Hebr 9

Aya yɛ Kusumu yo ní Kesea aʋa Lisumugba lɛ mɛ

1Kunyanya tɔpu yɔ ɛ, kɔ isã nɛ ki kusumu yo kwize, lɛ Ɔdradra kɔ kyɛ eze gi bɛbitɛ ní kesea ya aʋa a. 2Bɛwa Aya yɛ lisumugba lɛ gi linu kusa akpandɔ ɔ. Bɛlɛ lisumugba lɛ ní kupɛ tuʋa mɛ. Ní kapɛ tɔpu ya gi bɛɛxwa si Ɔdradra klɔ mɛ ɛ, kani ose, ani ɔkplɔ gi lɔ aʋa bɛzɛɛtrɔ aklã na a, gi bɛdra la su iiki Aya ɛ. 3Lɛ ní ligba lɛ mɛ kutsasa ʋlaa kede e, níklɔ bizɛɛxwa si Ɔdradra klɔ petee. 4Ní niklɔ ɛ, bedu sika yɛ ɔdɔpɔʋisuʋɔ gi lɔ aʋa bizɛɛkpɛ lifi ye kifu yɛ, ani sika yɛ kunyanya adaka yɛ, gi yɛ me sika kefukpo a, gi kamɛ bɛkpɛ mana yɛ keze e. Aron yɛ ose vuga vuga lɔ gi ɛɛta awlakpa la ɛ, kɔpɔni akla na gi la aʋa bɛŋwlimi Mose ɔsã nɔ ɛtrɔ ɛ, la kyɛ akpasi ní adaka yɛ mɛ. 5Ní adaka yɛ aʋa ɛ, Aya yɛ baxwɛdzɛ ba gi bizɛxwa si Kerubim#9:5 Aya yɛ baxwɛdzɛa ba lide nɛ gi lilɛ ní Aya su u, xe lizeetu ye klanɔ lipoe kakaa. ba a, gi bɛɛbasɛ si Aya ɔlɛ ní niklɔ ɛ balɛ. Ba siwlasasa sɛ ɛ, siwe niklɔ gi bizɛɛkɔ eboe zimizi na ɛkyɛ ɛ. Pɔ̀ kutrátani eboa la petee me kutrɛ kpaŋu abla a.

6Xegi bedu bidɔ mɛ nite pɔ́ ɛ, Kusumu yo baka ba bizeetiku ní lisumugba lɛ kapɛ tɔpu ya mɛ liwe kakaa lɛ bizɛwa ba axwɛ na. 7Pɔ̀ Kusumu yo Ɔka ʋidi ye ko izeetiku ní lisumugba lɛ kimɛ ɛmɛ, tule ní ligɔ lɛ mɛ. Izeevu ikaɛ lɛ gi izɛɛki Aya ní yɛ ɔtutɔ ni banɔ dzedze ba eboe zimizi na gi béte si bɛɛbitɛ ɛ onu ní awla. 8Lɛ Ɔfuɛfuɛ Dradra lɔ ebu le basɛ tratratra dɔni la ya mɛ si gi batrɔtrɔ ba ya balɛ onu i, baʋíbu kudeo onu ɛki niklɔ gi Ɛsadra petee ɛki ɔnɔnɔ gi lisumugba tɔpu nɛ lidzi lɛ ɛ. 9Lɛ ya linu lixaŋu gi libasɛ kidiliɛ ɛ, gi kiiba kɛ mɛ omono o. Libasɛ si bidɔ kɔkɔ ni bagaa ʋa gi bɛɛpɔʋi ɛki Aya ɛ, bítraki si ɔniliɛ ɛ, gi yɛ ɛɛki Aya bidɔ mɛ ɛ, yɛ ɔna nɔ mɛ aadra petee, 10lɛ ese linu si binu kiŋaŋa ni kiŋwɛŋwɛ ni kusuplo egoʋi ede ede ko. Bɛ ya petee binu aŋu mɛ isã ko gi ilɛ lɛ ozekɔ ɔ, kɔna ni lipoe lɛ gi Aya aamani yɛ kutrɔtrɔ vuvu yɔ ɔ.

Yesu yɛ ika lɛ iplo blɔ eboe zimizi na ɛzanɔ

11Pɔ̀ gi Kristo aba ŋwisi kusumu yo Ɔka ʋidi ye e, gi yɛ aki bidɔ gbã ɛ mɛ ɛ, gi bilɛ niya kooko e, aga lisɔligba ɛlɛ gi liŋa kedzi sanɔ ɔ, xe lina ɛsanɔ mɛ ɛ. Lisumugba ɛlɛ ya ɛ, aní banɔ awla bɛkɔ ɛwa lɛ ɛ, lɛ ese linu si línu kesea aʋa ya bidɔ bitɛbitɛ ɛ. 12Gi eti eku ní Ɔdradra klɔ petee tule uliɔ klɔ ʋa ɛ, ɔ́tsini bamu ni egumenyime ika a, boŋu i, akɔ yɛ ɔtutɔ yɛ ika lɛ, lɛ azɛ kubúbú gi kútrablo ɛki blɔ ɛ. 13Bamu ʋa ni egumenyime na ika lɛ ani egumedzɛ la, la kusuʋɔtɔɔ bizeehle ʋe ɛbali ní banama gi basu ɔ́dra ní ɔkɔ lɔ onu i, aʋa kɔ basu ɛdra ní ɔkɔ lɔ onu i. 14Xegi lilɛ ní lɛ mɛ nite e, ege kɛ kiakɔ si Kristo yɛ ika lɛ, gi akɔ isu aki Aya a, ŋwisi bidɔ pɔʋi pɔʋi gi bina kinɛ ɛ, gani Ɔfuɛfuɛ moblo lo me e, ítraplo blɔ begyodi ʋa su dɔni eboa la gi izɛɛmani kutse me e, gi la aaki si kwiawa axwɛ na ki Aya gbagbe e?

