Hebr 10
10
Yesu akɔ isu akyɛ tule ko ní ɔnɔ kakaa litukpo
1Ɔsã nɔ ɛ, eboe gbã ana gi ɛtrába ɛ, la kuyeo ko ɛbasɛ, aní eboe la kizeze me ɔtutɔ lɔ. Ní ɔsã lɔ klɔ ese e, bizɛɛkɔ bidɔpɔʋipɔʋi bɛ klɔ edzini kɔ ligɔ kakaa. Pɔ̀ bítratani banama gi beti apɔnɔ tɔ beesumu Aya ɛ, basu kudra xe biana a. 2Xegi bidɔpɔʋipɔʋi ʋɛ klɔ biatani banama gi beesumu Aya su kudra sugba ɛ, nya bɛmɔni bidɔ mɛ kupɔʋi, lɛ ese linu si banama gi ba beesumu Aya ɛ, basu ɛdra petee lɛ ba ina nɛ ítrabu ba lipɔ ɔ, kɔkpɛ ba eboe zimizi na loso. 3Boŋu i, bidɔpɔʋipɔʋi ʋɛ bilɛ ligɔ kakaa si bizɛɛplɛ aŋu ní banima eboe zimizi na aʋa ɛki ba. 4Lɛ ese linu si egume na ni bamu ʋa ika lɛ ɛ, ítratani eboe zimizi na kubu zanɔ liwewe.
5Lɛ ya loso gi Kristo aaba kelea mɛ ɛ, asi Aya si,
“Wɔ́ziã bidɔpɔʋipɔʋi ni bidɔkɔkɔ ɔ,
pɔ̀ wɔki mɛ kisugya.
6Baga zizi gi bɛpɔʋi ní ɔdɔpɔʋisuʋɔ lɔ aʋa ni bidɔ kɔkɔ
gi biabu eboe zimizi zanɔ kyɛ ɛ, bíku wɔ aŋu u.
7Lɛ mapani si, ‘Imɔ mɛ, bɛŋwlimi kpɛ ní keplekpaa mɛ ní mɛ su si
Oo Aya, maba si mibitɛ ní wɔ kupɛpɛɔ aʋa a.’ ”
8Ní ɔtɔpu kɔ ɛ, apani si “Bidɔkɔkɔ ni bidɔpɔʋipɔʋi loo baga gi bɛpɔʋi ní ɔdɔpɔʋisuʋɔ lɔ aʋa a, loo bidɔkɔkɔ ki eboe zimizi bíku wɔ aŋu lɛ wɔ́pɛ ʋɛ ɛ.” Apani nite gi nya ɔsã nɔ ɛki si bazaaki bidɔ bɛ ya xe e. 9Lɛ apani si, “Imɔ mɛ maba si mibitɛ ní wɔ kupɛpɛɔ aʋa” Lɛ loso Aya ebu kunyanya tɔpu yɔ azanɔ lɛ akɔ kunyanya ʋlaa akpɛ ní kɔ ozeklɔ ɛ. 10Agi Yesu Kristo abitɛ kidiliɛ gi Aya apɛ si ɔbitɛ ɛ, blɔ petee isu idra dɔni blɔ eboe zimizi na mɛ ɔkpɛ isu ya kukɔkyɛ uliɔ gi abitɛ tuleo liɔ klɔ loso o.
11Kusɔliɔ ɔka kakaa izɛɛwa yɛ axwɛ na liwe kakaa, lɛ izɛɛkɔ bidɔpɔʋipɔʋi ʋɛ lide tilee lɛ klɔ lipoe kakaa pɔ̀ bidɔpɔʋipɔʋii ʋɛ klɔ bítratani eboe zimizi na kubu zanɔ liwewe e. 12Pɔ̀ gi Kristo aki bidɔ mɛ tule ki eboe zimizi na ɛ, bidɔkɔkɔɛ ʋɛ klɔ biwà axwɛ kɔtsinɔ kanɔmɛ anɔmɛ, lɛ eze ní Aya yɛ kaŋaa mɛ. 13Lɛ dɔni lipoe lɛ klɔ aʋa kɔtsinɔ ɛ, eepe Aya gi yɛ aakɔ̀ yɛ ahwafianɛ ma kpɛ yɛ kukliseo e. 14Nì bidɔkɔkɔ tule e, aki si banama su gi iidra dɔni ba eboe zimizi na mɛ ɛ, bɛna kɔtsinɔ kanɔmɛ anɔmɛ.
