Efeso 6

Paulo agba Bebi ba ni ba Bapɔnɛ ba

1Banuvɔ ba, linu si mlenu mlɔ bapɔnɛ ba igbè tɔ mlebù ba, lɛ ese linu si lipɛ lɛ nite lilɛ si mlabitɛ ɛ. 2“Kpɛ kubùbù ní wɔka ni wone su” lɛ linu ɔsã tɔpu nɔ gi kakáplɛ kalɛ apɔni lɔ ɔ: 3“tɔ liadɔ ní lɛ aʋa ɛki wɔ, atɔ wɔaze ligbã́ gblamadza ní kesea aʋa.”

4Mlɔ bapɔnɛ ba, mlakíkpɛ mlɔ bebi ba kusuyeʋi i. Boŋu i, mlagani ba nì bagbágba ni kuhehe ní ɔsã onu kiliɛ gi Ɔkaɛ apɛ ɛ.

Banɔdzidzi ba ni ba Baka ba

5Mlɔ banɔdzidzi ba ɛ, mlenu kutu aki mlɔ kesea aʋa baka ba ni lifu ani kusugu; lɛ mlabitɛ lɛ ni mlɔ ɔna nɔ petee, ŋwisi Kristo yɛ mleesumu kinɛ ɛ. 6Mlakízɛɛbitɛ lɛ xegi bedi mlo ko o, lɛ ese linu si mlɛpɛ si mlɛɛmɔ kukpɔ̀kpɔɔ̀ ɛdɔni ba kɔ; boŋu i nì ɔna petee, mlabitɛ kidiliɛ gi Aya apɛ ɛ, lɛ ese linu si Kristo yɛ banɔdzidzi mlenu. 7Mlawa mlɔ axwɛ na ni isami, ŋwisi Ɔkaɛ mleesumu kinɛ ɛ, lɛ aní banɔ ko mleesumu u. 8Mlaplɛ aŋu si Ɔkaɛ aatsa liʋɛ ki ɔnɔ kakaa, ɔnɔdzidzi loo ɔnɔ gi ɔlɛ yɛ ɔtutɔ yɛ isuwla mɛ, ní axwɛ gbã na gi awa onu u.

9Baka ba, mlabitɛ niteme ke aki mlɔ banɔdzidzi ba, atɔ mlamɔni ba lifu ne kukpɛ. Mlaplɛ aŋu si mlɔ ni mlɔ banɔdzidzi ba ɛ, mlenu Ɔka tole ní lifunu ne yɛ banɔ, yɛ gi izɛɛxwa litsi ni ɔnɔ kakaa aŋu mɛ modi i.

Paulo asi Baʋaziŋa ba si Bakpɛ Ɔfuɛfuɛ nɔ mɛ Kigũ yɛ Awu la

10Tɔ migù mɛ liboe le e, ze kigagla ní Ɔkaɛ mɛ lɛ ese linu si yɛ kigaglaɛ ki srɛ ɛ. 11Kpɛ bidɔ mɛ petee gi Aya aki wɔ ŋwisi ɔguta awu gi izeekpo ye kinɛ ɛ, tɔ wɔatani kulɛɛ ní ozimizi ye edeke la onu. 12Lɛ ese linu si kuʋíta kigũ ni banɔ ɔ, pɔ̀ ni litukpo me gagla ifuɛfuɛ ní lifunu ne kelea mɛ ɛ, baʋaŋa ba, banama gi bedi izekɔ ni liwɔ lɛ mɛ ɛ, bigagla ʋɛ ní kele zimizia lia ya mɛ, ifuɛfuɛ zimizi nɛ gi ilɛ ní kelea lia litumu ne me e, ni ifuɛfuɛ zimizi ne ní lifunu ne. 13Lɛ loso kpɛ Aya yɛ kigũ yɛ awu ala petee gi aakpo wɔ ɔnɔse lo e, abla! Atɔ xe liwe zimizi ne lina ɛ, wɔatani ahwafiɔnɛɛ yɛ axwɛwawa la onu kulɛ ɛ, lɛ ní kigũ yɛ kede e, wɔatani kulɛ ní wɔ ɔlɛɛ klɔ ɔ.

14Lɛ loso e, bla tɔ lɛɛ, tɔ nya wɔ kasɛa mɛ ni anukwarɛɛ ŋwisi kasɛmɛ ɔnyagbe kinɛ ɛ, tɔ kɔ ligbã́ gi lɛ kude kwigyɔ ɛ, ŋwisi wɔ kakɔ mɛ liwu gi liakpo wɔ kakɔa mɛ kinɛ ɛ. 15Kpɛ kublabla ki kusuyɔɔ Liboe Gbã nɛ kupaniɔ ŋwisi wɔ afɔkpa ʋa kinɛ ɛ. 16Lɛ lipoe kakaa ɛ, vu wɔ kuziŋaa ŋwisi bidɔ gi wɔakɔ nì asia na itrɛɛ nɛ gi iisɔ ŋwisi kifu kinɛ ɛ, gi ozimizi ye aata ɛ. 17kɔ wɔ kubúbú yo kume ŋwisi wɔ akatsaloglo ye kinɛ ɛ, atɔ kɔ Aya yɛ liboe le ŋwisi wɔ ihɛ gblamadza yɛ gi Ɔfuɛfuɛ nɔ aaki wɔ ɛ kinɛ vu ni wɔ ɔwla ʋla lɔ. 18Bitɛ la ya petee ní Aya kuxwaxwa mɛ, ki Aya kupɔnɔ ɔ. Xwa Aya lipoe kakaa, kiliɛ gi Ɔfuɛfuɛ nɔ aagbani wɔ ɛ. Lɛ loso ze ni aŋu tɔ wukíki litukpo lipoe tɔtɔ ɔ; xwa Aya lipoe kakaa ki Aya yɛ banima petee.

19Mlaxwa Aya ní mɛ onu, tɔ Aya ɔki mɛ liboe le e, xe malɛ ní kublabla mɛ si mipani i, atɔ mipani lifumose tɔ mibu Liboe Gbã nɛ eboe kpokpo la kubasɛ. 20Kɔkpɛ liboe lɛ ya loso menu Kristo yɛ ɔnɔ kpɛkpɛ! Pɔ̀ abla, ɛ malɛ ní ligba a. Mlaxwa Aya tɔ mitani kulɛɛ tɔ mipani liboe le lifumose kiliɛ gi linu si lize e.

Paulo ni Baʋaziŋa ba Bɛtsisi ba Kunɔpaniɔ.

21Blɔ onemi Tixiko gi malɔ ɔ, gi onu ɔnɔsumu ní kuziŋaa mɛ ki Ɔkaɛ axwɛ na ɛ, aasi mlɔ eboe la pɔ́ ní mɛ su u, atɔ mlate kilɛlɛ liɛ gi malɛ ɛ, ni kidiliɛ gi mɛɛbitɛ ɛ. 22Lɛ loso mɛɛkpɛ yɛ ɛtsisi mlɔ tɔ ɔsi mlɔ kiliɛ gi blɔ petee kulɛ ɛ, ani tɔ ɔkpɛ mlɔ kigagla.

23Atɔ Aya gi onu Ɔka a, ni blɔ Ɔkaɛ Yesu Kristo baki benemi baʋaziŋa ba petee kusuyɔ, ni kulɔlɔ ani kuziŋa. 24Atɔ Aya yɛ lipomepɛpɛ nɛ lize ni banama petee gi bɛlɔ blɔ Ɔkaɛ Yesu Kristo ni ba ɔna nɔ petee e.

Currently Selected:

Efeso 6: avn

Highlight

Compare

Copy