Galatia 4

1Abla ɛ, mɛɛpani si, xegi obi liɛ gi aaŋa yɛ ka bidɔ mɛ ɛ odzi onu obi i, lidzegaga ɛtɔtɔ líma ní yɛ nì ɔnɔdzidzi ye kusi i, ɔkpɛ gi oʋítsi loso o, xe kidɔ kakaa kinu yɛ kínɛ fɛ ɛ. 2Agi oʋítsi i, banima balɛ gi biadi ye aʋa a, lɛ biadi yɛ bidɔ mɛ kyɛ aʋa kɔzɛna ni lipoe lɛ klɔ gi yɛ ka atrɔ aplɛ ɛ. 3Niteme ké, gi blɔ fɛ kwize banuvɔ ɛ, kwize banɔdzidzi kí kalea lia mɛ ifuɛfuɛ nɛ gi iiŋa aʋa ɛ. 4Pɔ̀ gi lipoe gbã nɛ lina ɛ, Aya atsisi yɛ ɔtutɔ yebinyime e. Aba ŋwisi ɔnɔ Yebi gi ɔdzɛ apɔ ɛ, lɛ eze ní Yudanɛ ma Ɔsã nɔ ese e, 5atɔ aabu banama gi beze ní Ɔsã nɔ ese e, tɔ kwiazi blɔ ɔŋa klɔ ŋwisi blɔ Ɔkaɛ yɛ bebi kinɛ ɛ.

6Tɔ bibasɛ si mlenu yɛ bebi i, Aya atsisi Yebi ye yɛ Ɔfuɛfuɛ nɔ ní blɔ ìna nɛ mɛ, Ɔfuɛfuɛ ɔnɔ klɔ gi izɛɛkpɛ ozi si, “Kakaa,” mɔka. 7Lɛ loso e, wónu ɔnɔdzidzi tɔ ɔ, pɔ̀ obi i. Lɛ gi wonu yɛ obi i, Aya aaki wɔ kidɔ kakaa gi kilɛ ní yɛ awla kí yɛ bebi ba ɛ.

Paulo akɔ litɔ lɛ mɛ aki Galatianɛ ma

8Tsã́ gi mléte Aya ɛ, mleze banɔdzidzi ki babu ʋa a. 9Pɔ̀ abla gi mlete Aya a, loo, mipani si abla gi Aya ete mlo e, kítɛ xe mlɛɛpɛ si mleedzini isu ikpɛ ni ifuɛfuɛ nɛ awla gi kigagla kíma a, pɔ́ xe iŋa aʋa ɛ awla.? Ege lɛ loso mlɛpɛ si mleedzi banɔdzidzi ki lɛ dzɛ ɛ? 10Lɛ mlezeevu aŋu ní ewe veve la, badzidzi ʋa, epoe la ni agɔ la su mɔmɔɔmɔ. 11Likpɛ mɛ ɔna nɔ kunugu! Liibasɛ si mɛ axwɛ ana gi mawa akí mlɔ ɛ, edzì efiteete.

12Maki mlɔ litukpo, mɛ benemi ba, mleze ko ŋwisi kiliɛ gi malɛ ɛ. Kiliɛ gi mɛ fɛ malɛ ko ŋwisi mlɔ kinɛ ɛ. Aní kita mlɛta mɛ ese e. 13Mlaplɛ aŋu ní kidiliɛ gi kɛ loso o, masɔli liboe gbã nɛ aki mlɔ kutɔpu yɔ ɛ; lɛ ese linu si mɛ isu mɛ ízɛɛdra. 14Pɔ̀ gi mɛ ɔnɔse lo eze lidɔtu kí mlɔ fɛ ɛ, mládzi kede ní mɛ su loo yurɔ mɛ ɛ. Boŋu i, mlɛzi mɛ kiliɛ gi mlazi Aya yɛ ɔxwɛdzɛ dɔni lifunu ne kinɛ ɛ; ŋwisi kiliɛ gi mlaazi Kristo Yesu ɔtutɔ lɔ kinɛ ɛ.

15Isami iize ní mlɔ aʋa! Lɛ liboe woli liba ɛ? Mɛ ɔtutɔ maatani kupani si mlaapɛ si mlɛɛkpaʋi mlɔ bimbi ʋe tɔ mlɛkɔ ʋɛ ɛki mɛ ɛ, xe liaze plɔplɔ ɛ. 16Lɛ abla ɛ, kidzí medzi mlɔ ahwafiɔnɛ ɛ, gi masi mlɔ anukwarɛɛ loso na a?