15Lɛ Ɔfuɛfuɛ Dradra lɔ kyɛ ɛɛŋa katsalia ɛki blɔ. Ní ɔtɔpu kɔ ɛ, ɛpani si,
16“Lɛ ya linu kunyanya liɔ gi maabitɛ nì ba a,
ní ewe ala ya gi ɛtrába mɛ ɛ, nite Ɔkaɛ apani,
Maakpɛ mɛ isã nɛ ní ba ina nɛ mɛ,
lɛ maaŋwlimi nɛ kpɛ ní ba begyodi ʋa mɛ ɛ.”
17Lɛ apani dzɛ si,
“Mátraplɛ aŋu liwewe
ní ba eboe zimizi na ni ba ɔsã nɔ ese kutataa tɔtɔ aʋa tɔ ɔ.”
18Lɛ loso xegi bɛkɔ kiboebitɛ liɛ ya ɛkyɛ bá ɛ, bidɔpɔʋipɔʋi gi biabu eboe zimizi zanɔ ɛ, bíziã tɔ ɔ.
Mlaki tɔ kukpɛ ikù nɛ
19Lɛ loso mɛ benemi ba a, agi kudeonu kulɛ si kwiatiku ní Ɔdradra klɔ gani Yesu kutseo me e, 20yɛ adra kude vuvu gi kwiaki blɔ ligbã́ a, gani kusa uliɔ gi kwitsa ligba lɛ mɛ ɛ, gi kunu yɛ ɔtutɔ yɛ kisugyaɛ mɛ ɛ. 21Gi kusumu yo Ɔka ʋidi ɔlɛ ní blɔ awla a, gi yɛ odi ní Aya yɛ lisɔligba lɛ onu i, 22mlaki tɔ kuti pɔni Aya ni ɔna gi lɔ mɛ ɛdra ɛ, ni kuziŋa zizi nì ina gi lɛ su idra ɛ, gani Yesu yɛ ika lɛ gi ehle abali ní blɔ aʋa a, xe iiki si blɔ su ɛdra dɔni lipɔ kububu me e, nì blɔ kisugya gi eplo nì kuni i gi kɔmɛ kwidra ɛ. 23Mlaki tɔ kuvu kudeonudidi uliɔ gi kɔ su kwipani ki banima a, si kulɛ ní blɔ awla gagla, lɛ ese linu si kwiatani kuka ní Aya aʋa si aabitɛ ní yɛ kakaplɛa aʋa. 24Mlaki tɔ kupɛ bede ʋa ya onu gi kwiakpɛ kifu ní blɔ ahanuglɔ ba mɛ, tɔ balɔ ani tɔ babitɛ eboe gbã. 25Lɛ mlakíkɔ si kuyurɔ blɔ batsátsa ʋa ŋwisi kiliɛ gi banɔ batɔ bɛɛbitɛ kinɛ ɛ, boŋu i, mlaki tɔ kukpɛ ɔna ní blɔ ahanuglɔ ba lipo sanɔ, abla gi kwimɔ si Ɔkaɛ yɛ liwe le liiti pɔnɔ ɛ.
26Lɛ ese linu si xegi kwitrɛ ní blɔ eboe zimizi na aʋa ɔŋwadzu i, bidɔkɔkɔɛ tɔtɔ bíma a, gi bɛ biabu eboe zimizi na zanɔ ɔ, abla gi mlɛzɛ anukwarɛɛ ɔtutɔ lɔ ɛ. 27Kɔlɔ kidiliɛ gi kigɔ ko kinu si kuze ní lifu kusese me kí litsixwaxwa ɛnɛ ɛ, gi lɛ kudeonu kwidi i, ani kifu ʋidi iliɛ gi kitrazizi banɔ ba ya gi benu Aya yɛ ahwafianɛ ma ɛ! 28Ɔniliɛ gi ɔ́dimɛ si yibitɛ ní Mose ɔsã nɔ aʋa ɛ, bizeye ye asigaga modi xegi bɛtsa litsi ki yɛ si aŋa lipɔ ɔ, xegi banɔ tiaʋa loo sani nite bɛŋa katsalia ɛki liboe le e.
