2 Korinto 7
7
1Agi eboa la ya a gi Aya aka aplɛ aki blɔ alɛ ní blɔ awla ɛ, mɛ baʋia dimɛnɔ ba, mlaki tɔ kudra blɔ isu ya su dɔni kidɔ kakaa gi kialulu blɔ isu ya a, ni blɔ Ɔfuɛfuɛ nɔ mɛ mɛ̀. Atɔ mlaki tɔ blɔ kudradraa kuna ki Aya yɛ kubùbù nì yɛ kusese.
Paulo Yɛ Isami nɛ
2Mlaki tɔ blɔ kyɛ kumɔ ozekɔ ní mlɔ ina nɛ mɛ. Kuʋíta ɔnɔnɔ ese e, kuʋíkyi ɔnɔnɔ ɛxla a, kuʋítafa ɔnɔnɔ ɔ. 3Maʋípani nite tɔ mikɔ ebú mlɔ lipɔ ɔ; mapani azanɔ si mleŋa kedzi ní blɔ ina nɛ mɛ si kwiaze ligba loo kwiatse ni mlo. 4Maka ní mlɔ aʋa mɔmɔmɔ; mizɛɛdɔ isu ní mlɔ aʋa. Mlɛkpɛ mɛ kigagla mɔmɔmɔ; lɛ ní blɔ baxixa ʋa petee me e, odukɔ ɔma ɔki mɛ isami nɛ ɛ.
5Lɛ gi kwiba Makedonia ɛ, blɔ kisugyaɛ liɛ ya kímɔ kusuyɔ; bɛzɛkpɛ blɔ kunugu yo ní kapɛ kakaa mɛ, gani kuboehe ní oge no, lifu ne ní kimɛ mɛ. 6Pɔ̀ Aya gi yɛ izɛɛyɔ ɔna ɛki banama a, gi ba ɔna ɛgbɔ ɛ, ayɔ blɔ ɔna gi Titus aba blɔ klɔ ɛ, 7lɛ aní yɛ kubaba tètè e, pɔ̀ ɔnayɔyɔ lɔ gi mlɛki yɛ ɛ. Asi blɔ kiliɛ gi mlɛpɛ si mlɛmɔ mɛ ɛ, mlɔ ɔna tata nɔ, kiliɛ gi mlɛkɔ lɛ mɛ ɛki mɛ ɛ, gi biki si mɛ isami nɛ isrɛ sanɔ ɔ.
8Lɛ xegi mɛ keplekpaa kákpɛ mlɔ isami kyɛ ɛ, litráve me e. Nya live me lipoe lɛ klɔ ɔkpɛ gi mamɔ si mɛ keplekpaa kákpɛ mlɔ isami kɔ ki lipoe kpekpemi itɔ fɛ ɛ. 9Pɔ̀ abla ɛ, isami iiku me, ani gi keplekpaa kákpɛ mlɔ isami loso o, pɔ̀ mlɔ asigaga la ɛki si mlekyi ɔna mɛ ɛ. Lɛ ese linu si mledzi basigaga nɛ kiliɛ gi Aya apɛ ɛ, lɛ loso e, ɔnɔnɔ ɔ́kpɛ mlɔ libi ní kude kutɔtɔ onu gani blɔ aʋa a. 10Xegi Aya aki si mleku ní asigaga mɛ ɛ, lɛ lizɛɛmani ɔna mɛ kukyikyi i, gi kɔ kuzɛɛki blɔ kubúbú yo o, xe kuʋímani “atɛsi metete” e, pɔ̀ kelea mɛ asigaga la ɛ, la izɛɛmani kutse. 11Mledi kidiliɛ gi asigaga la ya ní Aya yɛ aŋu mɛ ɛkpɛ ní mlɔ mɛ ɛ: kiliɛ gi mlɛzɛɛdu aŋu na a, kiliɛ gi mlɛzɛpɛ veve si mlɔ linɛ ligyɔ ɔ, kiliɛ gi mlezeyeʋi isu u, xegi mlemɔ liboe tɔ ɔ, gi liʋigyɔ ɛ, kiliɛ gi lifu ne lizeeku mlo o, xegi liboe zimizi litɔ liba mlɔ aʋa a, kiliɛ gi mlɛzɛpɛ si mlɛmɔ mɛ ɛ, kiliɛ gi mlɛzɛkɔ litɔ ní lɛ mɛ ɛ, kiliɛ gi mlalɛ ní kublabla mɛ si mlɛmɔ si bɛbitɛ eboe gbã a. Ni lipoe kakaa mɛ ɛ, mlebu isu ya ɛbasɛ si mláŋa lipɔ ní liboe lɛ ya mɛ ɛ. 12Loso agi maŋwlimi akí mlɔ ɛ, ani ɔniliɛ klɔ gi abitɛ liboe zimizi i, loo ɔniliɛ gi yɛ su bɛbitɛ liboe zimizi i manɔ, pɔ̀ ní Aya aŋu mɛ ɛ, mlɔ ɔtutɔ mlaamɔ kiliɛ gi mlɛkɔ isu ya ɛki blɔ ɛ. 13Gani lɛ petee me e, bɛkpɛ blɔ kigagla.
Kɔpɔni blɔ ɔtutɔ blɔ ɔnadɔdɔ lɔ ɛ, lize blɔ isami koŋ si kwimɔ Titus yɛ isami nɛ, lɛ ese linu si mlɔ petee mlɛkpɛ yɛ ɔna nɔ isami. 14Madɔ isu aki yɛ ní mlɔ su, lɛ mlákpɛ mɛ kuye e. Pɔ̀ lɛ kiliɛ gi liboe kakaaɛ lɛ ɛ, gi kwipani si mlɔ lilɛ ní lɛ mɛ ɛ, niteme ke blɔ kusudɔɔ ní mlɔ su kí Tito fɛ ɛ, kɔ kyɛ kunu anukwarɛ. 15Lɛ yɛ kudimɛnɔɔ ki mlɔ ɛ, kwikeme pɔnɔ xegi aplɛ aŋu si mlɔ petee mlenu kutu u, lɛ mlɛzi yɛ ni lifu ani kusugu u. 16Isami iku me si maaka ni mlɔ petee aʋa.
Currently Selected:
2 Korinto 7: avn
Highlight
Share
Compare
Copy
Want to have your highlights saved across all your devices? Sign up or sign in
© Ghana Institute of Linguistics, Literacy and Bible Translation, 2017 In cooperation with Wycliffe Bible Translators, Inc
