2 Timo 4

1Mɛɛki wɔ lixwɛ nɛ ní Aya ni Yesu Kristo aŋu mɛ ɛ, yɛ gi atráxwa litsi ni bagbagbe ba ni bekpo ʋa ɛ, lɛ ese linu si atrába lɛ aaŋa aʋa ŋwisi Okusi kinɛ ɛ: 2Lixwɛ nɛ linu si pani liboe le, tɔ di le aʋa si bɛpani liboe le lipoe kakaa, tɔ liɔʋi banɔ, loo tɛni ba, loo tɔ kpɛ ba kigagla xe wɔɛbasɛ ba bidɔ nì litɔplɛplɛkese kese e. 3Lipoe le litrába gi banima bátrazɛ bidɔ gbã kubasɛ tɔ ɔ, pɔ̀ biakuni batutɔ ba bapɛ́pɛ ʋa kude e, lɛ biapɛ́ badɔbasɛ báklɔ gi biabasɛ ba eboa la klɔ gi bɛɛpɛ si beenu i. 4Biakyi ba atukpa la ní anukwarɛɛ liboe le su, lɛ biata kudzidziɔ kutu usanɔ ɔ. 5Pɔ̀ wɔ ŋa isu aʋa ní kidɔ kakaa mɛ ɛ; kpɛ ikù nɛ ní kupepe me, wa ɔklakla yɛ axwɛ na ni Liboe Gbã nɛ, tɔ wa wɔ axwɛ na petee ŋwisi Aya yɛ ɔnɔsumu ye kinɛ ɛ.

6Mɛkɔ ɛ, lipoe le lina ɛki mɛ si mikɔ mɛ ligbã́ nɛ kukɔ tɔ ba bali mɛ ní ɔdɔpɔʋisuʋɔ lɔ aʋa ŋwisi kiliɛ gi bizɛɛbali kuda kesea kinɛ ɛ; lipoe le lina ɛki mɛ si misɛ ní ligbã ɛnɛ ya mɛ ɛ. 7Matá akpafu la mumɔ, meblo ni kuseseo, lɛ mevu mɛ kuziŋaa ni Kristo me awla kɔzɛna ni ɔgũ klɔ. 8Lɛ dɔni abla kɔtsinɔ ɛ, bɛbla kaʋaŋaa likusikuto le gi bɛtrákume ɛki banama gi bɛŋa aʋa ɛ, ɛki mɛ. Likusikuto elɛ gi Ɔkaɛ litsi gbã nɛ ɔxwaxwa yɛ aaki mɛ ni Liwe lɛ klɔ aʋa ɛ. Lɛ ani kí mɛ tètè, pɔ̀ kí banama pɔ́ gi beedi yɛ kibabaɛ kudeonu u.

Paulo ni Timoteo kusi Eboe la

9Kenidi tɔ gana mɛ kpekpee. 10Lɛ ese linu si Dema gi alɔ kelea mɛ ɛ, asɛ ní mɛ su atrɛ ní Tesalonika. Kreske asɛ atrɛ ní Galatia, lɛ Tito fɛ atrɛ ní Dalmatia. 11Luka tete kpoo ko ɔlɛ ní mɛ su. Pɛ́ Marko tɔ gbani yɛ manɔ, lɛ ese linu si aatani mɛ kupɔnɔ ní mɛ axwɛ na mɛ. 12Makpɛ Tixiko atsisi Efeso. 13Xe wɔtraba ɛ, kɔ̀ mɛ kublɔ mɛ liwu le gi mayurɔ aplɛ ní Karpo klɔ ni Troa ɛ, ni mɛ kuplekpaa fɛ mani mɛ, kuveveo kunu kuliɔ klɔ gi bɛbitɛ ni kagaplekpa ɛ.

14Aleksandro gi onu bala ʋa su ɔxwɛwa yɛ, awa anyra ní mɛ su u; Ɔkaɛ aatsa liʋɛ ɔki yɛ kɔkpɛ kidiliɛ gi abitɛ loso o. 15Wɔ fɛ ze ní aŋu plɛplɛ mɛ ní yɛ su, lɛ ese linu si ayɔ kedu gagla ní blɔ liboe le su.

16Ɔnɔnɔ ɔ́lɛɛ nì mɛ kude e lipoe lɛ gi mazeebú isu unu kutɔpu yɔ ɔ ni otsixwa klɔ; ba pɔ́ bɛsɛ ní mɛ su. Aya ɔkíbu ba kiboebitɛ liɛ ya ɛki ba a! 17Pɔ̀ Ɔkaɛ ezeni me lɛ akpɛ mɛ kigaglaɛ, lɛ gani mɛ aʋa ɛ, banama pɔ́ gi bénu Yudanɛ ma ɛ, benu Aya yɛ liboe le petee gi mapani i. Lɛ ebu me gi bátsa kutsépia aki mɛ ɛ. 18Lɛ Ɔkaɛ aabu me ní lizimizi kakaa mɛ ɛ, lɛ aatsini mɛ ní lifunu ne Kaʋaŋaa mɛ ɛ. Yɛ linɛ liaze kukpɔ̀kpɔ̀ɔ kɔtsini kanɔmɛ anɔmɛ! Tɔ liba lɛ mɛ.

Paulo aklaa ba kugɔgɔ

19Mapani Priskila ni Akwila ani Onesiforo yɛ okú no. 20Erasto eze ní Korinto, lɛ masɛ ní Trofimo su ní Mileto lɛ ese linu si yɛ isu mɛ izizi. 21Kenidi tɔ ga ku ni ya xe kwiakú kublɔ lipoe le me e. Eubulo, Pude, Lino ni Klaudia ani benemi baʋaziŋa ba pɔ́ bɛpani wɔ ɔ.

22Ɔkaɛ ozeni wɔ Ɔfuɛfuɛ nɔ. Aya ɔpɛ lipo me ɔki mlɔ petee.

Currently Selected:

2 Timo 4: avn

Highlight

Compare

Copy