2 Tesalo 2
2
Ozimizi ye axwɛ wawa la
1Maki mlɔ litukpo mɛ benemi ba, ní blɔ Ɔkaɛ Yesu yɛ Kristo kubabaa, ni blɔ likpɔkpɛkpɛ lɛ ni yɛ su kuzeze su i, 2mlakípisa ní mlɔ bedgyodi ʋa mɛ loo, tɔ mlawɔli ku ní kemeno mɛ si blɔ Ɔkaɛ yɛ liwe le liza kooko. Mlakízi banima eboe panipani la si kwipani lɛ ɛplɛ loo si kwiŋlimi nɛ ɛkpɛ ní keplekpa mɛ. 3Mlakíki si ɔnɔnɔ omeni mlo ní kudeo tɔtɔ onu u. Lɛ liwe le litrába kɔzɛna ni keduyɔyɔ gɔgɔa kɛba a, xe ɔnɔ zimizi ye e, gi yɛ linu si ɔtrɛ ní kifu moni ye me aŋu i. 4Yɛ atráyɔ kedu ya ní aya kakaa elu, loo kidɔ kakaa gi bize sumu i su i, kɔ akɔ isu ya edu bɛ petee onu i. Yɛ kura aatiku ní Aya yɛ lisɔligba lɛ mɛ lɛ aaxwa isu ya si Aya a.
5Mláplɛ aŋu na a? Masi mlɔ la ya lipoe lɛ gi meze ní mlɔ su i. 6Pɔ̀ kiditɔ kitsi kudeonu iiki yɛ abla, lɛ mlete ke. Ní lipoe gbã nɛ aʋa ɛ, ɔnɔ zimizi ye aaŋwi. 7Pɔ̀ litumu ne kutu monumonu yo kigaglaɛ ɛ, kiwa axwɛ na kooko, pɔ̀ liboe lɛ gi liaba ɛ, lítraba kɔzɛna ni si Aya ebu ɔniliɛ klɔ gi eetsi le kudeonu izanɔ. 8Kɔ able ke Aya ebu ɔnɔ zimizi ye edono e, pɔ̀ xegi Ɔkaɛ Yesu aba ɛ, aaye ye ni yɛ Ɔfuɛfuɛ nɔ gi ɛdɔni yɛ onugu lo mɛ lɛ aazizi ɔniliɛ klɔ ní yɛ kusudraa a. 9Ɔnɔ zimizi ye aaba ní Satana yɛ kigagla ɛ mɛ, lɛ aabitɛ asia na enugutseboe glegle ani eboe gi banima bamɔ edi i. 10Lɛ aakɔ̀ litukpo me gagla, ni kunɔmeno kakaa elu komeno banama gi biakyrɔ ɛ. Biakyrɔ lɛ ese linu si bázɛ liboe le e, lɛ bádimɛ ni anukwarɛɛ gi yɛ aaki si biamɔ kubúbú u. 11Lɛ loso e Aya aatsisi ba motemote gagla ɔtɔ gi aaki si biazɛ asia na aʋa ŋa a. 12Gani lɛ mɛ, ɛ banama pɔ́ gi bázɛ anukwarɛɛ aʋa ɛɛŋa ɛ, xe bɛmɔ isami nɛ ni eboe zimizi na kubitɛbitɛɔ ɛ, Aya aabu ba lipɔ.
Paulo akpɛ ɔna ba lipo tɔ balɛɛ gaglaa
13Benemi ba, lilɛ si kudo Aya ɖase lipoe kakaa ní mlɔ litukpo, mlɔ banama gi Ɔkaɛ alɔ ɛ. Lilɛ nite si Aya akya mlɔ dɔni ɔtɔpu kɔ ŋwisi banɔ tɔpu kí kubúbú gani Ɔfuɛfuɛ nɔ lɔ kigaglaɛ mɛ, tɔ babitɛ mlɔ yɛ banɔ dradra ba, ní mlɔ kuziŋa ní anukwarɛɛ mɛ. 14Aya axwa mlɔ aki lɛ ya gani Liboe Gbã nɛ gi kwipani iki mlɔ mɛ ɛ; yɛ axwa mlɔ atɔ mlaazi mlɔ ɔŋakɔ ní kuklekle me ni blɔ Ɔkaɛ Yesu Kristo. 15Lɛ loso e, blɔ benemi ba, mlalɛɛ mɔmɔmɔ, atɔ mlevu anukwarɛ mɛ ní awla gi kwibasɛ mlɔ ɛ, ní blɔ bidɔ basɛbasɛ ʋɛ ani ní blɔ kuplekpa ŋwlimiŋwlimi yɔ mɛ ɛ. 16Tɔ blɔ Ɔkaɛ Yesu Kristo yɛ ɔtutɔ ni Aya blɔ Ɔka gi alɔ blɔ ɛ, xe gani yɛ lipomepɛpɛ mɛ ɛ, akpɛ ɔna ní blɔ lipo lipoe kakaa, xe aki blɔ kudeonudidi gbã ɛ. 17Kwiʋi si ɔkpɛ mlɔ kigagla tɔ ɔkpɛ ɔna ni mlɔ lipo tɔ mlabitɛ eboe gbã lipoe kakaa ani tɔ mlapani Liboe Gbã kakaa.
Currently Selected:
2 Tesalo 2: avn
Highlight
Share
Compare
Copy
Want to have your highlights saved across all your devices? Sign up or sign in
© Ghana Institute of Linguistics, Literacy and Bible Translation, 2017 In cooperation with Wycliffe Bible Translators, Inc
