1 Yoh 2

Kristo izɛzi eboe ní blɔ onu

1Mɛɛŋwlimi eboa la ya ɛki mlɔ mɛ bebi ba, tɔ mlakíbitɛ eboe zimizi i, pɔ̀ xe ɔnutɔ abitɛ liboe zimizi i, ɔnɔ ɔlɛ ní blɔ awla gi izɛɛpani ní blɔ onu ki blɔ Ɔka Aya a, gi onu Yesu Kristo e, ɔnɔ gi kesetata káma yɛ su i. 2Lɛ Kristo ɔtutɔ akɔ̀ isu akɔ lɛ gani yɛ aʋa ɛ, Aya akɔ blɔ eboe zimizi kakaa akyɛ ɛ, lɛ aní blɔ tètè pɔ̀ kelea petee ka eboe zimizi na fɛ.

3Xe kwibitɛ ní Aya yɛ ɔsã nɔ aʋa ɛ, kɔ kwika lɛ aʋa si kwite ye e. 4Banama gi bizɛɛpani si bete ye e, pɔ̀ xe baʋíbitɛ ní yɛ ɔsã nɔ aʋa ɛ, benu basia nɛ lɛ anukwarɛ ɔtɔtɔ ɔ́ma ní bamɛ ɛ. 5Pɔ̀ xe kwibitɛ yɛ eboe la aʋa ɛ, kɔ blɔ kunu banama mɛ gi Aya kulɔlɔ kwiflɔ tututu i. Lɛ mɛ kwiaka ní lɛ aʋa si kulɛ ní likpɔkpɛkpɛ mɛ ni Aya. 6Banama gi bizɛɛpani si balɛ ní likpɔkpɛkpɛ mɛ ni Aya ɛ, lilɛ si beze ligbã́ ŋwisi kiliɛ gi Yesu Kristo eze kinɛ ɛ.

Mleze Ligbã́ ni Kuklekle me

7Mɛ benemi lɔlɔ nɛ ba, aní ɔsã vuvu mɛɛŋwlimi iiki mlɔ, pɔ̀ ɔsã koko onu u, gi bɛki mlɔ ɛdɔni okpese kɔ ɔ. Ɔsã koko lo onu liboe lɛ gi mlenu koko o. 8Pɔ̀ fɛ mɛɛŋwlimi ɔsã vuvu iiki mlɔ, gi lɔ mɛ anukwarɛɛ ɛɛŋwi ní Kristo me anì mlɔ mɛ ɛ, lɛ ese linu si litumu ne liiza, lɛ kuklekleo ɔtutɔ lɔ kwikle koko o.

9Banama gi bɛɛpani si balɛ ní kuklekleo me e, pɔ̀ bevu ba benemi ba ɛkpɛ lipo me e, balɛ litumu ne me kɔkpɛ ni abla. 10Banama gi bɛdimɛ ni ba benemi ba ɛ, bá balɛ ní kuklekleo me, lɛ kididɔ kíma ní ba mɛ gi kiaki si biabitɛ eboe zimizi i. 11Pɔ̀ banama gi bevu ba benemi ba ɛkpɛ ni lipo me e, balɛ ní litumu ne me, bɛɛga lɛ mɛ lɛ béte niklɔ gi bɛɛtrɛ ɛ, lɛ ese linu si litumu ne lini ba bimbi ʋe.

12Mɛ bebi ba, mɛɛŋwlimi iiki mlɔ, lɛ ese linu si Aya akɔ mlɔ eboe zimizi na akyɛ mlɔ kɔkpɛ Kristo loso o. 13Baka ba, mɛɛŋwlimi iiki mlɔ, lɛ ese linu si mlete ye gi ɔlɛ dɔni okpese klɔ ɛ. Ogbógboha lɔ, mɛɛŋwlimi iiki mlɔ, lɛ ese linu si mlɛŋa Ozimizi ye aʋa.

14Mɛ bebi ba, mɛɛŋwlimi iiki mlɔ, lɛ ese linu si mlete blɔ Ɔka Aya. Baka ba, mɛɛŋwlimi ki mlɔ, lɛ ese linu si mlete ɔniliɛ klɔ gi ɔlɛ dɔni okpese klɔ ɛ. Ogbógboha lɔ, mɛɛŋwlimi iiki mlɔ, lɛ ese linu si mlalɛ gagla, lɛ Aya yɛ Liboe le likpasi ní mlɔ mɛ, lɛ mlɛŋa ozimizi ye aʋa a.

