2 Korinto 12

Eboa la gi Ɔkaɛ Ebu Abasi Paulo e

1Lilɛ si mitrɛ ní lɛ aʋa tɔ midɔ̀ isu ya, xegi lítrabu libi fɛ ɛ. Maapani ní eboa la gi Ɔkaɛ aki si mamɔ ní kubububasɛ uliɔ gi aki mɛ ɛ su. 2Mete onyime ɔtɔ ní Kristo me gi befeke tsinɔ ní lifunu ne ɔtanɛ klɔ#12:2 Ni Israɛl banɛ ma kusi i, bɛzi lɛ si bɛlɛ lifunu ne kpɛ ní izekɔ izekɔ mɛ, lɛ batɔ bɛziŋa si lifunu nɛ ɔtanɛ klɔ Aya ɔlɛ. Efesoanɛ ma 4:10 agɔ liɔfɔ ni tene la ya. Méte xe kisugyaɛ mɛ eze loo Ɔfuɛfuɛ nɔ mɛ eze e, xe liboe lɛ ya liba lɛ mɛ ɛ, pɔ̀ Aya ko ete e. 3Lɛ mete si ɔniliɛ ya ɛ, xe kisugyaɛ mɛ eze loo óze ní kisugyaɛ mɛ ɛ, méte; Aya ko ete. 4Lɛ mete si onyime liɛ ya ɛ, bɛtsini yɛ ní Paradiso ye me, lɛ enu eboa la su gi kinemi kitrátani kupani i, eboa la su gi báki ɔnɔ gbagbe kude si ɔpani i. 5Ɔniliɛ ya elu sú maadɔ isu ya, pɔ̀ mátradɔ̀ isu ya ní mɛ ɔtutɔ lɔ mɛ isu ya su u, sani si bidɔ bɛklɔ gi biabasɛ si mebotso e. 6Xe nya mapɛ si midɔ̀ isu ya ɛ, mátraze kanukpaʋi i, lɛ ese linu si maazɛpani anukwarɛɛ. Pɔ̀ mátradɔ̀ isu ya a, lɛ loso ɔnɔnɔ ɔ́tramɔ mɛ ɔnɔ ʋidi sani kiliɛ gi amɔ mɛ kidiliɛ gi mabitɛ ɛ, ni eboa la gi mapani i.

7Pɔ̀ tɔ mikíze ní kusufekeo ni kusudɔɔ mɛ ɛ, kɔkpɛ eboe ʋidi a la gi bebu ibasi mɛ loso ɛ, bɛkpɛ kunya gi kulɛ ŋwisi kibu kinɛ ɛ, ní mɛ isu ya mɛ, dɔni Ozimizi ye yɛ ɔxwɛdzɛ klɔ gi kwiwa axwɛ na tɔ mikifeke isu ya a. 8Tatá zizi maxwa Ɔkaɛ si ɔti lidɔtu i lɛ ya ní mɛ aʋa. 9Pɔ̀ ebu le onu si; “Mɛ lipomepɛpɛ nɛ lisrɛ ɛki wɔ, lɛ ese linu si mɛ kigaglaɛ kizɛɛna kɛ ɔna klɔ ní kubotsobotso me.” Lɛ loso maadɔ isu isanɔ nì isami ní mɛ kubotsobotsoo me e, atɔ Kristo yɛ kigaglaɛ kiaze ní mɛ aʋa. 10Lɛ ɔkpɛ Kristo loso e, lilɛ mɛ ole xegi mebotso o, xegi beekpini me e, xegi malɛ ní kuxixa mɛ ɛ, xegi bɛyɔ kedu ní mɛ su u, xegi eboe la aʋítrɛ lɛ aʋa ɛki mɛ mumɔ ɛ. Lɛ ese linu si, xegi mebotso e, kɔ malɛ gagla ɛ.

