1 Timo 3
3
Ɔha lɔ onu bezeze ba ba ligbã́zeze ne
1Liboe lɛ ya linu anukwarɛ si, xe ɔnutɔ apɛ si yiwa ɔha ɔʋadi ye axwɛ ɛ, yɛ kupɛpɛɔ kunu kugbã. 2Lɛ loso líma si kesetataa tɔtɔ keze ní ɔha lɔ ɔʋadi ye su u; lilɛ si ɔdzɛ tole ko oze ní yɛ awla, ɔbùbɔ̀ isu ya, ɔŋa isu aʋa, kubùbù kuze ní yɛ su, oze ɔnɔ gi izɛzi bababa ɛkpɛ ní yɛ kepea mɛ ɛ, lilɛ si ɔtani bidɔ kubasɛ; 3líma si oze ɔdaŋwɛ loo ɔnɔ gi izɛɛwa anyra a, pɔ̀ oze ɔnɔ gi izɛɛplɛ litɔ kese e, oze ɔnɔ gi óʋigu avitɛ ɛ, líma si oze ɔnɔ gi adimɛ ni kibɔ ɔ; 4lilɛ si ɔgani yɛ kepea mɔmɔɔmɔ atɔ ɔki Yebi ba benu kutu aki yɛ ɛ, atɔ baki yɛ kubùbù ni kapɛ kakaa mɛ. 5Xegi onyime óte kiliɛ gi aaga ni yɛ ɔtutɔ yɛ kepaɛ ɛ, kitɛ aatani Aya yɛ ɔha lɔ aʋa kudi i? 6Líma si oze ɔnɔ vuvu ní kuziŋa mɛ ɛ, xe aní nite e, yɛ litukpo le liaye ni kusufeke, kɔ Aya ebu ye lipɔ ŋwisi kiliɛ gi ebu ozimizi ye lipɔ kinɛ ɛ. 7Lilɛ si oze ɔnɔ gi banama gi báma ní baʋaziŋa ba ɔha lɔ mɛ kyɛ ɛ, bizɛkpɛ kubùbù ní yɛ su, atɔ bakíkpɛ yɛ kuye e, tɔ aawɔli ku ní ozimizi ye yɛ kupe me.
Banɔpɔnɔ ba Ní Ɔha lɔ mɛ
8Lilɛ si banɔpɔnɔ ba ni baʋaziŋa ba ní Ɔha lɔ mɛ kyɛ ɛ, beze benyime gi kizeze me gbã kilɛ ní ba awla, tɔ anukwarɛ oze ní ba awla, bakísa kuda kuŋwɛ ɛ, lɛ bakípɛ́ kibɔ gani kude mɔgyɔmɔgyɔ aʋa a. 9Lilɛ si bevu kuziŋaa kɔ anukwarɛɛ yɛ kidzudzu ye mɛ gi Aya ebu abasɛ ɛ, ni ɔna dradra. 10Lilɛ si befeke ba edi ní ɔtɔpu kɔ, lɛ xe bɛga lɛ mɛ edo e, lɛ ko biasumu ŋwisi ɔha lɔ banɔpɔnɔ ba kinɛ ɛ. 11Lilɛ si ba bedze ba fɛ ɛ, ligbã́ gbã lize ní ba awla, bakíze onugutro begugu u; ba bùbɔ isu ya tɔ baplɛ litɔ kese, lilɛ si beze banɔ gi biazɛ ba aʋa aŋa ní kidɔ kakaa mɛ ɛ. 12Mledi le aʋa si ɔdzɛ tole ko aaze ní Ɔha lɔ ɔnɔpɔnɔɛ awla, tɔ odi yɛ bebi ba ni yɛ kepea aʋa mɔmɔɔmɔ. 13Banɔpɔnɔ ba klɔ gi bɛwa ba axwɛ na mɔmɔɔmɔ ɛ, biamɔ ɔlɛkɔ gbã kí isu ya, lɛ biapani lifumose ní ba kuziŋa su ní Yesu Kristo me.
Liboe Kpokpo Ʋidi le
14Agi mɛɛŋwlimi keplekpa lia ya ɛki wɔ kyɛ ɛ, mapɛ si maaba di wo kpekpemi i. 15Pɔ̀ xe mawɔ kede kyɛ ɛ, keplekpaa lia ya kiabasɛ wɔ kiliɛ gi kwiaga ni isu ya a, ŋwisi Aya yɛ kepea mɛ banɔ kinɛ ɛ. Kepea lia mɛ banima ɛ, ba benu banama petee gi bɛziŋa a, xe benu Aya gbagbe yɛ banɛ ɛ, baʋaziŋa ba ya ba besumu, xe bevu anukwarɛɛ tututu ŋwisi kiliɛ ɛ, gi ɔxɔ lɔ ni kakpaa kizeevu ligba lɛ ɛ, xe líʋihwa kinɛ ɛ. 16Ɔnɔnɔ ɔ́tratani lɛ kunada si tɔ kuze ŋwisi kiliɛ gi Aya apɛ ɛ, linu liboe kpokpo ni linugutseboe ʋidi i:
“Ebu isu ya abasɛ ni ɔnɔ kilɛlɛ mɛ,
Aya yɛ Ɔfuɛfuɛ nɔ ɛbasɛ si aŋwɛ eyi,
lɛ Aya yɛ baxwɛdzɛ ba bɛmɔ yɛ ɛ.
Bɛ sɔli yɛ ní amade na kusi,
banɔ glegle bɛzi yɛ aʋa ɛɛŋa ní kelea pɔ́ mɛ,
lɛ befeke ye ní kuklekle me tsini lifunu ne e.”
Currently Selected:
1 Timo 3: avn
Highlight
Share
Compare
Copy
Want to have your highlights saved across all your devices? Sign up or sign in
© Ghana Institute of Linguistics, Literacy and Bible Translation, 2017 In cooperation with Wycliffe Bible Translators, Inc
