1 Yoh 5

Kwiŋa Kelea mɛ Aʋa

1Ɔniliɛ gi onu Aya Yebi i, yɛ azɛ lɛ aʋa aŋa si, Yesu yɛ onu Kristo ye, ɔniliɛ gi Aya atsisi i, lɛ ɔniliɛ klɔ gi alɔ Aya ɛ, alɔ Yebi ye fɛ. 2Nite kuzeete si kwilɔ Aya yɛ bebi ba, gani Aya kulɔlɔ mɛ nì yɛ ɔsã nɔ aʋa kubitɛ mɛ. 3Lɛ blɔ kulɔlɔ ki Aya ɛ, kɔ ese kunu si kuzɛɛbitɛ ní yɛ isã nɛ aʋa. Lɛ yɛ isã nɛ ɛ, ísã ɛgagla ɛki blɔ ɔ, 4lɛ ese linu si Aya Yebi kakaa aatani kelea aʋa kuŋa. Lɛ gani blɔ kuziŋaa mɛ ɛ, kuzɛɛŋa kelea aʋa. 5Nyaŋwɛ aatani kelea aʋa kuŋa a? Ɔniliɛ klɔ ko gi azɛ lɛ aʋa aŋa si Yesu yɛ onu Aya Yebi ye e.

Kidiliɛ gi kinu Katsalia ní Yesu su i

6Yesu Kristo yɛ onu ɔniliɛ gi aba a, gani kunikpɛkpɛ ni kutse gani ika kubali mɛ ɛ. Ɔ́ba gani kuni tete me e, pɔ̀ aba gani kuni ni ika mɛ ɛ. Lɛ Ɔfuɛfuɛ nɔ ɔtutɔ ɛɛpani si linu anukwarɛ, lɛ ese linu si Ɔfuɛfuɛ nɔ onu anukwarɛɛ. 7Bidɔ tuta biŋa Katsalia. 8Ɔfuɛfuɛ nɔ, kuni yo, ani ika lɛ, lɛ bɛ tuta pɔ́ biipani liboe de tile e. 9Kuzɛɛzɛ banima eboe la aʋa ɛɛŋa, pɔ̀ Aya yɛ eboe la emu isanɔ ɔ, lɛ ese linu si yɛ apani eboa la ya ní Yebi ye su. 10Lɛ loso banama gi bɛzɛ Aya Yebi ye aʋa ɛɛŋa ɛ, likla trɔtrɔ ɛlɛ ya lilɛ ní ba ina nɛ mɛ, pɔ̀ banama gi bázɛ Aya aʋa aŋa ɛ, ba bɛbitɛ yɛ ɔsia nɛ, lɛ ese linu si bázɛ Aya yɛ Liboe lɛ gi apani ní Yebi ye su aʋa ɛɛŋa a. 11Likla trɔtrɔ lɛ lɛya: Aya aki blɔ ligbã moblo le, lɛ ligbã́ lɛya lilɛ ní Yebi ye me e. 12Ɔniliɛ awla gi Aya Yebi ye ɔlɛ ɛ, ligbã lilɛ ní yɛ awla, ɔniliɛ awla gi Aya Yebi ye ɔ́ma ɛ, ligbã́ limá ní yɛ awla a.

Ligbã́ Moblo le lilɛ ní Baʋaziŋa ba Awla

13Mɛɛŋwlimi eboa la ya ɛki mlɔ banama gi mlɛzɛ Aya Yebi ye linyi ne aʋa ɛɛŋa ɛ, tɔ mlete si ligbã́ moblo le lilɛ ní mlɔ awla. 14Ɔna ɔlɛ ní blɔ lipo ní Aya aŋu mɛ, lɛ ese linu si kwitrɔ likla lɛ aʋa si, izeenu xe kwiʋi ye kidɔ kakaa ní yɛ kupɛ́pɛɔ onu i. 15Lɛ xe kwite si, izɛɛnu kidɔ kakaa gi kwiʋi ye e, kɔlɔ kwite si, kuzɛɛzɛ blɔ beʋiʋi ʋa ɛdɔni yɛ klɔ.

16Xe wɔmɔ wonemi gi ɛɛbitɛ liboe zimizi gi lítragbani yɛ ɛkpɛ kutse me e, xwa Aya ní yɛ litukpo tɔ ɔki yɛ ligbã́. Lɛ ya litrɛ ɛki banama gi ba eboe zimizi na atrámani kutse e. Pɔ̀ eboe zimizi atɔ alɛ gi izɛɛmani kutse e; maʋísi si xwa Aya ní la litukpo o. 17Eboe nyani nyani kakaa enu kuzimizi, pɔ̀ kuzimizi utɔ kulɛ, gi kútramani kutse e.

18Kwite si, Aya yɛ bebiatɔtɔ baʋíze kuzimizi aʋa kɔ tsinɔ ɔ. Lɛ ese linu si Aya Yebi ye izɛɛkpɛ kuka ɛklani ba lɛ Ozimizi ye ɔ́tratani ba kidɔ nyani nyani tɔtɔ kubitɛ ɛ.

19Kwite si, kunu Aya yɛ banɛ, gi kelea petee kalɛ ní Ozimizi ye kaʋaŋaa ese fɛ ɛ. 20Lɛ kwite si, Aya Yebi ye aba a, lɛ aki blɔ kuboesenu, tɔ kwiate Aya gi yɛ onu anukwarɛɛ ɔtutɔ lɔ ɛ. Kulɛ ní likpɔkpɛkpɛ mɛ ni Aya ɔtutɔ ni likpɔkpɛkpɛ mɛ ni Yebi ye Yesu Kristo. Yɛ onu Aya ɔtutɔ lɛ Yɛ onu ligbã moblo le.

21Mɛ bebi ba, mledi isu aʋa mumɔ ní kubúbitɛ su!

Currently Selected:

1 Yoh 5: avn

Highlight

Compare

Copy