Hebr 6

1Lɛ loso mlaki tɔ kutrɛ ɔtɔ nɔ ní kudɔbasɛ uliɔ gi kwidzi ɔtɔ mɛ ɛ, atɔ kuyurɔ bidɔbasɛbasɛ tɔpu imɛ gi kwikɔ ekpese liboe le ní Kristo su u. Líma si kudzini ɔxɔ vuvu kukpɛ ɛ, gi onu kukyikyi dɔni eboe zimizi i, gi izɛmani kutse me e, ani Aya aʋa kuziŋa mɛ. 2Kɔpɔnɔ ɛ, kudɔbasɛ ní kunikpɛkpɛ ni awla kutrɔtrɔ banɔ aʋa su, kuyɔyɔ dɔni bekpo ʋa mɛ, ni kiliɛ gi Aya yɛ litsixwaxwa nɛ ɛ, ni yɛ litsi le kutsàtsaa kútrakyi i, su. 3Xe Aya aki blɔ kudeonu i, nite kwitrabitɛ.

4Límaɛ plɔplɔ si bedzini banama a, gi ba aŋu na ɛdra edi i, amanɔ si bekyi ɔna mɛ dzɛ, lɛ ese linu si beze ní Aya yɛ kuklekleo me edi, lɛ bɛzi lifunu ne bidɔkɔkɔ ʋɛ edi, lɛ bɛzi ba kapɛa ni Ɔfuɛfuɛ Dradra lɔ mɛ ɛ, 5lɛ bete kidɔ gbãɛ liɛ gi kilɛ ní Aya yɛ liboe le me e, ani kigaglaɛ liɛ gi kiaba gani Aya yɛ kaʋaŋaa lia a, gi kɛtraba mɛ ɛ, 6pɔ̀ xe bɛɛdzi kede ní ba kuziŋaa mɛ ɛ, límaɛ plɔplɔ si bedzini ba amanɔ si bekyi ɔna mɛ dzɛ, lɛ ese linu si bɛɛkla Aya Yebi ye ní ose lo su dzɛ, lɛ bɛɛkpɛ yɛ kakpaa ní ɔha kusi i.

7Aya yɛ izɛɛkrira kesea lia gi kizɛɛŋwɛ dzeni ye kuni yo o, gi kuzɛɛdɔ ɛbali ka aʋa a, xe kizɛɛyɛ bidɔ kpɛkpɛɛ ʋɛ ɛ, gi bilɛ veve ki banama a, gi ba loso bɛkpɛ ʋɛ ɛ. 8Pɔ̀ kesea gi kɛyɛ bibu ni siwa sɛ ɛ, kɔ kébu libi tɔtɔ, lɛ kalɛ ní kuxixa mɛ si Aya aaxo ifi kpɛ ka kɔ gɔgɔ ɛ, kifu biakpɛ ka.

9Pɔ̀ mɛ baʋia dimɛnɔ ba a, xe kwipani nite kyɛ ɛ, ní mlɔ kapɛa mɛ ɛ, kwite si eboe gbã gi aaki mlɔ kubúbú i, aagbani mlɔ kpɛ. 10Lɛ ese linu si Aya ɔlɛ ní yɛ kude gyɔgyɔɔ aʋa, lɛ ɔ́tradze axwɛ ana gi mlɛwa a, loo kiliɛ gi mlɛlɔ yɛ ɛ, gani kupɔnɔ liɔ gi mlɛkɔ ɔ, xe mlɛɛki baʋaziŋa ba a. 11Linu blɔ kupɛ́pɛ ʋidi si mlɔ mɛ ɔkakaa okeni odi nì litɔplɛplɛkese zɛɛkɔna ni lɛ ɔgù kɔ tɔ mlaamɔ kidiliɛ gi kɛ kudeonu mleedi i. 12Kúpɛ si mledzi basranɛ ɛ, boŋu i, mlakpasi banama gi bɛziŋa a, xe bɛplɛ litɔ kese e, tɔ biazɛ kidiliɛ gi kɛ Aya aka aplɛ ɛ.

Aya yɛ kakaplɛa kiaba ka mɛ

13Lipoe lɛ gi Aya aka aplɛ aki Abraham i, lɛ gi ɔnɔ dzedze ɔtɔtɔ ɔ́ma a, gi emu asani yɛ ɛ, gi yɛ linyi ne aakɔ̀ ka kitamu yɛ onu i, aka kitamu yɛ ní yɛ ɔtutɔ lɔ linyi ne me, 14lɛ apani si, “Maakrira wɔ kikakaa elue, lɛ maaki wɔ besoebi glegle.” 15Lɛ gi Abraham aplɛ litɔ kese e, xe epe Aya lipoe zizi i, Aya yɛ kakaplɛa kɛka yɛ awla.

16Xegi banima bɛka kitamu i, bizɛɛka kɛ ni linyi nɛ gi limu isani ba lini nɛ ɛ, kɔ kuboehe kakaa kwitsa ɛ.

17Lɛ ki banama gi biazɛ Aya yɛ kakaplɛa ɛ, Aya apɛ si yidra lɛ mɛ si yɛ ɔ́trakyi yɛ batrɔtrɔ ʋa liwewe e, lɛ loso aka kitamu yɛ apɔni yɛ kakaplɛ a. 18Aya abitɛ eboe taʋa la ya, gi atrátani kukyi i, lɛ ese linu si Aya ɔ́tratani asia kusɛ ɛ. Lɛ loso blɔ banɔaya gi kwise trɛ ní yɛ kɔ ɔ, si kuvu kudeonudidi uliɔ gi bɛkɔ ɛplɛ ní blɔ aŋu mɛ awla ɛ, liakpɛ ɔna ní blɔ lipo.

19Kudeonudidi uliɔ ya kulɛ ní blɔ awla gi kunu ŋwisi ɔxɔ ki blɔ agbã́ na a. Kulɛ mumɔ lɛ kulɛ gagla gi kuzɛɛtani lisɔligba lɛ mɛ kusaa mɛ kuga a, gi kwiatiku ní ɔdradra klɔ ke e. 20Niklɔ gi Yesu eku blɔ ɔtɔ atrɛ ní blɔ onu u, gi yɛ edzì kusɔliɔ Ɔka ʋidi ye ní Melxizedek yɛ ɔga nɔ onu kɔtsinɔ kanɔmɛ anɔmɛ.

Currently Selected:

Hebr 6: avn

Highlight

Compare

Copy