1 Timo 2

Kiliɛ gi biasumu ní ɔha kusi i

1Ní okpese kɔ ɛ, mapɛ si mlete si lilɛ si mleʋi bidɔ, mlafa ní banɔ litukpo, mlaxwa Aya ní ɔnɔ kakaa litukpo, lɛ mledo Aya ɖase ní kidiliɛ gi abitɛ aki ɔnɔ kakaa a, 2kí bekusi ba ni banama petee gi bedi ní banɔ onu i, tɔ kwiaze ní kusuyɔ ɔ, ni ligbã́ gi lidɔ kpoo me e, atɔ kwiaze ligba kiliɛ gi Aya apɛ ɛ, ani tɔ blɔ su iadra. 3Aya kuxwaxwa ni banima litukpo te e, kwipɛ̀ lɛ kuzeeku Aya blɔ Obúbú ye aŋu u, 4gi yɛ apɛ si ɔnɔ kakaa a, ɔmɔ kubúbú tɔ ote anukwarɛɛ. 5Lɛ ese linu si Aya tole ɔlɛ, ɔnɔ tole ɔlɛ gi yɛ ɔlɛ ní Aya ni banima kusi i, yɛ onu Yesu Kristo, 6gi akɔ isu akyɛ ní ɔnɔ kakaa litukpo o. Bɛ bibasɛ si ní lipoe gbã nɛ aʋa ɛ, Aya apɛ si ɔnɔ kakaa ɔmɔ kubúbú. 7Lɛ loso Aya edu me ɔklakla ni ɔnɔkpɛkpɛ, ani Liboe Gbã nɛ ɔdɔbasɛ kí banama gi bénu Yudanɛ ɛ, ní kuziŋaa ni anukwarɛɛ mɛ ɛ, máʋisɛ asia a.

8Lɛ xe mlɛtsa si mleesumu Aya ɛ, mapɛ si benyime ba baxwa Aya ni ba iwla lɛ ní lifune, gi kusuyeʋi loo eboe hehe atráze ní lɛ mɛ ɛ. 9Mapɛ fɛ si badzɛ ba beze mumɔ ní ba bidɔkpɛkpɛ ʋɛ mɛ, tɔ bakpɛ ewu Gbã; aní ni siya kunyánya ede ede, loo ni sika ni ihwia, loo ni basa gi bɛzi kedzi i, 10pɔ̀ ní eboe gbã kubitɛ mɛ, gi ɛsrɔnɔ ɔ, ɛki badzɛa ba gi bete si beesumu Aya ɛ.

11Lilɛ si badzɛ ba badɔ zĩi, tɔ babùbɔ isu ya, atɔ bakpasi bidɔ. 12Máki ba kudeonu si ba basɛ bidɔ loo bamɔ kigagla ní benyime ba aʋa a; pɔ̀ ba dà ba inugu le e. 13Lɛ ese linu si Adam yɛ Aya etu bitɛ ɛ, xe ableke abitɛ Eva a. 14Lɛ aní Adam ozimizi ye emeno o; boŋu i, ɔdzɛɛ yɛ bemeno xe ata Aya yɛ ɔsã nɔ ɛse e. 15Pɔ̀ biaabu ɔdzɛ gani yɛ kubipɔ mɛ ɛ, xe alɛɛ gagla ní kuziŋa, kunɔlɔ, kusudra ni isu aʋa kuŋaŋa mɛ ɛ.

Currently Selected:

1 Timo 2: avn

Highlight

Compare

Copy