Hebr 8
8
Yesu yɛ onu Kusumu yo Ɔka ʋidi ye kí Kunyanya Vuvu yɔ
1Liboe lɛ gi lɛ su kwipani i, lɛ linu si: kusumu yo Ɔka ʋidi liɛ gi ɔlɛ ní blɔ awla a, eze ní Lifunu ne kukusi yo kɔ likusigbo le kaŋawla mɛ. 2Eesumu ní Ɔdradra klɔ ní lisumugba lɛ ɔtutɔ lɔ gi Aya awa mɛ ɛ, gi aní banɔ gbagbe awla bɛkɔ ɛwa lɛ ɛ.
3Kusumu yo Ɔka kakaa ɛ, Aya akya yɛ si ɔki bidɔ tɔ ɔpɔʋi baga aki Aya, lɛ loso blɔ kusumu yo Ɔka ʋidi ye kyɛ ɛ, lilɛ si kiditɔ kize ní yɛ awla gi aakɔ ɛ. 4Xegi kesea lia ya aʋa ɔlɛ ɛ, nya ɔ́traze kusumu yo Ɔka koŋ, lɛ ese linu si kusumu yo baka ba balɛ gi bizɛɛki bidɔ ní ɔsã nɔ onu u. 5Axwɛ ana gi bizɛɛwa ní Ɔdradra klɔ ɔ, ŋwisi kusumu yo baka kinɛ ɛ, enu kidiliɛ gi kilɛ ní lifunu ne e, kɛ liŋwitsɛ nì kɛ kuyeo ko. Mose, lipoe lɛ gi atráwa lisɔligba lɛ ɛ, Aya aki yɛ ɔsãa nɔ si, “Di le aʋa si wɔbitɛ kidɔ kakaa ŋwisi kiliɛ gi bɛbasɛ wɔ ní lito le aʋa kinɛ ɛ.”
6Pɔ̀ abla ɛ, Aya akɔ kusumu yo axwɛ na gi emu isani ba ani na ɛ, aki Yesu ŋwisi kiliɛ gi kunyanya liɔ ɔ, gi abitɛ ní Aya ni yɛ banima kusi i, kwipɛ sani kutɔpu yɔ kinɛ, lɛ ese linu si bɛbitɛ kɔ ɛtrɔ ni kakaplɛ ki bidɔ gi bipɛ sanɔ aʋa a.
7Atɛsi kesetata káma ní kunyanya tɔpu yɔ su i, nya kunyanya ʋla kutrázia tɔ ɔ. 8Pɔ̀ Aya amɔ kesetata ní yɛ banima su gi apani si i,
“Me Aya mɛɛpani si: Lipoe le litrába,
gi maabitɛ kunyanya vuvu ni Israɛl kepea ani Yuda kepea a.
9Kútraze ŋwisi kunyanyaa liɔ
gi mabitɛ ni ba bakatsi ba a,
liwe lɛ gi mevu ba ɔwla lɔ ɔ,
xe magbani ba adɔnɔ ní Egipte e.
Béɖi anukwarɛɛ aki kunyanyaa liɔ gi mabitɛ ni ba a,
lɛ loso mekyi ní ba su, nite Ɔkaɛ apani.
10Lɛ loso, kunyanyaa liɔ ya gi mátrabitɛ ni Israelbanɛ ma
ni ewe a la gi ɛtrába mɛ ɛ, nite Ɔkaɛ apani.
Maakpɛ mɛ isã nɛ ní ba begyodi ʋa mɛ
lɛ maaŋwlimi nɛ ɔkpɛ ní ba ina nɛ mɛ.
Maaze ba Aya,
lɛ biaze mɛ banɔ.
11Lítrazia si bamɛ ɔtɔtɔ ɔbasɛ yɛ ɔhanuglɔ bidɔ ɔ,
loo ɔnɔnɔ ɔsi yenemi si, ‘Te Ɔkaɛ,’
lɛ ese linu si ba petee biate me,
dɔni ɔgɔgɔɛ aʋa zɛɛkɔna ni ɔnɔ ʋidi ye aʋa ɛ,
12Maakɔ ba eboe zimizi na kɔkyɛ ba
lɛ mátraplɛ aŋu ní ba kesetata atɔtɔ aʋa tɔ ɔ.”
13Gi apani ní kunyanya vuvu yɔ su i, Aya abitɛ lɛ si kunyanya tɔpu yɔ kwidzi kukoko, lɛ kidiliɛ gi kitsi i, xe kikpã ɛ, kialila kpekpemii.
Currently Selected:
Hebr 8: avn
Highlight
Share
Compare
Copy
Want to have your highlights saved across all your devices? Sign up or sign in
© Ghana Institute of Linguistics, Literacy and Bible Translation, 2017 In cooperation with Wycliffe Bible Translators, Inc
