Hebr 7

Melxizedek Kusɔliɔ Ɔkaɛ

1Melxizedek liɛ ɛ, yɛ eze Salem#7:1 Salem ɔma nɔ lɔ ke bekyi linyi ne ekɔ si Yerusalem lipoe lɛ gi Okusi ye Dawid eze okusi ni Yudanɛ ma aʋa a. ɔma nɔ okusi ye ani Aya gi emu asani ɔnɔ kakaa ɛ, yɛ kusɔliɔ Ɔkaɛ, yɛ azɛɛtsani Abraham lipoe lɛ klɔ mɛ gi edzì adɔ ni kigũ yɛ ɛ, agi azɛɛŋa bekusi ba aʋa a, lɛ akrira yɛ ɛ. 2Lɛ Abraham akɔ bidɔ bɛ ya petee gi amɔ adɔ ni ní kigũ yɛ mɛ ɛ, bɛ kapɛ liɔfɔa aki yɛ. Melxizedek yɛ linyi ne ese ní ɔtɔpu kɔ ɛ, linu si “Okusi gi ɔlɛ ní kude gyɔgyɔ aʋa a”, Lɛ gi onu okusi ni Salɛm ɔma nɔ aʋa loso e, yɛ linyi ne ese kibubu dzedze kinu si “Kusuyɔ Okusi”. 3Lɛ báŋwlimi Melxizedek yɛka loo yene, loo yɛkatsitsi ɔtɔtɔ liboe aplɛ ɛ, lɛ kididɔ kíma ní yɛ kupɔpɔ loo kutse su u. Ɔlɛ ko ŋwisi Aya Yebi gi onu yɛ kusɔliɔ ɔka kɔtsinɔ kanɔmɛ anɔmɛ ɛ.

4Lɛ mledi ɔnɔ ʋidi liɛ elu gi Melxizedek eze e, blɔ ɔkatsitsi ye Abraham akɔ bidɔɛ mɛ gi amɔ adɔ ni kigũ yɛ ɛ, bɛ kapɛ liɔfɔa akɔ aki yɛ. 5Lɛ Lewi lipo le me bebia ba gi benu kusɔliɔ baka ba ɛ, ɔsã nɔ ɛɛki ba kude si bazɛ bidɔ mɔmɔ ʋɛ kapɛ liɔfɔa dɔni banima awla gi benu ba benemi i. Sro si ba kyɛ benu Abraham yɛ lipo me bebi xe e. 6Melxizedek ónu Levi yɛ lipo me obi i, pɔ̀ azɛ Abraham yɛ bidɔ mɛ kapɛ liɔfɔa a, lɛ akrira Abraham i, yɛ ɔniliɛ gi Aya aka aplɛ akɔ ɛ. 7Lɛ mɛ lidra si ɔniliɛ gi izɛɛkrira ɛ, ekeme asani ɔniliɛ gi bɛɛkrira ɛ. 8Ní kapɛ tiele me e, bidɔ mɛ kapɛ liɔfɔa ɛ, banama gi bizɛɛzi bɛ fɛ ɛ, betse. Pɔ̀ ní Melxizedek kapɛa mɛ ɛ, ɔniliɛ gi ɔlɛ ligbã́ nɛ kɔtsinɔ ɛ, yɛ azɛ bɛ. 9Lɛ loso biatani kupani si; gi Abraham atsa bidɔ mɛ kapɛ liɔfɔa ɛ, Lewi gi yɛ izɛɛzi kapɛ liɔfɔa ɛ, yɛ fɛ atsa bɛ gani Abraham aʋa a. 10lɛ ese linu si gi bápɔ Lewi kyɛ ɛ, eze ní Abraham yɛ lipo le me lipoe lɛ gi Abraham ni Melxizedek bɛtsa ɛ.

11Lewi yɛ lipo me bebi ba ba kusumu yo kuka ŋaŋaa kɔ onu bɛki ɔsã nɔ. Lɛ xegi nya Lewianɛ ma ba kusumu yo kuka ŋaŋaa kwina ɛ, nya lítrazia si kusumu yo ɔka dzedze ɔŋwi i, gi onu kusumu yo Ɔka ʋidi ní Melxizedek yɛ ɔga nɔ onu u, lɛ ani Aron yɛ lipo me bebi ba ɔni nɔ onu u. 12Lɛ ese linu si xegi bɛtsrɛ kusumu yo kuka ŋaŋaa ɛ, kɔ lilɛ si batsrɛ ɔsã nɔ fɛ. 13Lɛ ɔniliɛ gi yɛ su bɛpani liboe lɛ ya ɛ, ádɔ ní limade dzedze me, lɛ ɔnɔnɔ ɔ́dɔ limade lɛ ya mɛ ɔ́ŋa kusumu yo Ɔka ní ɔdɔpɔʋisuʋɔ lɔ aʋa oʋídi i. 14Lɛ ese linu si kwite le mɔmɔmɔ si bɛpɔ blɔ Ɔkaɛ ní Yuda limade ne me e, lɛ Mose ɔ́xwa limade lɛ ya linyi lipoe lɛ gi azaapani ní kusumu yo baka ba su u.

