2 Tesalo 3
3
Paulo eʋi si baxwa Aya ní ba litukpo
1Gɔgɔ ɛ, blɔ benemi ba, mlazɛxwa Aya ní blɔ litukpo tɔ Ɔkaɛ yɛ Liboe le linè onugu kìse ìse, tɔ bazɛ lɛ ni kubùbù, ŋwisi kiliɛ gi lize ní mlɔ kusi i. 2Mlaxwa Aya tɔ obu blo ní banɔ nyani nyani ni litukpo me gagla benete ba iwla mɛ; lɛ ese linu si aní ɔnɔ kakaa yɛ azɛ Liboe Gbã nɛ aʋa aŋa a. 3Pɔ̀ Ɔkaɛ onu ɔnɔ gi biaziɔnɔ ɔ, lɛ aakpɛ mlɔ kigagla a, kɔ ewe mlo ní ozimizi ye su i. 4Lɛ likla trɔtrɔ lilɛ ní blɔ awla ní blɔ Ɔkaɛ mɛ, lɛ kwizi lɛ aʋa ɛɛŋa si mlɛɛbitɛ, lɛ mlɛzɛbitɛ ní eboa la gi kwisi mlɔ aʋa a. 5Atɔ Ɔkaɛ ɔki mlɔ kesenunu glegle ki yɛ kulɔlɔ ɔ, ani igyidodo ŋwisi kiliɛ gi Kristo izɛkɔ kinɛ ɛ.
Lilɛ si Lixwɛwawa lize ní ɔnɔ Kakaa awla
6Blɔ benemi ba, kwikpɛ ɔsã ɛki mlɔ ní Ɔkaɛ Yesu Kristo linyi ne me si, mlebú isu lidze ní benemi ba ya gi benu basranɛ ani banama gi bɛyurɔ awla ní blɔ kudɔbasɛ yɔ su i su. 7Mlɔ ɔtutɔ mlete le mɔmɔɔmɔ si lilɛ si mlabitɛ ní blɔ kibitɛɛ aʋa ɖii. Kúze basranɛ lipoe lɛ klɔ gi kwiize ní mlɔ kusi i. 8Kúzɛ ɔnɔnɔ yɛ kupɔnɔ gi kútsa liʋɛ kɔ litukpo o. Nite me ke kwiwa axwɛ na ni kupèpè; lɛ kwizɛwa axwɛ na elesi ni kemize atɔ kukíze lidɔtu iiki mlɔ mɛ ɔtɔtɔ ɔ. 9Kwibitɛ lɛ ya, aní si kúmɔ kude si kwaʋi mlɔ kupɔnɔ ɔ; boŋu i, kwibitɛ nite tɔ kuze kuŋudra gi kɔ mlaakpasi i. 10Agi kwize ní mlɔ kusi i, kwizɛsi mlɔ si, “Ɔniliɛ gi egbe si yɛ ɔ́trawa lixwɛxwɛ ɛ, mlakíki yɛ bidɔ tɔ ɔŋa a.”
11Nite kwipani, lɛ ese linu si kwinu si banɔ batɔ balɛ ní mlɔ kusi gi benu basranɛ ɛ, lɛ baʋíbitɛ kididɔ sani si bazɛkpɛ onugu ní banɔ dzedze ba eboe la mɛ ɛ. 12Ní Ɔkaɛ Yesu Kristo linyi ne me e, kwikpɛ ɔsã lɛ kwigba banɔ ba ya si bekyi tɔ beze ligbã́ gbã tɔ bawa axwɛ atɔ bakɔ apɛ ba tutɔ ba lìklã nɛ. 13Pɔ̀ ní mlɔ mɛ benemi ba a, liboe gbã kubitɛ kukípè mlo o. 14Liatani lɛ mɛ kuba si ɔnutɔ ní mlɔ mɛ ɔ́traxo liboe lɛ gi kwiŋlimi kimlɔ ní keplekpa lia ya mɛ oto o. Xegi nite e, mlakpɛ yɛ lixaŋu tɔ mlakíbitɛ kididɔ ni yɛ ɛ, tɔ kuye kùku ye e. 15Pɔ̀ mlakibitɛ yɛ ŋwisi ahwafiɔnɛ ɛ; boŋu i, mlagba yɛ ŋwisi onemi nɛ kinɛ ɛ.
Eboe gɔgɔ la
16Tɔ blɔ Ɔkaɛ ɔtutɔ, gi yɛ onu blɔ kusuyɔ ɔdɔ́klɔ ɛ, ɔki mlɔ kusuyɔ lipoe kakaa ní kude kakaa onu. Ɔkaɛ oze ni mlɔ petee. 17Mɛ Paulo ɔtutɔ mɛ ɔwla lɔ makɔ aŋwlimi kunɔpanɔ uliɔ ya; gi kwidɔ ní mɛ Paulo klɔ kɔ aki mlɔ ɔ. Kude kuliɔ ya aʋa mizɛɛkpɛ awla ní mɛ linyi ne ese ní mɛ keplekpa kakaa mɛ; Nite mɛkɔ mizɛɛŋwlimi i. 18Meʋi blɔ Ɔkaɛ Yesu Kristo yɛ lipomepɛpɛ nɛ si lize ni mlɔ petee.
Currently Selected:
2 Tesalo 3: avn
Highlight
Share
Compare
Copy
Want to have your highlights saved across all your devices? Sign up or sign in
© Ghana Institute of Linguistics, Literacy and Bible Translation, 2017 In cooperation with Wycliffe Bible Translators, Inc
