1 Timo 1

1Keplekpaa lia ya kɛdɔ ní mɛ Paulo gi menu Kristo Yesu yɛ ɔnɔkpɛkpɛ yɛ yɛ klɔ ɔ, ɔnɔ gi bɛkpɛ ɛ, ní Aya blɔ Ɔnɔbu ye ni Kristo Yesu gi yɛ kudeonu kwidi i, ba kigaglaɛ mɛ.

2Mɛɛŋwlimi ka ɛki Timoteo, mɛ ɔtutɔ mɛ obi ní kuziŋaa mɛ:

Meʋi Kaka Aya ni Yesu Kristo blɔ Ɔkaɛ tɔ bapɛ lipo me aki mlɔ, bedi mlo asigaga ani tɔ baki mlɔ kusuyɔ.

Paulo agba ba si bedi mumɔ ní asia badɔbasɛ ba su.

3Kiliɛ gi masi wɔ ɔ, lipoe lɛ gi mazasɛ̀ atrɛ ni Makedonia ɛ, mapɛ si ze ní Efeso ɔma nɔ me. Benyimeatɔ bɛɛbasɛ bidɔ gi biga lidze e, ni kidiliɛ gi kwibasɛ ní Yesu Kristo aʋa kuziŋaa su u. Liziã si wɔatsí kudeo ki ba kiboebitɛ liɛ ya. 4Ki tɔ bamɔni kudzídzi yɔ kuta ani tɔ bamɔni siŋanɛ kpaŋukpaŋu sɛ kusrɔ. La ya petee izɛɛmani eboe hehe, lɛ aʋíki si Aya axwɛ na aatrɛ ɔtɔ gi la mɛ pɔ Aya aʋa kuziŋaa kulɛ ɛ. 5Kidiliɛ loso gi maki wɔ ɔsã lɔ ya kɛ kinu si i, kitɔ baʋaziŋa ba beze ní kunɔlɔ gi kwidɔ ɔna gbã mɛ ɛ, begyodi dradra mɛ, ni kuziŋaa ɔtutɔ mɛ. 6Banɔatɔ bɛlila, lɛ bekyi kede kpɛ la ya a, lɛ bɛkɔ otro pluplu ete kunu yo xe bɛtrɛ ɛ. 7Bɛpɛ si beeze Mose ɔsã nɔ lɔ badɔbasɛ, pɔ̀ béte kidiliɛ gi kɛ su bɛɛpani i, loo kidiliɛ gi kɛ aʋa bɛɛka a.

8Kwite si Mose ɔsã nɔ ɛpɛ xe bɛwa lɔ su axwɛ mumɔ ɛ. 9Kwite kyɛ si bɛkpɛ isã nɛ aní ki banɔ gi ba bede ʋa mɛ bɛdra a, boŋu i, ki banama gi baʋíbitɛ ní isã aʋa a, ni banama gi bizɛɛyɔ kedu ni banɔ su u, banama gi béte e, xe bazɛ Aya aʋa aŋa a, ni banɔ zimizi ba, banama gi ba isu ídra ɛ, banama mɛ gi Aya yɛ Liboe le líma ɛ. Bɛkpɛ isã nɛ ɛki banama gi bizeye ba baka ba a, loo ba bene ba ani ki bakpɛnɛ ba. 10Bɛkpɛ lɛ ɛki bamamɛga ba, benyime ba ya gi bizɛfɛ ni ba ahanuglɔ benyime ba, ni badzɛ gi bizɛfɛ ni ba ahanuglɔ badzɛ ba, banama gi bizɛɛga kanɔ́dzia, ni banɔdzidzi ba, banɔmeno ba, kí basia nɛ ba gi bizɛɛtàni bidɔ mɛ ɛ, ani kidɔ kakaa gi kiyɔ kedu ní kudɔbasɛ gbã su u, 11gi lisɔni Aya yɛ Liboe Gbã nɛ ɛ, gi akɔ akpɛ awla aki mɛ ɛ. Lɛ linu Liboe Gbã nɛ gi lidɔ Aya a, gi banima bizɛɛkrira ɛ, klɔ.

Aya yɛ lipomepɛpɛ nɛ ki Paulo

12Medo Kristo Yesu gi onu blɔ Ɔkaɛ ɖase e, si aki mɛ kigagla kí yɛ axwɛ na. Medo ye ɖase gi azɛ mɛ aʋa aŋa a, xe ebú me si misumu ye e. 13Meze ɔnɔ gi tsa ɛ, mapani ebusioboe amani yɛ su, lɛ metí ye e, lɛ meze ɔnyraga a. Pɔ̀ Aya edi me asigaga a, lɛ ese linu si mabitɛ la ya ní kumetemete ni kumɔziŋa mɛ ɛ. 14Lɛ blɔ Ɔkaɛ ewlo ni me ni yɛ lipomepɛpɛ glegle le, kɔpɔni kuziŋa ni kunɔlɔ gi bidɔ ní Yesu Kristo me e.

15Liboe lɛ ya linu anukwarɛ liboe gi liziã si ɔnɔ kakaa ɔzɛ lɛ aʋa ŋa a, si Yesu Kristo aba kelea lia mɛ si yibu banɔ zimizi ba, lɛ mɛ menu ɔnɔ zimizi sani ba petee e, 16pɔ̀ kɔkpɛ lɛ ya loso e, Aya edi me asigaga atɔ gani mɛ banɔ zimizi ba ɔkaɛ aʋa ɛ, Kristo Yesu aabasɛ yɛ litɔplɛplɛkese kese gi liʋi blo o, ŋwisi liŋwitsɛ kinɛ ki banama gi biazɛ yɛ aʋa ŋa a, xe biamɔ ligbã́ moblo le e. 17Lɛ loso mlaki tɔ kukpɔ̀ blɔ Okusi ye gi ɔlɛ dɔni kanɔmɛ tsini kanɔmɛ, gi óʋitse e, gi ɔ́ʋiŋwi, Aya tolee, yɛ binɛ binu kubùbù yo ni kusudraa kɔtsinɔ kanɔmɛ anɔmɛ! Atɔ liba lɛ mɛ.

18Timoteo, mɛ obinyimee, maki wɔ ɔsã lɔ ya kɔkpɛ eboa la gi bɛpani plɛ ní wɔ su i. Wa eboa la ya su axwɛ ŋwisi wɔ bigutadɔ kinɛ ɛ, tɔ wɔata kigũ gbã. 19Ze ní wɔ kuziŋa ni wɔ begyodi gbã ʋa aʋa a. Banɔatɔ béxo eboa la ya oto o, lɛ bɛlila ba kuziŋa ŋwisi kiliɛ gi banɔ bɛzɛɛlila ba kude kinɛ ɛ. 20Himenayo ni Aleksandro beze ní banɔaklɔ ba kusi, lɛ mehe kutu aki ba gi makɔ ba akí Ozimizi ye; gi biaki si biamɔni ebusioboe la kupani tsini Aya su u.

Currently Selected:

1 Timo 1: avn

Highlight

Compare

Copy