1 Yoh 3
3
Aya Yɛ bebi kunu
1Mledi kiliɛ gbɛgbɛ gi Aya alɔ blɔ ɛ! Yɛ kulɔlɔ kwisrɛ si baxwa blɔ si Aya yɛ bebi ba, lɛ ní anukwarɛ mɛ ɛ, yɛ bebi kunu, lɛ ya loso kelea mɛ kéte blo, lɛ ese linu si kéte Aya a. 2Baʋia lɔlɔ ba, abla ɛ, kunu Aya yɛ bebi, pɔ̀ lɛ mɛ lídra mumɔ kidiliɛ gi kwiadzi i. Pɔ̀ kwite si xe Kristo aaŋwi i, kwiaze ŋwisi yɛ kiniɛ ɛ, lɛ ese linu si kwiamɔ yɛ kiliɛ ɖii gi ɔlɛ ɛ. 3Ɔnɔ kakaa awla gi kudeonudidi uliɔ ya kulɛ ní Kristo me e, izɛɛbitɛ isu ɔnɔ dradra ŋwisi kiliɛ gi Kristo adra kinɛ ɛ.
4Ɔnɔ kakaa gi abitɛ eboe zimizi i, yɛ eboe zimizi na ɛta ɔsã nɔ ese, lɛ ese linu si eboe zimizi kubitɛ kunu ɔsã ese kutata. 5Mlete si Kristo aŋwi tɔ yibu eboe zimizi na ɛzanɔ, lɛ liboe zimizii tɔtɔ líma ní yɛ mɛ ɛ. 6Lɛ loso ɔnɔ kakaa gi ɔlɛ ní likpɔkpɛkpɛ mɛ ni Kristo e, ɔʋíze eboe zimizi aʋa a; pɔ̀ ɔniliɛ gi ɔlɛ ní eboe zimizi aʋa ɛ, ɔ́mɔ yɛ odi i, loo óte ye e.
7Mɛ bebi ba! Mlakíki tɔ ɔnɔnɔ omeni mlo o. Ɔniliɛ klɔ gi izɛbitɛ eboe gbã ɛ, ɔnɔ dradra onu, ŋwisi kiliɛ gi Kristo onu ɔnɔ dradra kinɛ ɛ. 8Ɔniliɛ gi ɔtini eboe zimizi aʋa ɛ, onu Ozimizi ye ɔnɛ, lɛ ese linu si Ozimizi ye abitɛ eboe zimizi dɔni okpese klɔ ke. Aya Yebi ye aba ní liboe lɛ ya ɖii loso, tɔ yizizi kidiliɛ gi Ozimizi ye abitɛ ɛ.
9Aya yɛ bebi ba mɛ ɔtɔtɔ ɔ́trazɛɛbitɛ eboe zimizi tsinɔ ɔ, lɛ ese linu si Aya yɛ kilu ye kilɛ ní ba mɛ, lɛ agi Aya onu ba Ɔka onu i, bátratani eboe zimizi aʋa kutrɛ ɛ. 10Lɛ libu lidzegaga nɛ ɛbasɛ ní Aya yɛ bebi ba ni Ozimizi ye yɛ bebi ba kusi, banama petee gi baʋíbitɛ eboe gbã loo baʋídimɛ ni ba ahanuglɔ ba ɛ, bénu Aya yɛ bebi i.
Mlalɔ mlɔ ahanuglɔ ba
11Liboe lɛ gi mlenu idɔni okpese klɔ ɛ, lɛ linu si; lilɛ si kulɔ blɔ ahanuglɔ ba. 12Líma si kuze ŋwisi Kain gi, eze Ozimizi ye ɔnɛ kinɛ, xe eye yɛ ɔtutɔ yenemi ye Abel. Ege lɛ loso Kain eye ye e? Lɛ ese linu si yɛ ɔtutɔ yɛ kiboebitɛɛ kípɛ ɛ, pɔ̀ yenemi ye Abel yɛ kiboebitɛɛ kipɛ ɛ.
13Loso e, mɛ benemi ba, likítu mlo kugyɔ ɔ, xe kelea mɛ banima bevu mlo ekpɛ lipo me e. 14Kwite si kwisɛ ní kutse su lɛ kwiba ligbã́ nɛ mɛ ɛ, kwite le nite lɛ ese linu si kwidimɛ ni blɔ benemi ba. Ɔniliɛ gi ɔ́dimɛ ni banɔ ɛ, yɛ ɔkpasi ní kutseo kigaglaɛ ese kokooko. 15Banama pɔ́ gi bevu banima ɛkpɛ lipo me e, ba benu banɔye ba, lɛ mlete si banɔye ba ɛ ligbã́moblo le limá ní ba mɛ ɛ.
16Nite kwite kiliɛ gi kunɔlɔɔ kulɛ ɛ: si Yesu Kristo akɔ yɛ ligbã́ nɛ akyɛ kí blɔ. Blɔ fɛ, lilɛ si kukɔ blɔ agbã́ na akyɛ aki blɔ benemi ba. 17Xe bexonete bɛmɔ benemi gi balɛ ní kuziãziã mɛ ɛ, xe bákɔ litɔtɔ ní lɛ mɛ aki ba ɛ, batrátani kupani si bɛlɔ Aya a. 18Mɛ bebi dimɛnɔ ba, líma si blɔ kunɔlɔɔ kuze kupani ko o, lilɛ si kuze anukwarɛ kunɔlɔ gi kwibasɛ isu ní axwɛwawa mɛ ɛ.
Ɔna ɔlɛ ní Blɔ Lipo ní Aya Aŋu mɛ
19Nite kwiate si kulɛ ní anukwarɛɛ mɛ, lɛ nite kwiatrɔ likla lɛ aʋa ki isu ya ní Aya aŋu mɛ. 20Xe blɔ ina nɛ ibu blɔ lipɔ ɛ, kwite si Aya ekeme asani blɔ ina nɛ, lɛ ete liboe kakaa a.
21Lɛ loso e, mɛ baʋia dimɛnɔ ba, xe blɔ ina nɛ íbu blo lipɔ ɛ, kɔlɔ ɔna ɔlɛ ní blɔ lipo ní Aya aŋu mɛ. 22Kuzɛɛzɛ kidɔ kakaa gi kwiʋi dɔni yɛ iwla mɛ ɛ, lɛ ese linu si kuzɛɛbitɛ ní yɛ isã nɛ aʋa, lɛ kuzɛɛbitɛ kidiliɛ gi kiku yɛ liŋu i. 23Yɛ ɔsã nɔ onu si kuzɛ Yebi ye Yesu Kristo aʋa ŋa, tɔ kudimɛ ni blɔ ahanuglɔ ba, kiliɛ gi Yesu akpɛ ɔsã nɔ aki blɔ ɛ. 24Banama gi bizɛga ní Aya ɔsã nɔ aʋa ɛ, balɛ ní likpɔkpɛkpɛ mɛ ni Aya. Lɛ Aya fɛ ɛ, ɔlɛ ní likpɔkpɛkpɛ mɛ ni ba. Lɛ kɔkpɛ Ɔfuɛfuɛ nɔ gi Aya aki blɔ onu i, kwite si Aya ɔlɛ ní likpɔkpɛkpɛ mɛ ni blɔ.
Currently Selected:
1 Yoh 3: avn
Highlight
Share
Compare
Copy
Want to have your highlights saved across all your devices? Sign up or sign in
© Ghana Institute of Linguistics, Literacy and Bible Translation, 2017 In cooperation with Wycliffe Bible Translators, Inc
