Hebr 11

Kidiliɛ gi Kuziŋaa kunu i

1Abla ɛ, kuziŋaa kunu likla trɔtrɔ ní kidiliɛ gi kɛ kudeonu kwidi aʋa a, ani kukaka ni kidiliɛ gi kuʋímɔ ɛ aʋa. 2Lɛ ese linu si gani kuziŋa mɛ kanaa mɛ banima bɛzi kukpɔ̀kpɔ̀.

3Gani kuziŋa mɛ kwinu lɛ mɛ si Aya abitɛ kelea gani yɛ liboe panipani mɛ ɛ, gi lɛ loso o Aya abitɛ kidiliɛ gi kwimɔ ɛ dɔni kidiliɛ gi baʋímɔ ɛ mɛ.

4Gani kuziŋa mɛ Abel aki Aya bidɔpɔʋipɔʋi gi bipɛ sani Kain binɛ ʋɛ ɛ. Gani yɛ kuziŋaa mɛ ɛ, Aya akpɔ yɛ ŋwisi ɔnɔ gi yɛ bede ʋa bɛgyɔ ɔ, gi Aya akpɔ yɛ bidɔkɔkɔ ʋɛ ɛ. Gani yɛ kuziŋaa mɛ ɛ, Abɛl ɛɛpani omono gi etse kyɛ ɛ.

5Gani kuziŋa mɛ Aya efeke Henox asɛ nɔ gi ótse e, xe bámɔ yɛ tɔ ɔ, lɛ ese linu si Aya efeke ye asɛ nɔ. Kpɛ ɔtɔ kí lipoe lɛ gi biafeke Henox sɛnɔ ɛ, Aya akpɔ yɛ si onu ɔnɔ gi eku Ye aŋu u. 6Ɔnɔnɔ ɔ́tratani Aya aŋu kuku xegi kuziŋa kúma ní lɛ mɛ ɛ, lɛ se linu si ɔnɔ kakaa gi aaba Aya kɔ ɛ, lilɛ si ɔniliɛ klɔ ɔzɛ lɛ aʋa ŋa si Aya ɔlɛ, lɛ izɛɛtsa liʋɛ ɛki banama gi bɛpɛ́ yɛ veve e.

7Gani kuziŋa mɛ Noa gi Aya agba yɛ mɔmɔmɔ ní kidiliɛ gi kiʋíba kɛ mɛ sukɔ su i, enu kutu aki Aya lɛ awa onitsahu lo gi lɔ mɛ yɛ ni yɛ kepea petee bɛwɔ ligbã nɛ ɛ. Gani yɛ kuziŋaa mɛ ebu kelea petee lipɔ, lɛ Noa edzì ɔniliɛ gi gani yɛ kuziŋa mɛ ɛ, azɛ kaŋase ŋwisi ɔnɔ gi yɛ bede ʋa bɛgyɔ kinɛ ɛ.

8Gani kuziŋa mɛ Abraham enu kutu, lipoe lɛ gi Aya axwa yɛ ɛ, xe asi yɛ si, ɔsɛ tɔ ɔtrɛ ní kese dzedze e, gi kenu kaŋase e, gi Aya aka aplɛ si yɛ akɔ ki yɛ aʋa a. Asɛ lɛ atrɛ niklɔ gi óte e. 9Gani kuziŋa mɛ eze ŋwisi ɔbaba kinɛ ɛ, ní kesea lia klɔ gi Aya aka aplɛ aki yɛ aʋa a. Eze ní basa akpandɔ mɛ, nite ke Isak ni Yakob gi ba kyɛ biaŋa kaŋasea lia klɔ ɔ, gi ka Aya aka aplɛ ɛ, beze. 10Lɛ ese linu si Abraham azeedi kudeonu aki ɔmaa lɔ klɔ su gi Aya ekyi awla a, xe atsà a, ɔma gi lɔ ɔxɔ lɔ ɔ́trakyi liwewe e.

11Gani kuziŋa mɛ Abraham edzì obika gi nya yɛ Abraham etsi i, xe yedze Sara kyɛ eze okonɔ xe e, lɛ ese linu si ebù ɔniliɛ gi aka aplɛ aki yɛ si aabitɛ ní yɛ kakaplɛa aʋa a. 12Gi etsi i, xe ɔlɛ ní kutsede onu kyɛ ɛ, dɔnɔ ní ɔnɔ tole liɛ ya mɛ bebi gi bɛsrɛ ɛ, ŋwisi badzidziebi ʋa ní liwɔ lɛ mɛ ɛ, xe ba kiklakla mɛ kisrɛ ɛ, ŋwisi siklami sɛ ní axuta la a, gi batrátani kukla ɛ, mɛ bɛdɔ.

