Efeso 1

Paulo apani Aya yɛ banima ní Efeso

1Keplekpaa lia ya kɛdɔ ní mɛ Paulo, gi Aya axwa gani yɛ kupɛ́pɛɔ onu, si midzi Yesu Kristo yɛ ɔnɔkpɛkpɛ kɔ ɔ. Mɛɛŋwlimi ka ɛki Aya yɛ banima ní Efeso, banama gi balɛ ní anukwarɛɛ aʋa ni Kristo Yesu i. 2Atɔ Aya gi onu blɔ Ɔka ni blɔ Ɔkaɛ Yesu Kristo bapɛ lipo me aki mlɔ ɔ, tɔ baki mlɔ kusuyɔ ɔ.

Ɔfuɛfuɛ nɔ mɛ Kukrira ní Kristo me

3Mlaki tɔ kukpɔ̀ Aya gi onu blɔ Ɔkaɛ Yesu Kristo yɛ Aya ani yɛka fɛ ɛ. Yɛ akrira blɔ lɛ aki blɔ Ɔfuɛfuɛ mɛ kukrira kakaa dɔni lifunu ne gani Kristo aʋa a. 4Lɛ ese linu si akya blɔ kooko ní Kristo me, xe ableke biabitɛ kelea a, si kudzi yɛ banɛ, tɔ blɔ isu iadra dɔni kesetata kakaa mɛ ní yɛ aŋu mɛ ɛ. Gani yɛ kunɔlɔɔ mɛ ɛ, 5Aya atrɔ lɛ kooko si gani Yesu Kristo me e, yɛ abitɛ blɔ yɛ bebi i, lɛ ya lize yɛ isami ni yɛ kutrɔtrɔ 6ki yɛ kukpɔ̀kpɔ̀ ní yɛ lipomepɛpɛ glegle le, gi aki blɔ faã gani Yebi ye e gi alɔ koŋ i me! 7Lɛ gani Kristo ika lɛ mɛ ɛ, kwimɔ ɔwlamɔmɔ, lɛ bɛkɔ blɔ eboe zimizi na ɛkyɛ blɔ ɔ. Niteme Aya yɛ lipomepɛpɛ nɛ likeme. 8Lipomepɛpɛɛ nɛ ya akɔ akyɛ blɔ ɔ kpaŋu gani yɛ kuboeteo ni kuboesenu yo me. 9Aya abitɛ ní yɛ batrɔtrɔ ʋa aʋa, lɛ aki si kwite yɛ eboe kpokpo ala gi atrɔ kooko e gani Kristo me. 10Batrɔtrɔ ʋa ya gi Aya aablo no ní lipoe gbã nɛ aʋa a, aakpɛ kidɔ kakaa likpɔ ní lifunu ne ni kesea aʋa ki Kristo gi yɛ onu kidɔ kakaa litukpo le e.

11Aya abitɛ kidɔ kakaa ní yɛ batrɔtrɔ ʋa ni yɛ kupɛpɛɔ onu; lɛ akya blɔ si kuze yɛ banɔ ní likpɔkpɛkpɛ mɛ ni Kristo o, kɔkpɛ yɛ ɔtutɔ yɛ kutrɔtrɔ ní kidiliɛ gi atrɔ adɔ ni okpese klɔ ke e. 12Lɛ loso mlaki tɔ blɔ banama gi kwize banɔ tɔpu ma a, gi kwidi kudeo nu ní Kristo me e, kuze ki Aya yɛ kukpɔ̀kpɔ̀ ki yɛ kusudraa. 13Mlɔ fɛ mledzi Aya yɛ banɔ gi mlenu anukwarɛ liboe le e, Liboe Gbã nɛ gi limani mlɔ kubúbú i. Agi mlɛzɛ Kristo aʋa ɛɛŋa ɛ, lɛ Aya akpɛ mlɔ gyesi, gi aki mlɔ Aya yɛ Ɔfuɛfuɛ nɔ ɔ, gi lɔ su apani aplɛ ɛ. 14Ɔfuɛfuɛ nɔ ɔlɛɛ kede ɔki blɔ xe ɛɛka lɛ aʋa si kwiamɔ kidiliɛ ɛ, gi Aya aka aplɛ aki yɛ banima a, lɛ lɛ ya litrɔ likla lɛ aʋa ɛki blɔ si Aya aaki yɛ banima ɔwlamɔmɔ nɔ tratratra. Mlaki tɔ kukpɔ̀ yɛ kudradraa.

Paulo Axwa Aya ní baʋaziŋa ba ní Efeso litukpo

15Lɛ loso e, dɔnɔ lipoe lɛ gi menu mlɔ kuziŋaa ní Ɔkaɛ Yesu me e, ni mlɔ kulɔlɔɔ ki Aya yɛ banima petee onu i, 16maʋímɔni Aya ɖase kudo ní mlɔ onu u. Mizɛɛplɛ aŋu ní mlɔ aʋa xegi mɛɛxwa Aya a, 17lɛ mizeeʋi blɔ Ɔkaɛ Yesu Kristo yɛ Aya, Ɔka gi ekeme e, tɔ ɔki mlɔ yɛ Ɔfuɛfuɛ nɔ, gi aabitɛ mlɔ beboete tɔ aabu Aya basɛ mlɔ tɔ mlaate ye sanɔ ɔ. 18Meʋi si mlɔ begyodi ʋa mɛ badra, tɔ mlamɔ yɛ kuklekleo atɔ mlaate kidiliɛ gi kɛ kinu kudeonudidi uliɔ ɔ, gi kɔ onu axwa mlɔ ɛ, kukrira ʋidi uliɔ gi kunu kaŋasea aki yɛ banima ɛ, 19ani kiliɛ gi yɛ kigaglaɛ ɛ, gi batrátani kɛ kukɔsrɔ nɔ kididɔ ɛ kikeme ní blɔ mɛ, blɔ banama a, gi kwizi ŋa ɛ. Kigaglaɛ liɛ ya gi kiiwa axwɛ na ní blɔ mɛ ɛ, kɛ kee kinu yɛ kigagla ʋidi ye, 20kɛ kee akɔ ayɔni Kristo adɔ ní bekpo ʋa mɛ, xe edu ye ní yɛ kaŋawla mɛ ní lifunu ne kelea mɛ ɛ. 21Niklɔ Kristo ɛɛŋa kukusi yo ní lifunu ne bekusi ba pɔ́, kigagla kakaa ani baka ba aʋa; yɛ linyi ne e, lisani enyi na petee ní kelea lia ya ani kalia kɔlɔ mɛ ɛ. 22Aya akɔ kidɔ kakaa akpɛ ní Kristo kukliseo, lɛ akɔ yɛ aki baʋaziŋa ba si, yɛ onu baʋaziŋa ba petee litukpo le. 23Ɔha lɔ onu Kristo yɛ kisugyaɛ, gi kina ní kidɔ kakaa mɛ ɛ, lɛ yɛ kee ebloni kidɔ kakaa ní ɔkɔ kakaa ɛ.

Currently Selected:

Efeso 1: avn

Highlight

Compare

Copy