2 Korinto 8

Paulo Akpɛ Ɔna mɛ Bidɔkɔkɔ Faã Kigagla

1Benemi ba, kwipɛ si mlete lipomepɛpɛɛ nɛ gi Aya akí Makedonia isɔliha lɛ ɛ. 2Dɔni kukenidi gagla mɛ ɛ, ba isami nɛ ni ba ɔzia nɔ bigbigba, gi bidzi bidɔkɔkɔ faã a, gi biku kumu yɔ ɔ. 3Lɛ mɛɛŋa katsalia ɛki ba si, bɛki bidɔ kiliɛ onu gi biatanɔ, sani ba kutanɔ kyɛ. Ní ba ɔtutɔ ba isuwla mɛ ɛ, 4beʋi dɔni blɔ iwla mɛ veve si kuki ba kudeonu tɔ ba kyɛ bamɔ ɔwakɔ ní lixwɛ nɛ ya mɛ ki banɔ dradra ba. 5Lɛ bábitɛ kiliɛ gi kwidi kudeonu ikɔ ɔ, pɔ̀ ní ɔtɔpu kɔ ɛ, bɛkɔ ba isu ya ɛki Ɔkaɛ, lɛ bɛkɔ isu ya ɛki blɔ ní Aya yɛ kupɛpɛɔ onu. 6Lɛ loso kwikpɛ Tito kigagla gi ekpese lixwɛ nɛ ya kooko e, tɔ aablo ni lipomepɛpɛ nɛ lixwɛ nɛ ya kyɛ ní mlɔ kapɛa mɛ ɛ. 7Pɔ̀ kiliɛ gi mlɛbitɛ sanɔ ní kidɔ kakaa mɛ ɛ, ní kuziŋaa mɛ, ní kupaniɔ mɛ, ní kuboeteo mɛ, ní anukwarɛ zizi mɛ ani mlɔ kunɔlɔɔ kí blɔ mɛ ɛ, mledi le ɔza si mlɔ fɛ mlɛbitɛ sanɔ ní lipomepɛpɛ nɛ bidɔkɔkɔɛ ʋɛ ya mɛ.

8Aní ɔsã mɛɛkpɛ ki mlɔ, pɔ̀ mapɛ si mífeke mlɔ kunɔlɔɔ kɔ anukwarɛ edi i, tɔ míkɔ kɔ ɛsrɔni banɔ gɔgɔ ba ba anukwarɛɛ. 9Lɛ ese linu si mlete blɔ Ɔkaɛ Yesu Kristo yɛ lipomepɛpɛ nɛ gi nya eze oxonete xe e, pɔ̀ kɔkpɛ mlɔ loso e, edzì opiplinete tɔ mlɔ kyɛ gani yɛ lipi le me e, mladzi bexonete.

10Lɛ mɛ kugbagba ki mlɔ ní kidiliɛ gi kisapɛ̀ ní liboe lɛ ya mɛ kinu si i, galigɔ lɛ ɛ, mlɔ mleeze banɔ tɔpu ba aní ní bidɔkɔkɔ ʋɛ mɛ tètè pɔ̀ ní kupɛ́pɛ si mlaabitɛ nite me kyɛ ɛ. 11Abla ɛ, mlebloni lixwɛ nɛ, atɔ la kublono e, kwiaze ŋwisi kiliɛ gi mlɛpɛ si mlɛbitɛ lɛ kinɛ ɛ, ní kiliɛ gi mlaatanɔ onu u. 12Lɛ xe kupɛ́pɛɔ kulɛ́ ɛ, biaazɛ mlɔ bidɔkɔkɔ ʋɛ ɛ, ní kidiliɛ gi kilɛ ni ɔnɔ kakaa awla ɛ onu, aní ní kidiliɛ gi kíma ní yɛ awla onu u.

