Popular Bible Verses from Hebr 11

Share

Abla ɛ, kuziŋaa kunu likla trɔtrɔ ní kidiliɛ gi kɛ kudeonu kwidi aʋa a, ani kukaka ni kidiliɛ gi kuʋímɔ ɛ aʋa. Lɛ ese linu si gani kuziŋa mɛ kanaa mɛ banima bɛzi kukpɔ̀kpɔ̀.

Ɔnɔnɔ ɔ́tratani Aya aŋu kuku xegi kuziŋa kúma ní lɛ mɛ ɛ, lɛ se linu si ɔnɔ kakaa gi aaba Aya kɔ ɛ, lilɛ si ɔniliɛ klɔ ɔzɛ lɛ aʋa ŋa si Aya ɔlɛ, lɛ izɛɛtsa liʋɛ ɛki banama gi bɛpɛ́ yɛ veve e.

Gani kuziŋa mɛ kwinu lɛ mɛ si Aya abitɛ kelea gani yɛ liboe panipani mɛ ɛ, gi lɛ loso o Aya abitɛ kidiliɛ gi kwimɔ ɛ dɔni kidiliɛ gi baʋímɔ ɛ mɛ.

Gani kuziŋa mɛ Abraham enu kutu, lipoe lɛ gi Aya axwa yɛ ɛ, xe asi yɛ si, ɔsɛ tɔ ɔtrɛ ní kese dzedze e, gi kenu kaŋase e, gi Aya aka aplɛ si yɛ akɔ ki yɛ aʋa a. Asɛ lɛ atrɛ niklɔ gi óte e. Gani kuziŋa mɛ eze ŋwisi ɔbaba kinɛ ɛ, ní kesea lia klɔ gi Aya aka aplɛ aki yɛ aʋa a. Eze ní basa akpandɔ mɛ, nite ke Isak ni Yakob gi ba kyɛ biaŋa kaŋasea lia klɔ ɔ, gi ka Aya aka aplɛ ɛ, beze.

Gani kuziŋa mɛ Noa gi Aya agba yɛ mɔmɔmɔ ní kidiliɛ gi kiʋíba kɛ mɛ sukɔ su i, enu kutu aki Aya lɛ awa onitsahu lo gi lɔ mɛ yɛ ni yɛ kepea petee bɛwɔ ligbã nɛ ɛ. Gani yɛ kuziŋaa mɛ ebu kelea petee lipɔ, lɛ Noa edzì ɔniliɛ gi gani yɛ kuziŋa mɛ ɛ, azɛ kaŋase ŋwisi ɔnɔ gi yɛ bede ʋa bɛgyɔ kinɛ ɛ.

Gani kuziŋa mɛ Aya efeke Henox asɛ nɔ gi ótse e, xe bámɔ yɛ tɔ ɔ, lɛ ese linu si Aya efeke ye asɛ nɔ. Kpɛ ɔtɔ kí lipoe lɛ gi biafeke Henox sɛnɔ ɛ, Aya akpɔ yɛ si onu ɔnɔ gi eku Ye aŋu u.

Gani kuziŋa mɛ Abel aki Aya bidɔpɔʋipɔʋi gi bipɛ sani Kain binɛ ʋɛ ɛ. Gani yɛ kuziŋaa mɛ ɛ, Aya akpɔ yɛ ŋwisi ɔnɔ gi yɛ bede ʋa bɛgyɔ ɔ, gi Aya akpɔ yɛ bidɔkɔkɔ ʋɛ ɛ. Gani yɛ kuziŋaa mɛ ɛ, Abɛl ɛɛpani omono gi etse kyɛ ɛ.

Gani kuziŋa mɛ Abraham edzì obika gi nya yɛ Abraham etsi i, xe yedze Sara kyɛ eze okonɔ xe e, lɛ ese linu si ebù ɔniliɛ gi aka aplɛ aki yɛ si aabitɛ ní yɛ kakaplɛa aʋa a.

Lɛ ese linu si Abraham azeedi kudeonu aki ɔmaa lɔ klɔ su gi Aya ekyi awla a, xe atsà a, ɔma gi lɔ ɔxɔ lɔ ɔ́trakyi liwewe e.

Gani kuziŋaa mɛ Mose gi etsi i, ɔ́dimɛ si baxwa yɛ si Farao yebidzɛɛ Yebi tɔ ɔ; Lɛ loso akya si yɛ, yɛ amɔ ɔziã pɔni Aya yɛ banima sani si tɔ yimɔ isami lipoe kpekpemi itɔ ni eboe zimizi. Akpɛ lɛ lixaŋu si tɔ yimɔ kuye ní Kristo loso e, biŋa kedzi isani Egipteanɛ ma exo la. Lɛ ese linu si eedi kudeonu ki yɛ liʋɛtsatsa lɛ ní ɔtɔ nɔ mɛ ɛ. Gani kuziŋaa mɛ asɛ ní Egipte gi óse Egipteanɛ ma okusi ye yɛ kusuyeʋio o. Lize ŋwisi amɔ Aya gi baʋímɔ ɛ, lɛ loso ódi kede e.

Gani kuziŋa mɛ ɛ, Abraham akɔ Isak akyɛ ŋwisi bidɔpɔʋipɔʋi kí Aya kinɛ ɛ, gi Aya efeke ye edi i. Yɛ ɔniliɛ klɔ gi yɛ bɛka ɛplɛ kɔ ɛ, akɔ yebinyime tolee akyɛ ŋwisi bidɔpɔʋipɔʋi kinɛ ɛ

Gani kuziŋa mɛ béye Raxab ɔwawadzee gi ápɔni banama gi bénu kutu aki Aya a, lɛ ese linu si yɛ azɛ Israel bebi beboesega ba ni iwla tiʋa a.

Gani kuziŋa mɛ banima bɛga Axu kyikyi na mɛ ɛza ŋwisi kese kpaakpa aʋa kinɛ ɛ, lɛ gi Egipteanɛ ma fɛ bekeni edi si bɛɛbitɛ nite e, kuni yo kwivu ba.

Gani kuziŋa mɛ Yerixo egli la ɛkpɔtɔ eku gi banima bɛga ɛklani la ewe tegloele e.

Gani kuziŋa mɛ, edu kutseo lidɔzawe le, xe befuflu ika lɛ ní ipupo le su u, gi lɛ loso kutseo ɔxwɛdzɛɛ óye Israel bebi ba ba bebinyime tɔpu ba a.

Ní kuziŋa mɛ, lipoɛ lɛ gi Yosef ihatse e, apani ní Israel bebi ba kudodoo ní Egipte kesea mɛ su u, xe akpɛ ɔsã ní kiliɛ gi biagani yɛ axwa la su u.

Gani kuziŋaa mɛ ɛ Yakob, gi etsi xe atrátse e, akrira Yosef yɛ bebinyime tiaʋa ba gi aziɔni yɛ osevugavuga lɔ ɔ, xe esumu Aya a.

Gani kuziŋaa mɛ ɛ, Isak aka kukrira aplɛ aki Yakob ni Esau ní ɔtɔ nɔ ewe la mɛ ɛ.