Filipi 1

1Mɛ Paulo ni Timoteo gi kunu Kristo Yesu yɛ banɔsumu ba ɛ, blɔ kwiiŋwlimi keplekpaa lia ya;

ɛki Aya yɛ banima pɔ́ gi bɛkpɛ likpɔ ni Kristo Yesu u, kɔpɔni baʋaziŋa ba baka ba ani ɔha lɔ banɔpɔnɔ ba gi bali ní Filipi i;

2Tɔ Aya blɔ Ɔka ni Ɔkaɛ Yesu Kristo baki mlɔ lipomepɛpɛ ni kusuyɔ.

Paulo axwa lɛ edo Aya ɖase e

3Mizeedo Aya ɖase ní mlɔ litukpo lipoe kakaa ɛ lɛ gi maplɛ aŋu ní mlɔ aʋa ɛ; 4lɛ lipoe kakaa gi maxwa Aya ní mlɔ petee litukpo e, mizɛɛbitɛ lɛ ni isami, 5kɔkpɛ kiliɛ gi mlɛpɔni mɛ gi mamani mlɔ Liboe Gbã nɛ dɔni liwe tɔpu nɛ aʋa gakɔna ni abla ɛ. 6Lɛ maka lɛ aʋa si Aya a, gi yɛ ekpese axwɛ gbã la ya ní mlɔ mɛ ɛ, aatrɛ ní lɛ aʋa kɔzɛna ni la ɔgù kɔ ní liwe lɛ gi Kristo Yesu aadzi ba aʋa a.

7Lɛ loso lipɛ ɛki mɛ si mizebù mlɔ su u, lɛ ese linu si mlakpasi ní mɛ ɔna nɔ mɛ ɛ. Lɛ mlɔ petee mlakpasi ní Aya yɛ lipomepɛpɛ nɛ mɛ ni mɛ ɛ, xegi ligba malɛ ɛ, loo gi malɛ ní mɛ ɔtutɔ mɛ isuwla mɛ ɛ, xe meebu liboe gbã nɛ onu i. 8Aya aaŋa katsalia ɔki mɛ si, lilɛ lɛ mɛ, xe mapani si meegyo mlɔ petee edi i, nì kulɔlɔ ŋwisi kiliɛ gi Yesu Kristo alɔ mlɔ kinɛ ɛ.

9Maxwa Aya si mlɔ kunɔlɔɔ kwiazetsi pɔnɔ, tɔ mlate liboe ni tɔ mlaanu eboe ese mɔmɔmɔ, 10atɔ mlaakya kidiliɛ gi kinu ki gbãɛ ɛ, lɛ mlɔ su adra a, lɛ lipɔŋaŋa ɛtɔtɔ lítraze ní mlɔ su kɔzɛna ni liwe lɛ gi Kristo aadzi ba ɛ. 11Tɔ mlɔ ligbã́ nɛ mɛ bede ʋa biagyɔ ŋwisi kiliɛ gi Yesu Kristo ko aatani kukɔ kinɛ ɛ, ki Aya yɛ kusudraa ni yɛ kukpɔ̀kpɔ̀.

Kristo me kuzeze

12Mɛ benemi ba, mapɛ si mlete si, eboa la gi ɛba mɛ aʋa ɛ, la ɛpɔni Liboe Gbã nɛ lɛ ɔtɔ kutrɛtrɛ. 13gani lɛ mɛ ɛ, kekusipea bepepe ba pɔ́ ani banɔ gɔgɔ ba gi bali ní ya ɛ, betè si malɛ ligba lɛ ese linu si menu Kristo yɛ ɔnɔsumu u. 14Lɛ mɛ ligba lɛ kuzezeo kwiki benemi glegle ba ɔna ní Ɔkaɛ mɛ, lɛ bɛɛpani Liboe Gbã nɛ nì ɔna lifumose e lipoe kakaa.