Mlakídimɛ ni Kelea mɛ

15Mlakídimɛ ni kelea mɛ loo kidɔ kakaa gi kilɛ ní kelea mɛ ɛ. Xe mlɛdimɛ ni kelea mɛ ɛ, kɔlɔ mládimɛ ni blɔ Ɔka Aya. 16Kidɔ kakaa ní kelea mɛ ŋwisi kulekuku nyani nyani, kidiliɛ gi banima bɛmɔ xe bɛɛpɛ ɛ, ani kidɔ kakaa ní kelea mɛ gi kɛ aʋa banima bizɛɛdɔ̀ isu ya ɛ, la litɔtɔ lídɔ Aya kɔ ɔ; la petee ɛdɔ ní kelea mɛ. 17Kelea mɛ ni ka kidɔ kakaa gi banima bizɛpɛ ɛ, biiza; pɔ̀ banama gi bizɛbitɛ ní Aya yɛ kupɛ́pɛɔ aʋa ɛ, biaze tsini kanɔmɛ anɔmɛ.

Kugbagba Ni Kristo Yɛ Ahwafianɛ ma Su

18Mɛ bebi ba, kelea ligù nɛ lina pɔ́! Bɛ si mlɔ si Kristo yɛ ahwafiɔnɛɛ aaba, lɛ abla ɛ, Kristo yɛ ahwafianɛ glegle bɛba kooko, lɛ loso kwite si kelea ligù nɛ lina pɔ́. 19Banɔ ba ya ɛ, béze ní blɔ likpɔkpɛkpɛ lɛ mɛ, lɛ loso bɛyurɔ blɔ, atɛɛsi balɛ ní blɔ likpɔkpɛkpɛ lɛ mɛ ɛ, nya beze ni blo, pɔ̀ bɛsɛ tɔ libasɛ si ba mɛ ɔtɔtɔ ɔ́nyanu blɔ ɔnɛ ɛ.

20Pɔ mlɛzɛ Ɔfuɛfuɛ Dradra lɔ gi Kristo aki mlɔ ɛ, lɛ mlɔ petee mlete anukwarɛɛ ɛ. 21Mɛɛŋwlimi iiki mlɔ, aní sì mléte anukwarɛɛ, boŋu i, mlete ye, lɛ mlete fɛ si asia atɔtɔ aʋídɔ ní anukwarɛɛ mɛ ɛ.

22Kɔ nyaŋwɛ onu ɔsia nɛ ɛ? Yɛ onu ɔniliɛ gi ɛɛpani si aní Yesu onu Kristo ye e. Ɔniliɛ klɔ elu i yɛ onu Kristo yɛ ahwafiɔnɛɛ. Yɛ anada Blɔ Ɔkaɛ Aya ni Yebi ye. 23Lɛ banama gi bɛnada Obi ye e, ba ké bɛnada blɔ Ɔka Aya, banama gi bɛzi Obi ye e, ba ké bɛzi blɔ Ɔka Aya fɛ.

24Mledi lɛ aʋa, tɔ mlabla liboe lɛ gi mlenu idɔni okpese klɔ ní mlɔ ina nɛ mɛ ɛ. Xe mlɛbla liboe lɛ klɔ ɛ, kɔlɔ mlaze ní likpɔkpɛkpɛ mɛ ni Obi ye ani blɔ Ɔka Aya. 25Lɛ lɛ ya Kristo ɔtutɔ aka aplɛ si, yɛ aki blɔ ligbã moblo le e.

26Mɛɛŋwlimi la ya ɛki mlɔ ní banama gi bɛɛpɛ si beemeni mlo su u. 27Pɔ̀ mlɔ kɔ ɛ, Kristo enye yɛ Ɔfuɛfuɛ nɔ abali ní mlɔ aʋa kooko. Kɔkpɛ gi yɛ Ɔfuɛfuɛ nɔ ɔkpasi mlɔ mɛ ɛ, mlázia ɔnɔnɔ si ɔbasɛ mlɔ bidɔ ɔ. Lɛ ese linu si yɛ Ɔfuɛfuɛ nɔ izɛbasɛ mlɔ kidɔ kakaa, lɛ kidiliɛ gi izɛbasɛ ɛ, kinu anukwarɛ aní asia a. Lɛ loso mlabitɛ ní Ɔfuɛfuɛ nɔ bidɔbasɛbasɛ ʋɛ aʋa, tɔ mleze ní likpɔkpɛkpɛ mɛ ni Kristo.

28Lɛ abla ɛ, mɛ bebi ba, mleze ní likpɔkpɛkpɛ mɛ ni yɛ, tɔ xe aaŋwi i, ɔna aaze ní blɔ lipo tɔ likízia si kukpo ní kuye me ní yɛ su ní yɛ liba we le aʋa a. 29Xe mlete si kesetata káma ní Kristo su i, lilɛ si mlete si ɔnɔ kakaa gi izɛɛbitɛ bidɔ gbã ɛ, onu Aya Yebi.

Currently Selected:

1 Yoh 2: avn

Highlight

Compare

Copy