1 Yoh 4
4
Anukwarɛɛ ni Asia na Ifuɛfuɛ nɛ
1Mɛ baʋia dimɛnɔ ba, mlakízɛ banama petee gi bɛɛpani si Ɔfuɛfuɛ nɔ ɔlɛ ní ba awla ɛ aʋa ɛɛŋa, pɔ̀ mlapami lɛ mɛ tɔ mledi xe Ɔfuɛfuɛ nɔ ɛdɔ ní Aya kɔ ɔ. Lɛ ese linu si asia na beboedoplɛ glegle bɛlɛ eku kelea mɛ ɔkɔ kakaa. 2Gani kudeo liɔ ya onu i, mlate xe onu Aya yɛ Ɔfuɛfuɛ: ɔnɔ kakaa gi azɛ lɛ ɛ, xe ebu le edo si Yesu Kristo aba ŋwisi ɔnɔ gbagbe kinɛ ɛ, yɛ mɛ Aya Ɔfuɛfuɛ nɔ ɔkpasi. 3Pɔ̀ ɔnɔ kakaa gi anada liboe lɛ ya ní Yesu su i, yɛ Ɔfuɛfuɛ nɔ ɔdɔ Aya kɔ ɔ. Ɔfuɛfuɛ ɔnɔ gi ɔlɛ ní yɛ mɛ ɛ, ɛdɔ ní Kristo yɛ ahwafiɔnɛɛ kɔ; mlenu si aaba, lɛ abla ɛ ɔlɛ ní kelea mɛ kooko.
4Pɔ̀ mlɔ mɛ bebi dimɛnɔ ba, mlenu Aya banɛ, lɛ mlɛŋa asia na beboedoplɛ ba aʋa, lɛ ese linu si Ɔfuɛfuɛ nɔ gi ɔkpasi ní mlɔ mɛ ɛ, ɔlɛ gagla sani Ɔfuɛfuɛ ɔnɔ gi ɔkpasi ní kelea mɛ banima mɛ ɛ. 5Asia na beboedoplɛ ba klɔ ba ɛ, bizɛɛpani ní kelea mɛ eboe la su, lɛ kelea mɛ kizɛta ba kutu, lɛ ese linu si bɛdɔ kelea mɛ. 6Pɔ̀ blɔ kunu Aya banɛ. Ɔniliɛ klɔ gi ete Aya ɛ, izɛɛta blɔ kutu, ɔniliɛ klɔ gi ónu Aya ɔnɛ ɛ, ɔʋíta blɔ kutu u. Gani lɛ mɛ ɛ, kwiate lidzegaga ni anukwarɛ Ɔfuɛfuɛ nɔ ni asia na Ɔfuɛfuɛ nɔ kusi.
Aya onu Kulɔlɔ
7Mɛ baʋia dimɛnɔ ba, mlaki tɔ kulɔ blɔ ahanuglɔ ba, lɛ ese linu si kulɔlɔ kwidɔ ní Aya klɔ. Ɔnɔ kakaa gi izɛɛlɔ banɔ ɛ, onu Aya Yebi, lɛ etè Aya. 8Ɔniliɛ gi ɔ́lɔ banɔ ɛ, óte Aya a, lɛ ese linu si Aya onu kulɔlɔ. 9Lɛ Aya ebu yɛ kulɔlɔɔ abasɛ blɔ, gani kude uliɔ ya onu gi atsisi Yebi tolee ní kelea mɛ, tɔ kwiamɔ ligbã́ gani yɛ aʋa a. 10Lɛ ya linu kulɔlɔ. Aní si kwilɔ Aya, pɔ̀ yɛ alɔ blɔ, gi akɔ̀ Yebi ye akɔ ní blɔ eboe zimizi na litukpo tɔ gani yɛ aʋa ɛ, biakɔ blɔ eboe zimizi na kɔkyɛ. 11Mɛ baʋia dimɛnɔ ba, xe nite Aya alɔ blɔ ɛ, kɔlɔ lilɛ si kulɔ blɔ ahanuglɔ ba. 12Ɔnɔnɔ ɔ́mɔ Aya oʋídi i, pɔ̀ xe kwilɔ blɔ ahanuglɔ ba ɛ, Aya ɔlɛ ní likpɔkpɛkpɛ mɛ nì blɔ, lɛ yɛ kulɔlɔɔ kwiflɔ ní blɔ mɛ.
13Kwitrɔ likla lɛ aʋa si kulɛ ní likpɔkpɛkpɛ mɛ nì Aya, lɛ ɔlɛ ní likpɔkpɛkpɛ mɛ ni blɔ, lɛ ese linu si aki blɔ yɛ Ɔfuɛfuɛ nɔ. 14Lɛ kwimɔ ɔ, lɛ kwisi banɔ gɔgɔ ba si, Aya atsisi Yebi ye si ɔga aabu kelea mɛ. 15Xe ɔnutɔ ebu le edo si Yesu yɛ onu Aya Yebi ye e, ɔlɛ ní likpɔkpɛkpɛ mɛ ni Aya, lɛ Aya ɔlɛ ní likpɔkpɛkpɛ mɛ ni yɛ ɛ. 16Lɛ blɔ ɔtutɔ kwite e, lɛ kwizi Aya yɛ kulɔlɔ aki blɔ aʋa ɛɛŋa a.
Aya onu kulɔlɔ, lɛ banama gi balɛ ní kulɔlɔ mɛ ni ba ahanuglɔ ba ɛ, balɛ ní likpɔkpɛkpɛ mɛ ni Aya, lɛ Aya ɔlɛ ní likpɔkpɛkpɛ mɛ ni ba a. 17Gani kude uliɔ ya onu i, bɛbitɛ kulɔlɔɔ si kuflɔ ní blɔ kusi, tɔ ɔna aaze blɔ lipo ní Litsixwawe le aʋa, lɛ ɔna aaze blɔ lipo lɛ ese linu si blɔ ligba nɛ ní kelea mɛ ɛ, lilɛ ŋwisi Kristo yɛ lini nɛ kinɛ ɛ. 18Lifu kusese líma ní kulɔlɔ mɛ ɛ, kulɔlɔ gi kwiflɔ ɛ, kuzɛɛkpikpini lifu kusese kakaa. Loso e, kulɔlɔɔ kúflɔ ní ɔnɔ gi onu ofufluse me e, lɛ ese linu si kutuhehe kuzɛ mani lifu.
19Kuzɛɛlɔ lɛ ese linu si Aya yɛ etu blo kulɔ. 20Xe ɔnutɔ apani si malɔ Aya a, pɔ̀ evu yenemi nɛ akpɛ lipo me e, onu ɔsia nɛ. Lɛ ese linu si ɔnɔnɔ ɔ́tratani Aya gi baʋímɔ ɛ kulɔ, xe ɔ́lɔ yenemi ye gi ɛɛmɔ ɔ. 21Ɔsã lɔ klɔ gi Yesu aki blɔ onu si, banama petee gi bɛlɔ Aya ɛ, lilɛ si balɔ ba benemi ba fɛ.
Currently Selected:
1 Yoh 4: avn
Highlight
Share
Compare
Copy
Want to have your highlights saved across all your devices? Sign up or sign in
© Ghana Institute of Linguistics, Literacy and Bible Translation, 2017 In cooperation with Wycliffe Bible Translators, Inc