Yesu onu kusumu yo Ɔka dzedze ŋwisi Melxizedek kiniɛ

15Lɛ liboe lɛ gi kwipani i, lɛ mɛ liadra ɛsanɔ; kusumu yo Ɔka dzedze aŋwi gi ɔlɛ ŋwisi Melxizedek kinɛ ɛ. 16Onu kusumu yo Ɔka aní gani ɔsã ní ɔnɔ kigyɔgyɔɛ mɛ onu, pɔ̀ gani Ligbã́ nɛ kigagla a, gi bátratani kuzizi me e. 17Lɛ ese linu si bɛpani lɛ wee si,

“Wonu kusumu yo Ɔka kɔtsinɔ kanɔmɛ anɔmɛ ní Melxizedek ɔga nɔ onu.”

18Lɛ loso bɛyurɔ ɔsã koko lo eplɛ kapɛ agi kigagla kíma ní lɔ su u, xe oʋíbu libiitɔtɔ loso o. 19Lɛ ese linu si ɔsã nɔ ɔ́tani kididɔ kubitɛ si kina a, pɔ̀ abla ɛ, bɛki blɔ kudeonudidi gi kwipɛ sanɔ ɔ, gi gani kɔ aʋa ɛ, kwitipɔni Aya.

20Kɔpɔnɔ ɛ, Aya yɛ kitamu yɛ kyɛ kilɛ. Kitamu kiliɛ kíze lipoe lɛ klɔ gi bedu banɔdzedze ba kusumu yo baka a. 21Pɔ̀ Yesu kɔ edzì kusumu yo Ɔka gi

Aya aka kitamu si,

“Aya aka aplɛ lɛ ɔ́trakyi yɛ begyodi ʋa a:

‘Wonu kusumu yo Ɔka kɔtsinɔ kanɔmɛ anɔmɛ.’ ”

22Kɔkpɛ kitamu kiliɛ ya loso e, Yesu edzì ɔniliɛ gi ɔlɛɛ kede ɔki blɔ ní kunyanya a, gi kwipɛ sanɔ mɛ ɛ.

23Abla ɛ, Kusumu yo baka báklɔ ba bɛsrɛ lɛ ese linu si betse lɛ batrátani ba axwɛ na aʋa kutrɛ tɔ ɔ. 24Pɔ̀ gi Yesu kɔ ɔlɛ ligbã́ kɔtsinɔ kanɔmɛ anɔmɛ ɛ, yɛ kusumu yo ɔka kuzeze e, kútratrɛ ní ɔnɔ dzedze ɔtɔtɔ kɔ ɔ. 25Lɛ loso aatani kuzɛ lipoe kakaa ɔki banama gi bɛga yɛ aʋa a, xe bɛba Aya klɔ ɔ, lɛ ese linu si ɔlɛ ligbã lipoe kakaa gi aazi ba onu ní Aya aŋu mɛ ɛ.

26Kusumu yo Ɔka ʋidi ŋwisi Yesu i, yɛ aatani blɔ baziazia ʋa aʋa kubitɛ ɔki blɔ. Yɛ su ɛɛdra, kesetataa tɔtɔ káma ní yɛ su u, lɛ eboe zimizi áma ní yɛ su u; bebu ye lidze ní banɔ zimizi ba su, lɛ bemuni ye gi emu asani lifunu ne e. 27Ɔ́ma ŋwisi kusumu yo baka ʋidi dzedze ba a, gi liziã si bapɔʋi bidɔ aki Aya liwe kakaa ki ba tutɔ ba eboe zimizi na kpɛ ɔtɔ ɔ, xe ableke biapɔʋi bidɔ ɔki Aya ni banɔ dzedze ba onu u. Aki yɛ bidɔ pɔʋi pɔʋi ʋɛ tule ní banima petee litukpo gi akɔ isu ya akɔ ɛ. 28Ɔsã nɔ izɛɛkɔ banama gi bána ɛ, du si beze kusumu yo baka a. Pɔ̀ Aya yɛ kakaplɛa a, gi aka aplɛ ni kitamu i, xe kiba ní ɔsã nɔ kede e, yɛ akya Yebi ye gi abitɛ si obloni yɛ axwɛ na a kɔtsinɔ kanɔmɛ anɔmɛ.

Currently Selected:

Hebr 7: avn

Highlight

Compare

Copy