Efeso 2

Aya aki blɔ ligbã́ gani Kristo me.

1Mlɔ kɔ ɛ, mletse ní Ɔfuɛfuɛ nɔ mɛ kɔkpɛ mlɔ kesetataa ni mlɔ eboe zimizi na 2gi la mɛ mleeze e lipoe lɛ gi mlezeni kelea mɛ bede zimizi ʋa kude e; mlezeenu kutu iki ifuɛfuɛ zimizi nɛ gi ilɛ ní liwɔ lɛ mɛ lɛ okusi ye e, ɔfuɛfuɛ ɔnɔ gi lɔ ɛɛŋa kamla abla ní banama a, gi baʋínu kutu i aʋa. 3Blɔ pɔ́ blɔ fɛ kwize ní ba kusi, lɛ kwize ní blɔ tutɔ kupɛpɛɔ onu u, gi kwizɛɛbitɛ kidiliɛ ɛ, gi kiku blɔ isu ya nì begyodi ʋa aŋu i. Ní blɔ kizezee me onu i, kwize ko ŋwisi banɔ gɔgɔ ba kinɛ ɛ, gi Aya kusuyeʋio ko kwigyeni blo o. 4Pɔ̀ Aya yɛ asigagadidi la ɛsrɛ ɛ, lɛ yɛ kulɔlɔ ki blɔ kwikeme nite si, 5agi kwitse e ní Ɔfuɛfuɛ nɔ mɛ gani blɔ kutu monumonu yo me e, aki blɔ ligbã́ nì Kristo. Ebu mlo gani Aya yɛ lipomepɛpɛ nɛ mɛ ɛ. 6Ni blɔ likpɔkpɛkpɛ mɛ nì Kristo me e, Aya ayɔni blɔ apɔni yɛ tɔ kwiaŋa kukusi nì yɛ ní lifunu ne kelea mɛ. 7Nite Aya abitɛ tɔ yikɔ ɛbasɛ ní ɔtɔ nɔ mɛ, kidiliɛ gi yɛ lipomepɛpɛ ʋidi ne e, gi batrákɔ ɛsrɔni kididɔ ɔ, xe ebu abasɛ ní yɛ kulɔlɔ liɔ ɔ, gi abasi blɔ gani Kristo Yesu me e, binu. 8Lɛ ese linu si gani Aya yɛ lipomepɛpɛ nɛ mɛ ebu mlo gani kuziŋa mɛ, aní mlɔ tutɔ mlɔ kukenidi me lidɔ, pɔ̀ Aya yɛ bidɔkɔkɔ binu u, 9ani dɔni mlɔ axwɛwawa mɛ kyɛ, lɛ loso ɔnɔnɔ ɔ́tratani isu kufeke ní lɛ su u. 10Aya yɛ abitɛ blɔ kidiliɛ gi kunu u, lɛ gani blɔ likpɔkpɛkpɛ mɛ ni Kristo Yesu i, abitɛ blɔ si kwiaze ligbã́ ki axwɛ gbã kuwawa.

Kristo kutseo kwikpɛ Yudanɛ ni banama gi bénu Yudanɛ ma likpɔ ɔ

11Lɛ loso mlaplɛ aŋu si tsã́ ɛ, mlɔ gi mlénu Yudanɛ gani kipɔpɔ mɛ ɛ, Yudanɛ ma gi bizɛxwa isu ya si “banama gi bɛtsa ɔyaʋi i” bɛzɛxwa mlɔ si “banama gi bátsa ɔyaʋi i,” pɔ̀ bɛ ya binu bidɔ gi bizɛbitɛ ki ba kisugyaɛ ko. 12Mlaplɛ aŋu si ní lipoe lɛ klɔ mɛ ɛ, mléte Kristo o, mlézè ní Israel bebi ba kusi i, lɛ mlézè ní Aya yɛ banɔkyakya ba kusi i. Mlámɔ ɔŋakɔ ní Aya kunyanyaa gi kɔ kwize yɛ kakaplɛa aki yɛ banima mɛ ɛ, lɛ mleze ní kelea mɛ ɛ, gi kudeonudidi kúze ní mlɔ awla a, lɛ mléte Aya fɛ ɛ. 13Pɔ̀ abla ɛ, ní likpɔkpɛkpɛ mɛ ni Kristo Yesu i, mlɔ banama gi mleze ní ɔdzage no e, gani Kristo ika lɛ mɛ ɛ, bɛki mletipɔnɔ.

14Lɛ Kristo ɔtutɔ amani blɔ kusuyɔ gi abitɛ Yudanɛ ma a, ni Banama gi bénu Yudanɛ ma a, ɔnɔ tole. Nì yɛ ɔtutɔ yɛ kisugyaɛ ɛ, ayaʋi ofutrɔtrɔ lɔ klɔ gi eze ŋwisi ligli i, gi lilɛ ba kusi i, xe beze ahwafianɛ ki bahanuglɔ ba ɛ. 15Gani yɛ kutseo me e, ebu Yudanɛ ma ɔsã nɔ ni lɔ batrɔtrɔ ʋa azanɔ tɔ yidzini banɔ tiaʋa ya ʋa ɛbitɛ tɔ bedzi ɔnɔ tole ní likpɔkpɛkpɛ mɛ ni yɛ isu ya, atɔ gani lɛ mɛ ɛ, tɔ kusuyɔ ku ba a. 16Gani yɛ kutseo me ní osetsase lo su i, Kristo ezizi ba ofu lo, lɛ gani osetsase lo me e, akpɛ banɔ tiaʋa ya ʋa likpɔ gi bedzi ɔnɔ tole e, lɛ edzini ba amanɔ ní Aya klɔ ɛ. 17Lɛ loso Kristo aba a, xe asɔli kusuyɔ Liboe Gbã nɛ aki ɔnɔ kakaa a, ki mlɔ banama gi mlénu Yudanɛ ɛ, gi mlalɛ ní ɔdzage ní Aya su u, ni kí Yudanɛ ma, gi beti apɔni yɛ ɛ. 18Gani Kristo me blɔ petee, Yudanɛ ni banama gi bénu Yudanɛ ɛ, biatani Ɔfuɛfuɛ tole me kuze xe biatrɛ ní blɔ Ɔka yɛ aŋu mɛ ɛ.

19Lɛ loso, mlɔ banama gi mlénu Yudanɛ ɛ, mlénu bababa loo ahwafianɛ tɔɔ; abla ɛ, mlenu blɔ akɔanɛ kɔpɔni Aya yɛ banima, lɛ mlenu Aya yɛ kepeme bebi i. 20Mlɔ fɛ bɛwa mlɔ ɛtrɔ ní ɔxɔ lɔ aʋa kiliɛ gi banɔkpɛkpɛ ba ni beboedoplɛ ba bɛkpɛ lɔ ɛplɛ ɛ, nì likɔtɔ lɛ mɛ likla ɛnɛ gi linu Kristo Yesu ɔtutɔ ɔ. 21Yɛ onu ɔniliɛ gi evu ligba zizi nɛ edu u, lɛ yɛ izɛki si lizɛba edzì lisɔligba a, gi libu isu lidze ki Ɔkaɛ. 22Ní likpɔkpɛkpɛ mɛ ni yɛ ɛ, mlɔ fɛ bɛɛtrɔ mlɔ ɛkpɛ likpɔ ni banɔ gɔgɔ ba si mledzi ozekɔ lɔ gi Aya aaze gani yɛ Ɔfuɛfuɛ nɔ mɛ ɛ.

Currently Selected:

Efeso 2: avn

Highlight

Compare

Copy