13Banɔ ba ya petee pɔ́ beze ní ba kuziŋaa aʋa a, xe betse e, gi ba ɔwla ɔ́ka kidiliɛ ɛ, gi Aya aka aplɛ ɛ. Pɔ̀ bɛmɔ ʋɛ dɔni ɔgblamadza kɔ, lɛ bɛkpɛ ʋɛ wolaa ɛdɔni ɔdzage no, lɛ bedra lɛ mɛ si benu bababa ni bedega ní kesea lia ya aʋa a. 14Lɛ banama gi bizɛɛpani eboa la ya elu i, bɛdra lɛ mɛ si bɛɛpɛ ba tutɔ ba kese. 15Baʋíbù kesea lia klɔ mɛ gi bedo ɛdɔ ɛ su, xe aní nite e, nya bemɔ kudeonu si biadzitrɛ ní niklɔ ɔ. 16Boŋu i, bɛɛpɛ kese gi kɛpɛ sanɔ ɛ, gi kenu lifunu ne kanɛ ɛ. Lɛ líku Aya kuye si baxwa yɛ si ba Aya a, lɛ ese linu si abla ɔma ʋidi aplɛ aki ba.

17Gani kuziŋa mɛ ɛ, Abraham akɔ Isak akyɛ ŋwisi bidɔpɔʋipɔʋi kí Aya kinɛ ɛ, gi Aya efeke ye edi i. Yɛ ɔniliɛ klɔ gi yɛ bɛka ɛplɛ kɔ ɛ, akɔ yebinyime tolee akyɛ ŋwisi bidɔpɔʋipɔʋi kinɛ ɛ, 18gi Aya asi yɛ si, “Gani Isak aʋa wɔamɔ wɔ besoebi ba a, xe wɔ linyi ne litrálila a.” 19Lɛ ese linu si akpɛ lɛ lixaŋu si, xegi Isak etse kyɛ ɛ, kigagla kilɛ ní Aya awla si, aayɔni Isak dɔni bekpo ʋa mɛ; lɛ ní anukwarɛɛ mɛ ɛ, kwiapani si Abraham anya azɛ Isak dɔni bekpo ʋa mɛ ɛ.

20Gani kuziŋaa mɛ ɛ, Isak aka kukrira aplɛ aki Yakob ni Esau ní ɔtɔ nɔ ewe la mɛ ɛ.

21Gani kuziŋaa mɛ ɛ Yakob, gi etsi xe atrátse e, akrira Yosef yɛ bebinyime tiaʋa ba gi aziɔni yɛ osevugavuga lɔ ɔ, xe esumu Aya a. 22Ní kuziŋa mɛ, lipoɛ lɛ gi Yosef ihatse e, apani ní Israel bebi ba kudodoo ní Egipte kesea mɛ su u, xe akpɛ ɔsã ní kiliɛ gi biagani yɛ axwa la su u.

23Kuziŋaa, kwikɔ si gi bɛpɔ Mose e, yɛ bapɔnɛ ba bekpo ye badzidzi tiata. Lɛ ese linu si bɛmɔ si, ónu obi ko,#11:23 Ni Yudanɛ ma kusi i, obi gi eyi kuyasɔ loo kudisa ɛ, bizɛɛmɔ yɛ si onu obi gi Aya akrira ní bedeatɔ onu u. 1 Samuel 9:2, Luke 1: 80 lɛ bése okusi ye yɛ ɔsã nɔ ɔ.