29Kɔ kitɛ liaze ki ɔniliɛ gi akpɛ Aya Yebi ye kakpaa ɛ? Ɔniliɛ gi akɔ Aya yɛ kunyanya vuvu yɔ ika lɛ ŋwisi biwaʋídɔ gi bɛ bizɛɛdra yɛ su idɔní yɛ eboe zimizi na mɛ ɛ? Gi yɛ izeekpini Aya yɛ Ɔfuɛfuɛ nɔ ɔ, gi lɔ izɛki lipomepɛpɛ nɛ ɛ? Mlegyo le edi kiliɛ gi kutuheheo liɔ ɔ, gi kwigyeni ye, kwianyani sanɔ ɛ! 30Lɛ ese linu si kwite ɔniliɛ klɔ gi apani si, “Maabitɛ ɔkpɛ lɛ onu, maadzini liʋɛ nɛ kutsa,” gi yɛ apani dzɛ si i, “Ɔkaɛ aaxwa litsi ni yɛ banima a.” 31Linu lifu liboe si ɔnutɔ ɔwɔli okú ní Aya gi ɔlɛ ligbã́ nɛ ɛ, yɛ iwla mɛ.
32Mlaplɛ aŋu kiliɛ gi lize ɛki mlɔ ní ewe ala klɔ mɛ ɛ, gi Aya aki mlɔ yɛ kuklekleo e, kiliɛ gi mlɛmɔ kini glegle e, pɔ̀ xe mlɔ kuŋwlɛŋwlɛɔ kúŋa mlɔ aʋa a. 33Lipoe tɔ onu i, bekpini mlo, lɛ bɛzɛɛwa mlɔ nyɔnyɔɛ ní ɔha lɔ kusi i, lɛ ní lipoe dzedze me e, mlɛlɛ nì banɔ baklɔ gi ba bɛzɛɛwa nyɔnyɔɛ ɛ. 34Mlɔ kyɛ mlemɔ ɔziã nɔ ɛpɔni ba ŋwisi banama gi bɛkpɛ ligba lɛ ɛ, lɛ gi bɛɛzi mlɔ bidɔmɔmɔ ʋɛ petee kyɛ ɛ, mlɛzi lɛ ni isami, lɛ ese linu si mlɔ ɔtutɔ mlete si bidɔ gi bipɛ sanɔ ɛ, bilɛ ní mlɔ awla gi bitrázizi liwewe e.
35Lɛ loso ɔna okído ní mlɔ lipo o, lɛ ese linu si biamani mlɔ libibubu ʋidi. 36Liziã si mlaplɛ litɔ ní kese atɔ xe mlɛbitɛ Aya yɛ kupɛpɛɔ aʋa ɛ, mlazi kidiliɛ gi kɛ aka aplɛ ɛ. 37Ní lipoe kpekpemi itɔ mɛ ɛ,
“Ligɔ taʋɛ ko ɔniliɛ gi atrába ɛ aaba, lɛ ɔ́trawɔ kede e.
38Pɔ̀ mɛ banama gi ba bede ʋa bɛgyɔ ɛ, biaze ligbã́ ní ba kuziŋaa mɛ.
pɔ̀ xe bamɛ ɔtɔ ekyi kede akpɛ mɛ ɛ,
isami itraku me ni ye e.”
39Kúma ní banɔ baklɔ gi bizekyi kede e, xe bizɛɛkyrɔ kusi i. Boŋu i, kulɛ ní banɔ baklɔ gi bɛziŋa a, xe Aya ebu i, ba kusi.
Currently Selected:
Hebr 10: avn
Highlight
Share
Compare
Copy
Want to have your highlights saved across all your devices? Sign up or sign in
© Ghana Institute of Linguistics, Literacy and Bible Translation, 2017 In cooperation with Wycliffe Bible Translators, Inc
