1 Yoh 1

Yesu Kristo onu Liboe lɛ gi lizɛɛki Ligbã

1Kwipani kimlɔ ní Liboe lɛ gi lizɛɛki ligbã a, gi lize dɔni okpese klɔ ke su u. Kwinu le, lɛ kwimɔ lɛ ni blɔ bimbi ʋe e, kwimɔ lɛ, lɛ kwigbɔni lɛ ni blɔ awla la a. 2Gi ligbã nɛ liŋwi i, kwimɔ lɛ, lɛ́ kwipani si mlɔ ní ligbãmoblo le su gi lize ní Kaka Aya klɔ ɛ, xe ebu le abasɛ blɔ ɛ. 3Kidiliɛ gi kwimɔ xe kwinu i, kɛ kwiipani si mlɔ fɛ, tɔ mlakpɛ likpɔ ni blɔ ní likpɔkpɛkpɛ lɛ gi lilɛ ní blɔ nì Kakaa Aya ani Yebi ye Yesu Kristo iwla mɛ ɛ. 4Lɛ kwiiŋwlimi eboa la ya tɔ blɔ isami nɛ iflɔ ɔ.

Kugaga ní Kuklekleo onu

5Abla ɛ, ole ɔlɔ klɔ gi kwinu dɔni Yebi ye klɔ ɔ, xe kwiipani i si mlɔ onu si, Aya onu kuklekle, lɛ litumu itɔtɔ lima ní yɛ mɛ ɛ. 6Xegi kwipani si likpɔkpɛkpɛ lilɛ blɔ ni yɛ kusi i, pɔ̀ xe lipoe lɛ klɔ mɛ ke e, kukpasi ní litumu me, kwiisɛ asia lɛ anukwarɛɛ ɔ́ma ni blɔ mɛ. 7Pɔ̀ xe kwiga ní kuklekle me ŋwisi kiliɛ gi Yɛ ɔlɛ ní kuklekle me kinɛ ɛ, kɔlɔ kulɛ ní likpɔkpɛkpɛ mɛ ni blɔ ahanuglɔ ba lɛ Yebi ye Yesu ika lɛ iaplo eboe zimizi kakaa ní blɔ su u.

8Xe kwipani si kesetata atɔtɔ káma ní blɔ su i, kwimeni isu lɛ anukwarɛɛ ɔ́ma ní blɔ mɛ ɛ. 9Pɔ̀ xe kwidra blɔ ina nɛ mɛ ɛki Aya ɛ, onu anukwarɛ onete, aalɛ ní yɛ kakaplɛa aʋa, aabitɛ liboe gbã, aakɔ blɔ eboe zimizi na kyɛ blɔ, lɛ aaplo eboe zimizi kakaa gi kwibitɛ ní blɔ su u. 10Xe kwisi si eboe zimizi áma blɔ su i, kwibitɛ si Aya odzi ɔsia nɛ, lɛ yɛ liboe le líma ní blɔ ligbã́ nɛ mɛ ɛ.

Currently Selected:

1 Yoh 1: avn

Highlight

Compare

Copy