24Gani kuziŋaa mɛ Mose gi etsi i, ɔ́dimɛ si baxwa yɛ si Farao yebidzɛɛ Yebi tɔ ɔ; 25Lɛ loso akya si yɛ, yɛ amɔ ɔziã pɔni Aya yɛ banima sani si tɔ yimɔ isami lipoe kpekpemi itɔ ni eboe zimizi. 26Akpɛ lɛ lixaŋu si tɔ yimɔ kuye ní Kristo loso e, biŋa kedzi isani Egipteanɛ ma exo la. Lɛ ese linu si eedi kudeonu ki yɛ liʋɛtsatsa lɛ ní ɔtɔ nɔ mɛ ɛ. 27Gani kuziŋaa mɛ asɛ ní Egipte gi óse Egipteanɛ ma okusi ye yɛ kusuyeʋio o. Lize ŋwisi amɔ Aya gi baʋímɔ ɛ, lɛ loso ódi kede e. 28Gani kuziŋa mɛ, edu kutseo lidɔzawe le, xe befuflu ika lɛ ní ipupo le su u, gi lɛ loso kutseo ɔxwɛdzɛɛ óye Israel bebi ba ba bebinyime tɔpu ba a.

29Gani kuziŋa mɛ banima bɛga Axu kyikyi na mɛ ɛza ŋwisi kese kpaakpa aʋa kinɛ ɛ, lɛ gi Egipteanɛ ma fɛ bekeni edi si bɛɛbitɛ nite e, kuni yo kwivu ba. 30Gani kuziŋa mɛ Yerixo egli la ɛkpɔtɔ eku gi banima bɛga ɛklani la ewe tegloele e.

31Gani kuziŋa mɛ béye Raxab ɔwawadzee gi ápɔni banama gi bénu kutu aki Aya a, lɛ ese linu si yɛ azɛ Israel bebi beboesega ba ni iwla tiʋa a.

32Lɛ liboe woli maapani dzɛ ɛ? Lɛ ese linu si lipoe le lisrɛ ɛki mɛ tɔɔ si mipani ní Gideon, Barak, Simson, Yefta, Dawid, Samuel ani beboedoplɛ ba su u; 33Gani kuziŋa mɛ ɛ, bɛta bigu xe bɛŋa bekusi ba aʋa a. Bɛxwa etsi gyɔgyɔ ɛki banama gi ba linɛ ligyɔ ɛ, lɛ loso bɛzɛ kidiliɛ gi Aya aka aplɛ ɛ. Bɛkpɛ gyata ʋa inugu le bibɔ ʋɛ, 34beni bifu gagla ʋɛ, lɛ bedo ní banama gi bɛpɛ si beye ba ni ihɛɛ gblamadza ʋa iwla mɛ ɛ. Béze gagla pɔ̀ kigagla kiku ba mɛ, lɛ bedzi baguta ʋidi gi bɛŋa kùse dzedze baguta ba aʋa a. 35Badzɛ ba bɛzɛ ba baŋanɛa ba gi betse e, xe bedzini ba ɛyɔnɔ ɛ.

Banɔ dzedze fɛ gi bezee bu kini ikɔ ɔ, pɔ̀ xe badimɛ si bayurɔ ba a, lɛ loso betse ní kinie me, pɔ̀ bɛbitɛ nite tɔ biayɔ dzi ligbã́ gi lipɛ sanɔ ɔ. 36Batɔ fɛ bɛkpɛ ba kakpaa lɛ bekusi ba a, lɛ batɔ fɛ ɛ, bɛkpɛ ba bibɔ lɛ bɛgbani ba ɛtsinɔ ɛzɛkpɛ ligba a. 37Bɛsa ba akla, bɛlɛ ba ní kupɛ tuʋa mɛ, beye ba nì ihɛ gblamadza ʋa, bɛzɛga ɛklanɔ ní bamu ʋa ni iʋesi le kugaplekpaa mɛ, lɛ banima bezeebu kini ikí ba, lɛ bɛzɛɛwa ba nyɔnyɔɛ ɔkpɛ gi kididɔ kíze ní ba awla loso o, 38kelea mɛ kádɔ aki ba! Lɛ bɛzɛga ɛklanɔ ní ɔyaya klɔ ni kutokpaa aʋa a. Lɛ ipɛgla nɛ mɛ, ni ezokpo la mɛ eze ba izeklɔ ɔ.

39Lɛ banɔ ba ya petee bɛzɛ kukpɔ̀kpɔ̀ ɔkpɛ ba kuziŋaa, pɔ̀ kyɛ ɛ, bázɛ kidiliɛ gi kɛ Aya aka aplɛ ɛ. 40Lɛ ese linu si Aya abitɛ kutrɔtrɔ gbã aki blɔ. Yɛ kutrɔtrɔ kunu si blɔ kwiapɔni ba xe ableke biana a.

Currently Selected:

Hebr 11: avn

Highlight

Compare

Copy