwisi banɔ gi bɛzi blɔ Ɔkaɛ Yesu Kristo o, gi onu kuklekleo Ɔkaɛ aʋa ɛɛŋa kinɛ ɛ, mlakíkpɛ lidzegaga ní banima kusi ní ba kiŋwiŋwi yɛ mɛ onu u. 2Kɔ lɛ si oxonete gi akpɛ sika asukpɛɛ ɛ, nì ewu gbã na aba mlɔ ɔtsaklɔ, lɛ ɔzianete ní ewu pamipami mɛ fɛ aba ɛ. 3Xe wɔki ɔniliɛ gi akpɛ ewu gbã na kubùbù sanɔ ɔ, lɛ wɔsi yɛ si, “Ze ní ligbo gbã ɛ nɛ ya aʋa a”, pɔ̀ lɛ wɔsi ɔzianete si, “Lɛɛ ní kɔlɔ ɔ,” loo wɔsi yɛ si “ze keseatsalia ní mɛ ikli lɛ onu i,” 4Kɔlɔ wɔnyata kese gi wɔmani kulɛlɛ ní mlɔ kusi i, lɛ wɔxwa litsi nì begyodi nyani nyani i. 5Mlata kutu mɛ benemi lɔlɔ nɛ ba! Aya akya bepiplinete ba ní kelea lia mɛ tɔ beze bexonete ní kuziŋa mɛ atɔ bazɛ kaʋaŋaa ŋwisi ba kaŋase gi aka aplɛ aki banama a, gi bɛlɔ yɛ kinɛ ɛ. 6Pɔ̀ mlákpɛ kubùbù ní bepiplinete ba su u! Fɔanɛ bizɛtafa mlɔ xe bizehe mlo ɛtsini betsixwa ba a? Ba benu bexonete ba! 7Ba benu banama gi bizɛpani eboe dovo la ní Yɛ linyi gbã ɛ nɛ gi bɛki mlɔ ɔ, gi mledzi Yɛ banɛ su u.

8Wɔli ní kude gbã aʋa xe wɔbitɛ ní kaʋaŋaa ɔsã nɔ aʋa a, gi ɔkpasi ní kuŋwlimi dradra mɛ ɛ si, “Lɔ wɔ ɔhanuglɔɛ ŋwisi wɔ ɔtutɔ wɔ isu ya kinɛ ɛ.” 9Pɔ̀ xe wɔbitɛ ɔyurɔ banima ní ba kiŋwiŋwi yɛ mɛ onu i, wɔta kese, lɛ ɔsã nɔ ebú wo lipɔ ŋwisi ɔtumonu kinɛ ɛ. 10Ɔniliɛ gi ata ɔsã tole ese e, aŋa lipɔ ŋwisi ɔnɔ gi ata lɛ petee ese kinɛ ɛ. 11Lɛ ɔniliɛ gi yɛ apani si, “Wukíwa kihasi i” yɛ ké apani si, “Wukíye ɔnɔ ɔ.” Xe wɔ́wa kihasi fɛ ɛ, wɔta ɔsã nɔ ese xegi woye ɔnɔ ɛ. 12Lɛ loso mlapani tɔ mlabitɛ eboe ŋwisi banama gi biaxwa litsi kɔ ní ɔsã nɔ gi izɛki banɔ ɔwlamɔmɔ onu i. 13Lɛ ese linu si Aya ɔ́tradi asigaga xe axwa litsi ni ɔniliɛ gi ódi banɔ asigaga a, pɔ̀ Aya ɔ́trabu ɔniliɛ gi izeedi banɔ asigaga ɛ lipɔ.

Kuziŋa gi axwɛwawa áma ní kɔsu i, kunu kuziŋa pluplu

14Mɛ benemi ba, liboe gbã woli linu xe ɔnutɔ apani si, kuziŋa kulɛ ní yɛ awla pɔ̀ xe kuziŋa lixwɛwawa líma yɛ awla a? Kuziŋa liɔ klɔ kwiatani yɛ kubu na a? 15Kɔlɛ si beneminyime loo benemidzɛ bɛziã ewu, lɛ kiŋaŋaɛ fɛ kísrɛ gi biaŋa a. 16Liboe gbã woli linu, xe wɔsi ba si, “Aya ɔkrira mlɔ! Kublɔ kukíku mlo o, lɛ mlaŋa tɔ mleke!” xe wɔ́ki ba ligbã́ nɛ bidɔ ziazia ʋɛ ɛ? 17Nite kuziŋaa kulɛ, xe axwɛwawa ápɔni kɔ ɛ, kɔlɔ kunu kupluplu.

18Pɔ̀ ɔnutɔ aapani si, “Kuziŋa kulɛ ní ɔnutɔ awla, lɛ ɔnɔ dzedze fɛ axwɛwawa alɛ yɛ awla a.” Maabu lɛ onu si, “Basɛ mɛ kiliɛ gi kuziŋa kwiaze ni ɔnutɔ awla xe axwɛwawa ápɔnɔ ɛ. Lɛ maabasɛ mlɔ mɛ kuziŋaa gani mɛ axwɛwawa la mɛ ɛ.” 19Dani wɔzi lɛ aʋa ŋa si Aya tole ko ɔlɛ ɛ? Lipɛ! Ifuɛfuɛ zimizi ne fɛ izɛ lɛ aʋa ɛɛŋa lɛ izeesugu ni lifu u. 20Ɔga! Kipɛ wɔpɛ si babasɛ wɔ si kuziŋa gi axwɛwawa ápɔni kɔ ɛ, kúnu kididɔ na a? 21Dani bɛmɔ blɔ ɔkatsitsi ye Abraham si eze ɔnɔ gbã ní Aya aŋu mɛ gani yɛ axwɛwawa la mɛ gi akɔ Yebi ye Isak akɔ ní ɔdɔpɔʋisuʋɔ lɔ aʋa na a? 22Mlámɔ si yɛ kuziŋaa ni yɛ axwɛwawa la ɛkpɛ likpɔ na a? Lɛ yɛ kuziŋaa kwiflɔ gani yɛ axwɛwawa la mɛ na a? 23Lɛ Aya kuŋwlimi yɔ kwiba kɔ mɛ gi kwipani i si, “Abraham azɛ Aya aʋa ŋa lɛ kɔkpɛ yɛ kuziŋaa loso e, Aya azɛ yɛ si onu ɔnɔ gi aflɔ ɔ.” Lɛ loso axwa Abraham si yɛʋia a. 24Wɔmɔ si gani axwɛwawa mɛ ɛ, ɔnɔ izeedzì ɔnɔgbà ní Aya aŋu mɛ, aní gani kuziŋa tete me e.

25Nite ké lize ni Raxab ɔwawadzee, gani yɛ axwɛwawa mɛ ɛ, Aya amɔ yɛ si eze ɔnɔ gbã gi azɛ Israel bebi badɔwá ba a, lɛ apɔni ba xe bese ga kude dzedze sɛ ɛ. 26Lɛ loso e, kiliɛ gi ɔnɔ ɔlɛ xe Ɔfuɛfuɛ nɔ ɔma ní yɛ mɛ ɛ, xe izedzì kidɔ tsetse e, niteme ke kuziŋa gi axwɛwawa ápɔnɔ ɛ, kunu kuziŋa tsetse.

Currently Selected:

Yak 2: avn

Highlight

Compare

Copy