2 Timo 3

Ligbã́ nɛ ni ewe gɔgɔ la mɛ

1Plɛ aŋu si ligbã́ nɛ litráze gagla ní ewe gɔgɔ la mɛ. 2Banima biaze bamimi nɛ ni banɔ gi bɛdimɛ ni kibɔ ɔ. Biaze basudɔ ni banɔ gi beku isu ya aŋu u. Banima biaze banɔkpini ni banɔ gi bátrabù ba bapɔnɛ ba a, Biaze banɔ gi bidɔ bitráku ba aŋu u, ni banɔ gi ba isu ítradra a; 3batrápɛ̀ lipo me ɛki banɔ ɔ, batrádi ɔnɔ asigaga a, biazegu kunugu banɔ su, bátraŋa isu aʋa a, ba etukpo me azeegagla lɛ batrápɛ́ kidɔ gbã a. 4Biaze banɔ gi bizɛga banɔ ese e, banɔ gi bali nì ba begyodi ʋa kude e, banɔ gi beku isu liŋu u, xe kusudɔɔ kwiyi ba mɛ ɛ, biadimɛ ni ligbã́ ŋaŋa sani Aya kulɔlɔ; 5biazɛɛbitɛ ŋwisi beesumu Aya a, pɔ̀ batrázɛ Aya yɛ kigaglaɛ ɛ. Ya kí banɔaklɔ ba elu e.

6Bamɛ batɔ bizɛɛtrɛ ní banima kupeo me lɛ bizɛɛŋa kamlaa ní badzɛ kunukpadze kuliɔ gi ba agbã́zeze nyani nyani na edzì kùye kɔ ɔ, xe kusuŋwasiɔ kwikpɛ ba kunugu yo aʋa a. 7Badzɛ ba ya gi beekeni di lipoe kakaa a, si bɛɛkpasi bidɔ pɔ̀ xe baʋíte anukwarɛɛ liwewe e. 8Ŋwisi kiliɛ gi Yane ni Yambre#3:8 Beze Egipteanɛ bawa bitɛ gi beze ni Farao kepea me lipoe lɛ gi Mose adzɛ si yibu Israel bebi ba ɛ. bɛyɔ kedu ní Mose su izanɔ ɛ, nite ke asia na badɔbasɛ ba ya fɛ bɛyɔ kedu ní Liboe Gbã nɛ gi kwipani su u, banɔ gi ba begyodi ʋa baʋíwa axwɛ ɛ, xe bɛwɔli ní ba kuziŋaa mɛ ɛ. 9Pɔ̀ batrádzi ɔtɔ ɔ, lɛ ese linu si ɔnɔ kakaa aamɔ ba motemote e. Lɛ ɖi liba Yane ni Yambre aʋa a.

Paulo yɛ Batrɔtrɔ gɔgɔ ʋa ki Timoteo

10Pɔ̀ wɔkɔ ɛ, wote me, ni mɛ bidɔbasɛbasɛ ʋɛ, mɛ kizezee me ni mɛ kupɛ́pɛ ní ligbã́ nɛ mɛ ɛ; wovu aŋu ní mɛ kuziŋaa su, mɛ litɔplɛplɛkese, mɛ kunɔlɔ, ni kiliɛ gi mizɛɛkpɛ ikù nɛ ní baxixa ʋa mɛ su u. 11Wote kedua lia gi bɛyɔ ní mɛ su i, ani mɛ kupepeo. Wote kidɔ kakaa gi kiba mɛ aʋa ní Antioxia, Ikonion ani Listra ɛ, kedu yɔyɔ zimizia lia mɛ gi maga ɛ! Pɔ̀ Ɔkaɛ ebu me ní la petee me e. 12Lɛ loso ɔnɔ kakaa gi apɛ si yize ligbã́ gbã ní Kristo Yesu me e, biayɔ kedu ní ɔniliɛ klɔ su u; 13lɛ banɔ zimizi ba ni asia na badɔbasɛ ba ɛ, biazɛnyani pɔnɔ, biazeemeni banima lɛ banɔdzedze ba biameni ba fɛ ɛ. 14Pɔ̀ wɔkɔ ɛ, trɛ ní anukwarɛɛ gi bɛbasɛ wɔ gi wɔká lɛ aʋa a, xe wɔziŋa ɛ aʋa. Wote banɔaklɔ gi wɔ badɔbasɛ ba beze e, 15lɛ wɔplɛ aŋu si dɔni wɔ kunuvɔɔ mɛ ɛ, wote kidiliɛ gi bɛŋwlimi kpɛ ní Kuŋwlimi Dradraa mɛ ɛ, gi kiki wɔ kuboeteo liɔ klɔ ɔ, gi kwigbani wɔ ɛtsini kubúbú me gani wɔ kuziŋaa ní Yesu Kristo me e. 16Kidɔ kakaa gi bɛŋwlimi kpɛ ní Kuŋwlimi dradraa mɛ ɛ, Aya yɛ ebu ke abasɛ, lɛ kipɛ ɛki anukwarɛɛ bidɔbasɛbasɛ, kí aŋu mɛ kukaka, ki kupɔnɔ ki banima tɔ bekyi ba biboebitɛ zimizi ʋe, ni tɔ biki kuhehe ki ligbã gbã kuzeze e, 17atɔ ɔniliɛ gi eesumu Aya ɛ, aana ní kapɛ kakaa mɛ ki axwɛ gbã kuwawa a.

Currently Selected:

2 Timo 3: avn

Highlight

Compare

Copy