15Kɔkpɛ liboe lɛ ya loso e, Kristo yɛ onu ɔniliɛ gi yɛ onu ɔguvu ye ní kunyanya vuvu yɔ onu u, tɔ banama gi Aya axwa ɛ, biazɛ kaŋase moblo alia gi Aya aka aplɛ ɛ. Lɛ gi etse ní banima litukpo e, yɛ kutseo kwikɔ si banima bɛmɔ kubúbú idɔni ba eboe zimizi na mɛ ní lipoe lɛ mɛ gi kunyanya tɔpu yɔ kwizɛɛwa kɔ axwɛ na ɛ.

16Lɛ ese linu si ní kupɛpɛɔ liɔ gi bizɛŋwlimi plɛ onu i,#9:16 Banɔ glegle bizɛɛŋwlimi ba kupɛpɛɔ ɛplɛ kpɛ ɔtɔ ní kiliɛ gi bɛpɛ si balɛ ba exo la ní ba kutseo kede e. liziã si batrɔ likla lɛ aʋa si ɔniliɛ gi aŋwlimi kɔ aplɛ ɛ, etse xe e. 17Lɛ ese linu si gi ɔniliɛ klɔ ɔlɛ ligbã́ nɛ ɛ, xe aŋwlimi kɔ akpɛ ɛ, kigaglaɛ tɔtɔ kíma yɛ kupɛpɛɔ awla a, gakɔ kpɛ ni lipoe lɛ gi etse e, xe ableke kwiawa lixwɛ ɛ. 18Lɛ ya loso kunyanya tɔpu yɔ kura kyɛ ɛ, bɛwa ika lɛ su axwɛ kede, xe ableke kwikpese kɔ axwɛ na kuwa a. 19Gi Mose apani ní isã nɛ su ŋwisi kiliɛ gi bɛkpɛ lɛ ɛki banima petee kede e, akɔ egume na, ni bamu ʋa ika lɛ gi bɛpisa ni kuni yo o, lɛ efuflu ʋe ní ɔsã nɔ keplekpaa ni banima petee aʋa ni hisope#9:19 Siwa sitɔ gi sɛ awlakpa la bizɛkɔ ɛ hle ika lɛ ni banima ni bidɔ dzedze ʋe aʋa xegi Yudanɛ ma bɛbitɛ ba ikɔ lɛ ɛ. yɛ awlakpa la gi bɛnya ni sigapi kyikyi sɛ ɛ. 20Lɛ apani si, “Bɛ ya binu ika lɛ gi ibasɛ kunyanya liɔ gi kɔ ɔsã Aya akpɛ aki mlɔ si mlevu u.” 21Niteme ke Mose akɔ ika lɛ ehle ní Aya yɛ lisumugba lɛ ni bisumudɔ kakaa aʋa. 22Lɛ ní anukwarɛɛ mɛ ní ɔsã nɔ onu i, kidɔ kakaa kloe kiziã si beplo kɛ su ni ika, lɛ ese linu si kukɔkyɛ kúma xegi ika íbali kese e.

Yesu Yɛ isu kukɔkyɛ kuzebu eboe zimizi na zanɔ

23Liziã si beplo bidɔ bɛ ya gi bilɛ ŋwisi lifunu ne bidɔ mɛ su gani bidɔpɔʋipɔʋi bɛ ya onu u, pɔ̀ lifunu ne bidɔ mɛ bɛ ɔtutɔ lɔ ɛ, biziã bidɔpɔʋipɔʋi gi bipɛ sani bɛ ya ɛ. 24Lɛ ese linu si Kristo óti iku ní Ɔdradra kɔ gi bɛkɔ awla la ɛwa a, gi ɔlɛ ŋwisi lifunu ne ɔni nɔ ɔtutɔ lɔ ɔ. Eti eku ní lifunu ne ɔtutɔ lɔ, niklɔ gi ɔlɛ abla ní Aya aŋu mɛ ní blɔ onu u. 25Kristo óti iku si yikɔ isu ikɔ tasɛ tasɛ ŋwisi kusumu yo Ɔka ʋidi ye gi izeetiku ní Ɔdradra klɔ tule ní ligɔ kakaa mɛ ɛ, ni ika gi ínu yɛ ɔtutɔ yɛ inɛ ɛ. 26Xegi nite lilɛ ɛ, nya lilɛ ki yɛ si ɔzɛmɔ ɔziã nɔ tasɛ tasɛ dɔni kelea okpese klɔ kee; pɔ̀ abla ní lipoe lɛ gi kelea kɛtrɛ ní ka ɔgù kɔ ɛ, aba tule si tɔ yɛ aabu eboe zimizi na zanɔ gani yɛ isu kukɔkyɛ mɛ. 27Ŋwisi kiliɛ gi bɛtrɔ lɛ ɛki ɔnɔ si, aatse tule kinɛ ɛ, lɛ kede e, biaxwa litsi ni yɛ, 28niteme ke Kristo fɛ, akɔ isu akyɛ tule tɔ yibu banɔ glegle ba eboe zimizi na ɛzanɔ. Aadzi ba kuʋla aní si tɔ yimɔ kini kpɛ eboe zimizi na tɔ ɔ, boŋu i, si tɔ yibu banama gi beepe ye e.

Currently Selected:

Hebr 9: avn

Highlight

Compare

Copy