13Aní blɔ kupɛ́pɛ linu si banɔatɔ bamɔ ɔnadɔdɔ tɔ mlɔ pɔ̀ bemi mlo akpɛ ɛ, boŋu i, tɔ mlɔ pɔ́ mleze ní kisɔsɔ mɛ. 14Ní lipoe lɛ ya mɛ ɛ, mlɔ bidɔ srɛsrɛ ʋɛ ɛ, biana ki ba baziazia ʋa atɔ xe mlɔ kyɛ mleku ní ɔzia mɛ ɛ, ba bidɔ srɛsrɛ ʋɛ biana ki mlɔ baziazia ʋa. Atɔ mlaze ni kisɔsɔ mɛ. 15Kiliɛ gi bɛŋwlimi kpɛ ni Aya liboe le me si i, “Ɔniliɛ gi atá yɛ ní kisrɛsrɛ mɛ ɛ, yɛ ɔni yɛ ɔ́sa srɛ ɛ, lɛ ɔniliɛ gi atá sisami kyɛ ɛ, yɛ ɔni yɛ ɔ́saɛ sisami.”

Bɛkpɛ Tito ní Korinto

16Medo Aya ɖase gi akpɛ lɛ ní Tito ɔna nɔ mɛ ɛ, si ɔkɔ litɔ ní lɛ mɛ ŋwisi kiliɛ gi makɔ litɔ ní lɛ mɛ aki mlɔ kinɛ ɛ. 17Lɛ ese linu si Tito ɔ́zɛ liboe le gi kwisi yɛ si ɔbitɛ tètè e, boŋu i, atrába nì yɛ ɔtutɔ yɛ kupɛpɛ vevee si tɔ yipɔni mlɔ nì yɛ ɔna nɔ petee e. 18Kɔpɔni yɛ ɛ, kwitsisi onemi ye gi yɛ isɔliha lɛ petee iikpɔ̀ kɔkpɛ yɛ ikù nɛ kukpɛkpɛɔ ki Liboe Gbã nɛ loso o. 19Lɛ kɔpɔnɔ ɛ, isɔliha lɛ iikya yɛ si ɔpɔni blɔ gi kwiikɔ ba bidɔkɔkɔ ʋɛ tsinɔ ɔ, gi blɔ ɔtutɔ kwitrɔ ɔ si kwikɔ ɛkpɛ kubùbù ní Ɔkaɛ ɔtutɔ lɔ su ani tɔ kubasɛ si kwikɔ lɛ mɛ si kwipɔnɔ ɔ.

20Kúpɛ si ɔnɔnɔ ɔki kunutsatsa zimizi utɔtɔ ní kiliɛ gi kwialɛ bidɔkɔkɔɛ ʋɛ ya a, gi bɛkɔ nì ɔna faã su u. 21Lɛ ese linu si kwipɛ si kuga kude gbã aní ní Aya tètè aŋu mɛ ɛ, pɔ̀ ní banima kyɛ aŋu mɛ ɛ.

22Kɔpɔnɔ ɛ, kwiikpɛ blɔ onemi ye nì ba kude; gi ebu abasi blɔ lipoe glegle ni ní bede glegle onu si kifu kilɛ ní yɛ mɛ ɛ, lɛ sanɔ ɛ, abasɛ si yɛ azɛ mlɔ aʋa aŋa. 23Tito kɔ ɛ, yɛ onu mɛ ɔgaglɔnɛɛ nì mɛ ɔxwɛwaglɔnɛ ní mlɔ kusi, blɔ benemi dzedze ba ɛ, ba bali ní isɔliha lɛ linyi ne me lɛ benu kubùbù kí Kristo. 24Lɛ loso mlabasɛ benyime ba ya mlɔ kunɔlɔɔ, nì kidiliɛ loso gi kuzɛɛdɔ isu ní mlɔ aʋa a, tɔ isɔliha lɛ petee biamɔ nɛ.

Currently Selected:

2 Korinto 8: avn

Highlight

Compare

Copy