Galatia 6
6
Mlapɔni mlɔ ahanuglɔ ba
1Mɛ benemi ba, xe ɔnutɔ adɔ eku ní eboe zimizi me e, mlɔ banama gi mlalɛ́ ní Aya yɛ Ɔfuɛfuɛ nɔ mɛ ɛ, mledzini yɛ alulɔ nì litɔ plɛplɛ kese, tɔ mlevu aŋu ni isu ya su, tɔ bakíkeni mlɔ kyɛ edi i. 2Mlapɔnɔ tɔ mletu mlɔ ahanuglɔ ba adɔtu la, gani lɛ mɛ ɛ, mlaaga ní Kristo yɛ Ɔsã nɔ aʋa a. 3Xe ɔnutɔ ebù isu ya si yenu ɔnɔ ní lípoe lɛ mɛ gi ónu ɔnɔnɔ ɛ, yɛ ɔtutɔ isu ya ko eemeno. 4Ɔnɔ kakaa ɔxwa litsi ni yɛ ɔtutɔ yɛ kizezee me. Xegi amɔ si kipɛ ɛ, kɔlɔ aatani isu kufeke ní yɛ kiboebitɛɛ aʋa, pɔ̀ ɔ́trakɔ kɛ ɛsrɔni kidiliɛ gi ɔnɔdzedze abitɛ ɛ. 5Lɛ linu si ɔnɔ kakaa otu yɛ ɔtutɔ yɛ lidɔtu le.
6Ɔniliɛ gi bɛɛbasɛ Aya yɛ liboe le e, ɔlɛ yɛ bidɔ gbã mɛ petee ni yɛ ɔdɔbasɛ yɛ.
7Mlekímeni isu u: ɔnɔnɔ ɔ́ʋikpɛ Aya kuga a. Lisebi ilɛ gi ɔnɔ akpɛ ɛ, lɛ aagu. 8Xe akpɛ bidɔ ní kisugyaɛ kulekuku me e, dɔni lɛ mɛ ɛ, aayasi kutse; lɛ xe akpɛ bidɔ ní Aya yɛ Ɔfuɛfuɛ nɔ mɛ ɛ, dɔni Ɔfuɛfuɛ nɔ mɛ ɛ, aayasi ligbã́ moblo le. 9Lɛ loso e, mlakíki tɔ eboe gbã kubitɛ kupe blo; lɛ xegi kúki litukpo e, lipoe le litrába gi kwiavini blɔ bidɔ kpɛ́kpɛ ʋɛ ɛ. 10Lɛ loso kiliɛ gi kwiamɔ lipoe le ko e, linu si kubitɛ bidɔ gbã kí ɔnɔ kakaa a, lilɛ gi lisa ɛveve e, kí banama gi balɛ ní kuziŋaa mɛ ni blɔ ɛ.
Kúgbagba Gɔgɔɔ ni Kunɔpaniɔ
11Mlevu aŋu ní kuŋwlimi ʋidi liɔ ya gi mɛɛŋwlimi iiki mlɔ abla ni mɛ ɔtutɔ mɛ ɔwla lɔ ɛ!
12Banama gi bizɛɛbitɛ aŋumɛboe la ɛ, ba bɛɛpɛ si bemi mlɔ aʋa tɔ mlatsa ɔyaʋi i. Bɛɛbitɛ lɛ nite, atɔ bakíyɔ kedu ní basu kɔkpɛ Kristo yɛ osetsase lo loso. 13Banɔ baklɔ kura gi bɛga ɔyaʋi tsatsa lɔ mɛ fɛ ɛ, baʋíga ní Mose Ɔsã nɔ aʋa a; bɛpɛ si mlaga ɔyaʋi tsatsa lɔ mɛ atɔ biafeke isu ya ní mlɔ kisugyaɛ aʋa a. 14Mɔkɔɛ, maadɔ isu ní blɔ Ɔkaɛ Yesu Kristo kutseo ní yɛ osetsase lo aʋa; lɛ ese linu si gani yɛ osetsase lo aʋa ɛ, lilɛ ko ŋwisi kelea mɛ ketse kí mɛ, lɛ mɛ fɛ metse aki kelea mɛ ɛ. 15Líma veve kura a, xe ɔnɔ aga ɔyaʋi tsatsa lɔ mɛ ɛ; kidiliɛ gi kilɛ veve e, kɛ kinu si tɔ odzi ɔnɔ vuvu. 16Banama gi bekuni batrɔtrɔ ba ya kude ní ba ligbã́ nɛ mɛ ɛ, atɔ kusuyɔ ni asigagadidi eze ni ba kude, ba ni Aya yɛ banima petee.
17Tɔ migu lɛ ɛ; ɔnɔnɔ ɔkikpɛ mɛ kunugu tɔ ɔ, lɛ ese linu si bebikpoa ʋa gi balɛ ní mɛ isu ya ɛ, bɛɛbasɛ si menu ɔnɔdzidzi akí Kristo.
18Mɛ benemi ba, atɔ blɔ Ɔkaɛ Yesu Kristo yɛ lipomepɛpɛ nɛ lize ni mlɔ Ɔfuɛfuɛ nɔ. Liba lɛ mɛ.
Currently Selected:
Galatia 6: avn
Highlight
Share
Compare
Copy
Want to have your highlights saved across all your devices? Sign up or sign in
© Ghana Institute of Linguistics, Literacy and Bible Translation, 2017 In cooperation with Wycliffe Bible Translators, Inc
