Galatia 5

Kwimɔ ɔwla xegi kulɛ ní Kristo me

1Kristo akí blɔ isuwla mɛ kuzeze! atɔ kwiamɔ ɔwla. Mlalɛ ŋwisi banɔ gi balɛ ní ɔwlamɔmɔ mɛ kinɛ ɛ, tɔ mlakíyurɔ mlɔ isu ya tɔ mlaadzi banɔdzidzi tɔ ɔ.

2Mlata kutu! Mɛ Paulo mɛɛsi mlɔ si xe mlɛɛyurɔ isu ya si batsà ɔyaʋi aki mlɔ ɛ, kɔ libasɛ si Kristo ónu kididɔ ki mlɔ kura. 3Kɔpɔnɔ ɛ mɛɛsi ɔnɔ kakaa gi ayurɔ isu ya si batsà ɔyaʋi aki yɛ ɛ, si lilɛ si ɔbitɛ ní Ɔsã nɔ petee aʋa. 4Mlɔ banama gi mlekeni idi si mlɔ bede ʋa biagyɔ ni Aya aŋu mɛ gani Ɔsã nɔ mɛ ɛ, mleebu lidze ní Kristo su. Lɛ Aya yɛ lipomepɛpɛ nɛ liadɔ mlɔ ɔza a. 5Blɔ kɔ ɛ, gani blɔ kuziŋaa mɛ ɛ, kwidi kudeonu si blɔ bede ʋa biagyɔ gani Ɔfuɛfuɛ nɔ lɔ kigaglaɛ mɛ ɛ. 6Lɛ xe kulɛ ní likpɔkpɛkpɛ mɛ ni Yesu Kristo e, ɔyaʋi kutsatsa loo kumɔtsamɔtsa ɛ, kútramani lidzegaga ɛtɔtɔ; lɛ klɔ gi liziã ko linu kuziŋaa, gi kwibasɛ kiliɛ gi kwialɔ blɔ ahanuglɔ ba a.

7Mlezekeni idi ní mlɔ kuziŋaa mɛ ɛ xe e! Nyaŋwɛ akɔ xe mlɛmɔni kutu kunu ki anukwarɛɛ? 8Aní ɔniliɛ gi axwa mlɔ ɛ yɛ alìɔʋi mlɔ. 9“Kuɖeme sisami ɔtɔ ko bizɛɛkɔ ɛpɔni kunɔɔ xe kɔ petee kuzeeho o.” 10Pɔ̀ mazi lɛ aʋa aŋa gani Ɔkaɛ mɛ si mlatráta ɔnɔ dzedze ɔtɔtɔ kutu u. Lɛ ɔniliɛ klɔ ɔ, gi yɛ ɛɛpisa mlɔ ɛ, kitɛ kitɛ ɔlɛ fɛ ɛ, Aya aahe kutu ɔki yɛ.

11Pɔ̀ mɛ benemi ba a, xegi mɛɛsɔli si ɔyaʋi tsatsa ɛzia ɛ, ege lɛ loso bɛɛyɔ kedu ní mɛ su i? Xe línu anukwarɛɛ ɛ, kɔlɔ mɛ kusɔliɔ si Kristo etse ni ose lo su i, líma si kumani eboe hehe e. 12Maapɛ si banama gi beehe eboe ni mlo e, batrɛ lɛ aʋa petee; tɔ bebu isu ya agùaza ɛ.