Paulo Akɔ litɔ lɛ mɛ akí Korintoanɛ ma

11Mabitɛ isu ya kanukpaʋi, pɔ̀ mlɔ mlɛkɔ ɔ, xe mabitɛ nite e. Mlɔ nya lilɛ si mlakpɔ mɛ xe e, Lɛ ese linu si aní ɔnɔ fiteete menu, xe bɛkɔ mɛ srɔni “banɔkpɛkpɛ gbã ba,” gani lɛ mɛ si ménu kididɔ fɛ ɛ. 12Kidiliɛ gi kizɛkpɛ banɔkpɛkpɛ ba gyesi i, gi kinu lixaŋu#12:12 Lixaŋu nɛ linu kidɔ gi kinu gyesi loo kidɔ gi bevu aŋu si kizɛɛba kɛ mɛ ni liboetɔ su. nɛ, enugutseboe, ni eboe mamɔ edi i, mabitɛ ʋɛ ní mlɔ kusi ni litɔplɛplɛkese kese glegle. 13Kiboebitɛ kitɔtɔ kilɛ gi mabitɛ aki isɔliha dzedze le e, gi mábitɛ aki mlɔ sani si mákɔ isu atrɔ ní mlɔ aʋa na a? Mlakɔ kesetataa lia akyɛ mɛ!

14Abla ɛ, malɛ ní kublabla mɛ si míba edi mlo kutanɛ, lɛ mátraze lidɔtu iiki mlɔ ɔ, lɛ ese linu si mlɔ ɔtutɔ lɔ mɛɛpɛ, aní kidiliɛ gi kiliɛ ní mlɔ awla a. Líziã si banuvɔ ba babla bidɔ aplɛ aki ba bapɔnɛ ba a, pɔ̀ linu si bapɔnɛ ba babla bidɔ aplɛ akí ba bebi ba. 15Liaze mɛ isami si miwa mɛ kidɔ kakaa su axwɛ aki mlɔ, kɔpɔni mɛ ɔtutɔ mɛ isu ya kyɛ. Lɛ xegi malɔ mlɔ asanɔ ɛ, mlaatí ní mlɔ kulɔlɔɔ kimɛ aʋa na a?

16Kiliɛ gi lilɛ ɛ, mlɛdimɛ si ménu lidɔtu aki mlɔ. Pɔ̀ ɔmɔnɛɛ gi menu i, mapunu mlɔ lɛ mevu mlo e. 17Maba mlɔ gani benyime ba ya gi makpɛ mlɔ klɔ aʋa na a? 18Makpɛ litukpo kese akí Tito si ɔba mlɔ klɔ, lɛ makpɛ mɛ onemi ye nì yɛ kude e. Tito ɔ́ba mlɔ, loo aba mlɔ na a? Aní Ɔfuɛfuɛ tole ni kude tule aʋa kwiga na?

19Kibu mleebu si gakɔna ni abla ɛ, isu litukpo kwiŋwlɛ ki mlɔ na a? Aní nite, kwipani ní Aya aŋu mɛ ŋwisi banɔ gi balɛ ní Kristo me e; lɛ baʋia dimɛnɔ ba, kidɔ kakaa gi kwibitɛ ɛ, kwibitɛ kɛ ɛki mlɔ kigagla kukpɛkpɛ. 20Lɛ ese linu si mese lifu si xegi meku ni klɔ ʋa ɛ, mátramɔ mlɔ kiliɛ gi maapɛ si mleze e, lɛ mlɔ fɛ ɛ, mlátramɔ mɛ kiliɛ gi mlaapɛ si mize e. Meese lifu ne si maamɔ avitɛ, kaŋuzá, kusuyeʋi, kulɛlɛ, banɔ su kuzizi, kunugu kugugu ní banɔ su, kusudɔ ni kapisa ní mlɔ ɔma nɔ mɛ ɛ. 21Meese lifu si xegi maba mlɔ klɔ dzɛ ɛ, mɛ Aya aaple nì me ní mlɔ aŋu mɛ, lɛ ɔna aata mɛ ɔkpɛ banɔ glegle ba ya gi bɛta kese zanɔ ɛ, xe békyi ɔna mɛ ní ba anyaniboe la mɛ, ba kihasi ye ni kuda ŋwɛŋwɛ kpaŋukpaŋu mɛ ɛ.

Currently Selected:

2 Korinto 12: avn

Highlight

Compare

Copy