2 Korinto 13
13
Paulo yɛ Kugbágba Gɔgɔɔ
1Kutánɛ kɔya gi matradi mlo o. Kwite si “Liboe kakaa ɛ, linu si banɔ tiaʋa loo tiata beze gi biaŋa katsalia ki lɛ ɛ.”#13:1 Mose yɛ keplekpa tsunɛ ka 19:15. 2Magba mlɔ lipoe lɛ gi maba mlɔ klɔ kuʋla a. Meedzini lɛ ɛpani abla gi máma ní mlɔ kusi i, si; xegi madziba dzɛ ɛ, mátradi banama gi bɛbitɛ eboe zimizi na ɛzanɔ ɔ, loo ɔnɔ dzedze ɔ́tɔtɔ asigaga. 3Agi mlɛpɛ si mleete si Kristo eegu kunugu igani mɛ aʋa ɛ, lɛ ya linu likla trɔtrɔ si ónu ɔnɔ gi kigagla kíma ní yɛ awla a, xe abitɛ kiditɔ aki mlɔ ɔ; boŋu i, abasi yɛ kigaglaɛ ní mlɔ kusi. 4Lɛ ese linu si tɔ kuka lɛ aʋa ɛ, beku ye ní ose lo su ŋwisi ɔnɔ gi kigagla kíma ní yɛ su kinɛ ɛ, pɔ̀ ɔlɛ ligbã́ nɛ gani Aya yɛ kigaglaɛ mɛ ɛ. Nite me ke blɔ kyɛ ɛ, ní likpɔ kpɛkpɛ mɛ nì yɛ ɛ, kigagla kíma ní blɔ su u; pɔ̀ gani Aya yɛ kigaglaɛ mɛ ɛ, kwiaze ligbã́ ni yɛ tɔ kwiasumu mlo.
5Mlatapo mlɔ isu ya edi si mlalɛ ní kuziŋaa mɛ na a; tɔ mlaxwa litsi ni ìsu ya a. Kɔ mlamɔ ogyesi si Kristo Yesu ɔlɛ ní mlɔ mɛ na a? Kɔ kiwɔli mlɛ wɔli petee, lɛ ko mlatrámɔ egyesi i. 6Maka lɛ aʋa si mlaamɔ egyesi si kúwɔli ní kufekedi yo me e. 7Abla ɛ, kwixwa Aya si mlakíbitɛ liboe zimizi i tɔtɔ. Aní si tɔ banima biamɔ ogyesi si mlɛŋa kufekedi yo aʋa loso o, pɔ̀ tɔ̀ mlabitɛ kidiliɛ gi kinu kigbã ɛ, xegi liiŋwi ki banima si kwiwɔli kyɛ ɛ. 8Lɛ ese linu si kutrátani kedu kuyɔ ní anukwarɛɛ su u, sani si kulɛ ni anukwarɛɛ kude. 9Isami izeeku blo xe kigagla kíma ní blɔ mɛ ɛ, pɔ̀ xe mlɔ pɔ̀ mlalɛ gagla ɛ; lɛ loso kuzɛɛxwa Aya si tɔ mlana a. 10Liboe lɛ ya loso maŋwlimi eboa la ya aki mlɔ gi máma ní mlɔ su u; tɔ xegi maba ɛ, litrázia si mihe eboe gagla ni mlɔ ní mɛ ozeklɔ onu. Ozekɔ ɔlɔ gi Ɔkaɛ aki mɛ ki mlɔ kutsitsi i, aní si tɔ mikɔ zizi mlo o.
Kunɔpanɔ gɔgɔɔ
11Tɔ miblono e, mɛ benemi ba, mleze mumɔ! Mlekeni edi tɔ mlana; mlenu mɛ liboe le; mleze ni kugyodi tule; atɔ mleze ní kusuyɔ mɛ. Tɔ kunɔlɔɔ ni kusuyɔɔ Aya oze ni mlo.
12Mlakpɛ mlɔ ahanuglɔ ba wolaa ni ɔna dradra. 13Aya yɛ banima petee bɛtsisi mlɔ ba kunɔpanɔɔ.
14Tɔ blɔ Ɔkaɛ Yesu Kristo yɛ lipomepɛpɛ nɛ ni Aya yɛ kunɔlɔɔ ani Ɔfuɛfuɛ Dradra nɔ lɔ likpɔkpɛkpɛ lɛ lize ni mlɔ petee.
Currently Selected:
2 Korinto 13: avn
Highlight
Share
Compare
Copy
Want to have your highlights saved across all your devices? Sign up or sign in
© Ghana Institute of Linguistics, Literacy and Bible Translation, 2017 In cooperation with Wycliffe Bible Translators, Inc