13Mlɔ mɛ benemi ba a, bɛxwa mlɔ tɔ mleze isuwla mɛ banɔ. Pɔ̀ mlakíki si mlɔ ɔwlamɔmɔɔ nɔ ya ɛ, odzi eboe zimizi kubitɛ tɔ mlɔ bapɛ́pɛ ʋa baŋa mlɔ aʋa a. Boŋu i, mlaki tɔ kulɔlɔ kuki tɔ mlesumu mlɔ ahanuglɔ ba. 14Lɛ Ɔsã zizi nɔ pɔ ɛ, bɛnya nɔ likpɔ tile si; “Lɔ wɔ ɔhanuglɔɛ kiliɛ gi wɔ lɔ wɔ ɔtutɔ wɔ isu ya ɛ.” 15Pɔ̀ xe mlɛɛnemi i, xe mlɛtà mlɔ ahanuglɔ ba ŋwisi baŋuga kinɛ ɛ, xe mlɛkpɛ mlɔ ahanuglɔ ba ebi i, xe mlɛkpɛ ba kusuyeʋio e, kɔlɔ mlevu aŋu xe aníte e, mlaazizi mlɔ ahanuglɔ ba.

Mlaki tɔ kuze ligbã́ ní Ɔfuɛfuɛ nɔ kigaglaɛ mɛ

16Mɛɛpani si; mlaki tɔ Aya yɛ Ɔfuɛfuɛ nɔ ɔgbani mlɔ ligbã́ nɛ, atɔ mlakíki tɔ mlɔ isu ya mɛ bapɛ́pɛ zimizi ʋa baŋa mlɔ aʋa a. 17Lɛ kidiliɛ gi blɔ kisugyaɛ kiipɛ ɛ, kiyɔ kedu ní Aya yɛ Ɔfuɛfuɛ nɔ kupɛ́pɛɔ su, lɛ kidiliɛ gi Aya yɛ Ɔfuɛfuɛ nɔ ɛɛpɛ ɛ, kiyɔ kedu ní kisugyaɛ kɛ kupɛ́pɛɔ su. Bɛ tuʋa ɛ binu ahwafianɛ aki bɛ ahanuglɔ ʋa, lɛ libasɛ si wɔtratani kidiliɛ gi wɔ ɛ pɛ́ ɛ, kubitɛ. 18Xe Aya yɛ Ɔfuɛfuɛ nɔ ɛɛgbani mlɔ ɛ, kɔlɔ mláma ni Ɔsã nɔ ese e.

19Kidiliɛ gi kisugyaɛ kizɛbitɛ ɛ, kizɛbasɛ isu ya wee. Lɛ bɛ binu ádzɛ ni enyimeboe, anyaniboe, ni akpɛ̃boe; 20ni kubúbitɛ, ani adzee, ofu kutrɔtrɔ, avitɛ; kìfu kugɔni, kusuyeʋi gagla, lipɛ ki mɛ tole, baglɔ ese kumonumonu, ni kulɛlɛ; 21kaŋuza, kuda mumu, ehwiboe ani edzedze la ŋwisi la ya elue e. Mledi mumɔ abla kiliɛ gi masi mlɔ edi i; si banama gi bizɛɛbitɛ eboa la ya elu i, bátraŋa Aya yɛ Kaʋaŋaa mɛ bidɔ ɔ.

22Pɔ̀ Aya yɛ Ɔfuɛfuɛ nɔ izɛɛki esebi ŋwisi, kunɔlɔ, isami, kusuyɔ, litɔplɛplɛkese kese, lipomepɛpɛ, bidɔ gbã, kuziŋa, 23kusububɔ, ani isu aʋa kuŋaŋa. Ɔsã ɔtɔtɔ ɔ́yɔ kedu ní bɛya su u. 24Lɛ banama gi benu Kristo Yesu banɛ ɛ, bɛkla bá bisugya ʋɛ ni kusuŋwasiɔ ni kɔ bapɛ́pɛ ʋa ní Kristo osetsase lo su. 25Aya yɛ Ɔfuɛfuɛ nɔ ɛki blɔ ligbã́ nɛ; lɔ kee linu si ɔgbani blɔ ligbã́ nɛ. 26Líma si kudɔ isu ya loo kufati blɔ ahanuglɔ ba loo kukɔ kaŋuza ní blɔ ahanuglɔ ba su.

Currently Selected:

Galatia 5: avn

Highlight

Compare

Copy