15Lilɛ ní lɛ mɛ si banɔatɔ bɛpani Kristo su kɔkpɛ kaŋuza ni eboe hehe, pɔ̀ banɔatɔ fɛ ɛ, bɛɛpani nì ɔna gbã. 16Banama gi bɛɛpani nì ɔna gbã ɛ, bɛbitɛ nite nì kulɔlɔ, lɛ ese linu si betè si Aya aki mɛ axwɛ si miŋwlɛ liboe gbã nɛ litukpo. 17Ba tɔpu ba ɛ, baʋíbu Kristo su ni ɔna gbã a, pɔ̀ dɔni ba ɔtutɔ ba bidɔpɛ́pɛ mɛ ɛ; begyo le edi si biamani kedu yɔyɔ ní mɛ su tɔ mimɔ kinie sanɔ gi malɛ ligba lɛ ɛ.

18Pɔ̀ líziã! Isami iku me kɔkpɛ gi bɛɛsɔli Kristo ní kude kakaa onu i, xegi gani kude nyani nyani onu loo gani kude gbã onu kyɛ ɛ, isami iaze kume. 19lɛ ese linu si mete si gani mlɔ Aya kuxwaxwa mɛ ɛ, ani kupɔnɔɔ gi kwidɔ Aya yɛ Ɔfuɛfuɛ nɔ klɔ gani Yesu Kristo aʋa ɛ, liboe lɛ gi liba mɛ aʋa ɛ, liadzi ɔwlamɔmɔ ki mɛ. 20Mapɛ koŋ lɛ meedi kudeonu si kuye kútraku me e, lɛ ɔna aaze mɛ lipo si gani mɛ aʋa ɛ, banima biakpɔ Kristo yɛ linyi ne ní mɛ mɛ̀, xegi metse loo malɛ ligbã a. 21Lɛ ege kinu ligbã́ nɛ ɛ? Ki mɛ xunyɔ ɛ, tɔ mize ligbã́ ɛ, binu Kristo pɔ̀ xe metse e, binu libibubu iki mɛ ɛ. 22Kɔ xe malɛ ligbã́ ɛ, liaki si maawa axwɛ gbã, pɔ̀ kɔ liwoli maavu kɔ̀ ɛ? Méte. 23Malɛ ní begyodi tiaʋa kusi, Mapɛ vevee si misɛ ní kelea lia mɛ tɔ mizeeze ni Kristo, gi lipɛ sanɔ kura a; 24pɔ̀ kɔkpɛ mlɔ loso e, liziã si mize ligba a. 25Maka lɛ aʋa lɛ mete si maaze. Maaze ni mlɔ petee, tɔ mipɔni mlɔ ki ɔtɔ kutrɛtrɛ tɔ mlaamɔ isami ní kuziŋa mɛ, 26atɔ xe maba mlɔ klɔ dzɛ ɛ, mlamɔ isami glegle ní Yesu Kristo me kɔkpɛ mɛ loso.

27Abla ɛ liveve le linu si mlɔ ligbã́zeze ne lize ŋwisi kiliɛ gi Kristo su Liboe Gbã nɛ lipɛ ɛ, atɔ xe maatani mlɔ kumɔ loo xe máma a, xe kinu menu mlɔ onu kyɛ ɛ, maate si mlalɛɛ mumɔ ní Ɔfuɛfuɛ tole me, gi mlɛŋwlɛ ŋwisi ɔnɔ tole ki kuziŋaa ni Liboe Gbã nɛ ɛ, 28mlakíse mlɔ ahwafianɛ ma. Ɔna oze ní mlɔ lipo lipoe kakaa, lɛ ya liabasɛ ba si Aya aakyrɔ ba, pɔ̀ mlɔ kɔɔ Aya aabu mlo, lɛ ese linu si Aya yɛ atráki mlɔ kaʋaŋaa a. 29Lɛ ese linu si bɛki mlɔ kudeonu ní Kristo linyi ne me aní si mlazi yɛ aʋa aŋa tètè ko, pɔ̀ tɔ mlamɔ ɔzia nɔ aki yɛ ɛ. 30agi mlɔkyɛ mlɛta kigũ yɛ ɛ, kigũi liɛ gi kɛ mlɛmɔ si mazɛɛta a, xe abla kyɛ ɛ, mleenu si mɛɛta ɛ.

Currently Selected:

Filipi 1: avn

Highlight

Compare

Copy