17Banɔ dzedzea klɔ ba ɛ, ba bimbi bizã ní mlɔ su, pɔ̀ ba begyodi ʋa bápɛ ɛ. Ba kupɛ́pɛ ko kunu si tɔ bafili mlɔ ní blɔ su, atɔ mladimɛ nì ba ŋwisi kiliɛ gi bɛdimɛ ni mlɔ kinɛ ɛ. 18Abla ɛ, lipɛ si kupɛ́pɛ dzudzu uliɔ klɔ kuze, xe begyodi ʋa bɛ pɛ ɛ, lilɛ si lize nite lipoe kakaa, lɛ aní si xe malɛ ní mlɔ su ko o. 19Mɛ bebi ba gi malɔ ɔ! Abla dzɛ ɛ, ŋwisi one gi ɛɛpɔ ɛ, meenu kuyeʋiyeʋi uliɔ klɔ ɛki mlɔ kɔzɛna ni lipoe lɛ klɔ gi Kristo yɛ kizezee me kiazɛ mlɔ mɛ ɛ. 20Nya liku mɛ kule si mize ní mlɔ su abla, atɔ maabu ɔkli dzedze ní mlɔ su. Lɛ ese linu si mɛɛgani aŋu ní mlɔ su!

Hagar Ani Sara Ba liŋwitsɛɛ lɛ

21Mlakí tɔ miʋi mlo banama gi mlɛpɛ si mleeze ní Ɔsã nɔ ese e; Dani mleenu kiliɛ gi Ɔsã nɔ ɛɛpani na a? 22Ɛɛpani si bebinyime tiaʋa Abraham apɔ, tole ɔdzɛɛ ɔnɔdzidzi ye apɔ yɛ, lɛ ɔʋla ɛ, ɔdzɛɛ gi agbanɔ ní ɔkɔ lɔ onu i, yɛ apɔ yɛ. 23Yebinyime gi ɔdzɛɛ ɔnɔdzidzi ye apɔ akí yɛ ɛ, bɛpɔ yɛ ní kiliɛ gi banima bizɛɛpɔ̀ onu u, pɔ̀ yebinyime gi ɔdzɛɛ ɛ, gi agbanɔ ní ɔkɔ lɔ onu apɔ aki yɛ ɛ, bɛpɔ yɛ ní Aya yɛ kakaplɛa onu.

24Bíanu eboa la ya ʋa ese gani abee me; badzɛ tiaʋa ya ʋa ɛ, balɛɛ kí banyánya tiaʋa. Ɔniliɛ klɔ gi apɔ yɛ bebi ba ní kunɔdzi yo me e, yɛ onu Hagar, lɛ ɔlɛɛ kí kunyánya uliɔ klɔ gi bɛbitɛ ní Sinai Lito le aʋa ɛ. 25Hagar, gi ɔlɛɛ kí Sinai Lito le ní Arabia ɛ, yɛ onu abee kí omono Yerusalem ɔma ʋidi no gi lɔ mɛ banima pɔ́ balɛ ni kunɔdzi me e. 26Pɔ̀ lifunu ne Yerusalem yɛ kɔ ɛ, yɛ ɔlɛɛ ɔki ɔdzɛɛ gi bɛgbanɔ ní ɔkɔ lɔ onu u, lɛ yɛ onu blɔ one e. 27Lɛ Aya yɛ liboe le lipani si,

“Mɔ isami, wɔ ɔdzɛ gi bebi báma ní wɔ awla a!

wɔ́ gi woʋípɔ̀ oʋídi i,

kpɛ ɔdzi ni ole gagla,

wɔ gi woʋínu kuyeʋiyeʋi ní kubipɔ mɛ oʋidi i;

lɛ ese linu si ɔdzɛ liɛ gi yɛ tete ɔlɛ ɛ,

yɛ bebi ba bɛsrɛ sani ɔdzɛ liɛ gi

odi ní kenyime pe me e.”

28Abla ɛ, mlɔ mɛ benemi ba, ŋwisi Isak kinɛ ɛ, mledzi kakaplɛa ka bebi. 29Ní lipoe lɛ klɔ mɛ ɛ, obi ye gi bɛpɔ ní kelea mɛ kigyɔgyɔɛ onu i, aayɔ kedu ní obi liɛ klɔ gi bɛpɔ gani Aya yɛ Ɔfuɛfuɛ nɔ mɛ su u; lɛ nite lilɛ abla a. 30Pɔ̀ kitɛ Aya yɛ liboe le lipani i? Lipani si, “Kpɛ ɔdzɛ ɔnɔdzidzi ye ni Yebi ye kude tɔ basɛ; lɛ ese linu si ɔdzɛ ɔnɔdzidzi ye Yebi ye e, ɔ́tramɔ ɔŋakɔ ní yɛka bidɔ mɛ mɛ̀ ŋwisi ɔdzɛɛ gi bɛgbanɔ ní ɔkɔ lɔ onu u Yebi ye kinɛ ɛ.” 31Loso, mɛ benemi ba, kúnu ɔdzɛ ɔnɔdzidzi ye yɛ Yebi i, pɔ̀ kunu ɔdzɛɛ gi bɛgbanɔ ní ɔkɔ lɔ onu yɛ bebi i.

Currently Selected:

Galatia 4: avn

Highlight

Compare

Copy