2 Korinto 6
6
1Ŋwisi Aya yɛ baxwɛwa glɔnɛ kinɛ ɛ, kwiki mlɔ litukpo si mlakíkɔ Aya yɛ lipomepɛpɛ nɛ gi mlɛzɛ ɛ, ŋwisi kidɔ gi kítrabu libi i. 2Lɛ ese linu si apani si,
“Gi lipoe le lina si mipɛ̀ lipo me ki mlɔ ɛ, mata mlɔ kutu u,
lɛ gi liwe lɛ aʋa a, gi lilɛ si mibu mlo lina ɛ, mapɔni mlɔ.”
Mɛsi mlɔ si abla Aya yɛ lipomepɛpɛ nɛ liwe le lina, abla yɛ kubúbú yo liwe le lina.
Paulo Yɛ Baxixa ʋa
3Kuʋíplɛ likla ni mlɔ kude me si mletu kikliʋi, tɔ biamɔ kunutsatsa tɔtɔ ní blɔ axwɛwawa la su. 4Pɔ̀ ŋwisi Aya yɛ banɔsumu kinɛ ɛ, kuzɛɛkpɔ̀ isu ya ní kude kakaa onu; ní igyidodo me; ní baxixa ʋa mɛ, ní kupepe ni ɔna kugbɔ̀gbɔ̀ mɛ ɛ. 5Kuzɛɛkpɔ̀ isu ní kukusì me, ligba kuzeze me, ní kedu kuyɔyɔ mɛ; ní axwɛ gagla la kuwawa mɛ, sramɔdɔmɔdɔ elesi ni kuʋɛ mɛ; 6kɔpɔnɔ ɛ, kuzɛɛbasɛ blɔ kusudraa ni eboe ese kununu yo, litɔplɛplɛkese kese ani asigagadidi; ní Ɔfuɛfuɛ Dradra lɔ mɛ, lɛ kuzɛɛbasɛ blɔ ɔna mɛ kunɔlɔ; 7ní anukwarɛ kudodo me, ni ní Aya yɛ kigaglaɛ mɛ ɛ, kwivu kude gyɔgyɔ kɔ bigutadɔ mɛ ní kaŋawla ni kaba mɛ. 8Lɛ gani kusudra ani kuyé me e, kunutsatsa nyani nyani ni kunutsatsa gbã mɛ ɛ; anukwarɛɛ benete pɔ̀ bɛxwa blɔ si basia nɛ ɛ; 9bɛbitɛ ŋwisi béte blo o, pɔ̀ ba pɔ́ bete blo o; bɛsi si kwitse, pɔ̀ mledi kuli ligbã́ nɛ ɛ; bekusi blo pɔ̀, baʋíye blo o. 10Kuli ní asigaga mɛ, pɔ̀ lipoe kakaa kuli ní isami mɛ ɛ; kwiku lipi le, pɔ̀ kwibitɛ banɔ glegle e, gi bedzi bexonete e; kwiŋwi ŋwisi kididɔ kíma ní blɔ awla a, pɔ̀ kidɔ kakaa kilɛ ní blɔ awla a.
11Kwipani iiki mlɔ ni ɔna faã Korintoanɛ ma, lɛ kwidra blɔ ina nɛ mɛ ɛki mlɔ. 12Kúkɔ blɔ kunɔlɔɔ kokpo mlo o, pɔ̀ mlɛ kɔ mlɔ kuni yɔ ɛkɔ ɛ kpo blo o. 13Ŋwisi kutsrɛtsrɛ gbã kinɛ ɛ; mɛɛpani ki mlɔ ŋwisi kí mɛ bebi kinɛ ɛ; lɛ loso e mlɔfɛ mladra mlɔ ina nɛ mɛ aki blɔ ŋwisi kiliɛ gi kwidra blɔ ini nɛ mɛ ɛki mlɔ kinɛ ɛ.
Mlakíkpɛ ɔha ni banama gi báziŋa a
14Mlakíkpɛ likpɔ ni banama gi báziŋa a. Lɛ ese linu si siŋanɛ woli lu si lɛ ní banama gi ba bede ʋa bɛgyɔ ɔ, ni banama gi benu litukpomegagla benete kusi i? loo ɔha kpɛkpɛ woli lu ɔlɛ ní kuklekle ni litumu ne kusi i? 15Likpɔkpɛkpɛ woli lu lilɛ ní Kristo ni Belial kusi i? #6:15 Belial onu Satana yɛ linyi dzedze. Ni si Hebri se me e, lɛ ese linu si “ɔnɔ gi ónu kididɔ ɔ.” Liboe woli lilɛ ní ɔʋaziŋaɛ ni ɔniliɛ gi ɔ́zɛ ŋa ɛ kusi i? 16Kunyánya woli lu kulɛ ní Aya yɛ lisɔligba lɛ ni babu ʋa kusi i? Lɛ ese linu si blɔ kunu Aya gbagbee yɛ lisɔligba lɛ. Ŋwisi kiliɛ gi Aya apani si i,
“Maaze nì ba
lɛ maaga ní ba kusi,
lɛ maaze bá Aya,
lɛ biaaze mɛ banɔ.”
17“Lɛ loso e, mledò ní ba kusi
tɔ mlebú lidze,
nite Ɔkaɛ apani.
Mlakígbɔni bidɔ gi bɛsu bídra a,
atɔ maazi mlɔ.”
18“Maaze Ɔka ki mlɔ,
lɛ mlaaze mɛ bebinyime ni mɛ bebidzɛ,
nite kigaglaɛ petee Ɔkaɛ Aya apani.”
Currently Selected:
2 Korinto 6: avn
Highlight
Share
Compare
Copy
Want to have your highlights saved across all your devices? Sign up or sign in
© Ghana Institute of Linguistics, Literacy and Bible Translation, 2017 In cooperation with Wycliffe Bible Translators, Inc
