Yak 4

Kuʋia ŋaŋa nì kelea mɛ

1Nifɔ kuboeŋwlɛ nì avitɛ ɛdɔ ní mlɔ kusi i? Mlamɔ si kusuŋwasi ni kulekuku uliɔ gi biita kigũ yɛ ní mlɔ mɛ, bɛkɔ́ bidɔ na a? 2Mlɛpɛ́ bidɔ pɔ̀ mlátratani bɛ kumɔ ɔ, lɛ loso mlɛtrɔ si mlaye ɔnɔ, mlɛɛpɛ bidɔ ni kimbi kyikyi, pɔ̀ mlátratani bɛ kumɔ ɔ, lɛ loso mlɛɛzɛpɛ avitɛ, lɛ mlɛzɛgɔni i. Mlaʋímɔ kidiliɛ gi mlɛpɛ ɛ, lɛ ese linu si mláʋiʋi Aya si ɔki mlɔ ɔ. 3Lɛ xe gi mleeʋí i, mlaʋímɔ ɔ, lɛ ese linu si mlɔ begyodi ʋa bɛnyani, mlezeʋi bidɔ gi bɛsu axwɛ mlawa kí mlɔ ɔtutɔ mlɔ isami kumɔmɔ ʋɛ. 4Mlɔ bahasi nɛ! Mléte si xe mlevu kelea mɛ kuʋia ɛ, libasɛ si mlenu ahwafianɛ aki Aya na a? Banɔ ba klɔ gi bɛpɛ si beze baʋia nɛ ɛki kelea mɛ ɛ, bɛbitɛ isu ya ahwafianɛ ki Aya. 5Mlakígyo le edi si anukwarɛ ɔ́tɔtɔ ɔ́ma ní Aya kuŋwlimi yɔ mɛ gi kwipani si, “Ɔfuɛfuɛ ɔnɔ gi Aya akɔ akpɛ ní blɔ mɛ ɛ, eyi ni kaŋuza gagla.” 6Pɔ̀ lipomepɛpɛɛ lɛ gi Aya akɔ ɛ, lilɛ gagla ɛsanɔ. Ŋwisi kiliɛ gi yɛ kuŋwlimi dradraa kwipani si, “Aya ayɔ kedu ní basudɔ ba su, pɔ̀ izɛɛpɛ lipo me ɛki banama gi bepleni isu ya ɛ.” 7Lɛ loso, mlepleni isu aki Aya. Mlayɔ kedu ní ozimizi ye su, tɔ aase ní mlɔ su. 8Mleti apɔni Aya tɔ aati pɔni mlɔ. Mleplo mlɔ awla la, mlɔ banɔ zimizi ba! Mlebu eboe nyani nyani na ní mlɔ ina nɛ mɛ, mlɔ banɔ aŋumɛboe bitɛ ba. 9Mleze ni ɔna nyipu, mlebemi, mleze asigaga mɛ, mlekyi mlɔ kimwɛ tɔ kidzi kubemi, mlɔ isami nɛ tɔ idzi aŋu mɛ kunyasi! 10Mlepleni isu ní Ɔkaɛ aŋu mɛ tɔ aamuni mlo.

Mledi mumɔ ní litsixwaxwa ni onemi ɔsɔlisɔli yɛ su

11Mɛ benemi ba, mlakípani eboe nyani nyani yurɔ mlɔ ahanuglɔ ba. Ɔnɔ gi izɛɛpani eboe nyani nyani yurɔ yɛ ɔhanuglɔ ɔsɔlisɔli i, loo xwa litsi ni ye e, apani liboe nyani nyani ayurɔ ɔsã nɔ, lɛ axwa litsi ni lɔ ɔ. Xe wɔxwa litsi ni Ɔsã nɔ ɛ, kɔlɔ wónu ɔniliɛ gi ɛɛbitɛ ni Ɔsã nɔ aʋa tɔ ɔ, pɔ ɔniliɛ gi ɛɛxwa litsi ni lo e. 12Aya tole ko onu Ɔsã nɔ ɔkɔkɔ ɛ nì otsixwa yɛ. Yɛ tètè ko aatani ɔnɔ kubu loo kuzizi. Nyaŋwɛ wogyodi si wonu xe wɔaxwa litsi ni wɔ ɔhanuglɔ ɔ?

Mledi mumɔ ní kusufeke su

13Abla ɛ mlata mɛ kutu, mlɔ banama gi mlɛɛpani si i, “Omono loo kivo e, kwiaga kude trɛ ni ɔma ʋidi ɔtɔ mɛ, kwiaze niklɔ ligɔ tile tɔ kwiawa axwɛ atɔ kwiamɔ kibɔ kpaŋuu.” 14Mléte kiliɛ gi mlɔ ligbã́ nɛ liaze kivo kyɛ ɛ! Mlalɛ ŋwisi ɖebleku ye, gi aŋwi taʋɛ ko o, xe edzì alila kinɛ ɛ. 15Liboe lɛ gi mlaapani linu si, “Xe Ɔkaɛ adimɛ ɛ, kwiaze ligbã́ nɛ tɔ kwiabitɛ kɛya ni kɛkɔlɔ.” 16Pɔ̀ abla ɛ, mlɛɛdɔ̀ isu lɛ mleefeke isu, kusudɔ klɔ petee kwinyani. 17Lɛ loso e, ɔniliɛ gi ete liboe gbã nɛ ɛ, gi lilɛ si ɔbitɛ ɛ, xe ɔʋíbitɛ lɛ ɛ, abitɛ liboe zimizi.

Currently Selected:

Yak 4: avn

Highlight

Compare

Copy