1 Korinto 11
11
1Mlakpasi mɛ kiboebitɛɛ ŋwisi kiliɛ gi makpasi Kristo yɛ kiboebitɛɛ ɛ.
Kiboebitɛ gbã ɛ ní ɔsɔli klɔ
2Makpɔ mlɔ lɛ ese linu si mlɛzɛɛplɛ aŋu ni mɛ aʋa ní kidɔ kakaa mɛ ni kiliɛ gi mlevu mɛ bidɔ basɛbasɛ ʋɛ ni awla a, kiliɛ gi makɔ ʋɛ aki mlɔ ɛ.
3Abla ɛ, mapɛ si mlete si Kristo yɛ onu onyime kakaa yɛ litukpo le, lɛ ɔdzɛ kakaa yɛ litukpo le linu yenye e, lɛ Aya yɛ onu Kristo yɛ litukpo le e. 4Lɛ loso onyime kakaa gi ɛɛxwa Aya loo ɛɛpani liboe plɛ ɛ, xe akɔ bidɔ ewe yɛ litukpo le e, ɔniliɛ klɔ ɔ́kpɛ kubùbù ní yɛ litukpo le su u.#11:4 Kristo yɛ onu onyime yɛ litukpo le. 5Lɛ ɔdzɛ kakaa gi ɛɛxwa Aya loo ɛɛpani liboe plɛ ɛ, gi ówe bidɔ ni yɛ litukpo le aʋa ɛ, akpɛ yɛ litukpo le kuye,#11:5 Onyime yɛ onu ɔdzɛɛ yɛ litukpo le. lidzegaga ɛ tɔtɔ líma ní yɛ ni ɔdzɛ gi axwã yɛ litukpo le kusi i. 6Lɛ xegi ɔdzɛ ówe bidɔ yɛ litukpo le e, liapɛ si ɔxwa yɛ litukpo le. Lɛ xegi linu kuye ki ɔdzɛ si ɔhà loo ɔxwa yɛ litukpo le e, kɔlɔ lilɛ si owe bidɔ ní yɛ litukpo le. 7Líma si onyime owe bidɔ yɛ litukpo le e, lɛ ese linu si yɛ ɔnɔɛ yɛ onu Aya yɛ kizeze me ni yɛ kusudra a; Pɔ̀ ɔdzɛɛ yɛ izeebu onyimee yɛ kukɔkɔ ɛbasɛ ɛ. 8Lɛ ese linu si onyimee ɔ́dɔ ni ɔdzɛɛ mɛ ɛ, pɔ̀ ɔdzɛ ádɔ ní onyimee me. 9Lɛ, báʋɔ onyimee ɔ́ki ɔdzɛɛ, boŋu i, bɛʋɔ ɔdzɛɛ ki onyimee. 10Ɔkpɛ lɛ ya loso o, lɛ kɔkpɛ Aya yɛ baxwɛdzɛ ba loso e, lilɛ si ɔdzɛɛ ɔbasɛ gyesi ɔtɔ si yalɛ ní kigagla ɛtɔ ese e.
11Ní Ɔkaɛ mɛ xunyɔ ɛ, ɔdzɛɛ ɔ́ma ní yɛ ɔtutɔ yɛ isuwla mɛ ɛ xegi onyime ɔ́ma a, lɛ onyimee fɛ ɔ́ma ní yɛ ɔtutɔ yɛ isuwla mɛ xegi ɔdzɛ ɔ́ma a. 12Lɛ ese linu si kiliɛ gi ɔdzɛɛ ádɔ ni onyimee me e, nite kee ɔdzɛɛ yɛ apɔ onyimee. Pɔ̀ kidɔ kakaa kidɔ ní Aya kɔ ɔ. 13Mlata lɛ edi si kɔɔ, lipɛ si ɔdzɛɛ ɔxwa Aya gi ówe bidɔ ní yɛ litukpo le na a? 14Líŋwi ki mlɔ ní Aya yɛ bidɔbitɛbitɛ ʋɛ kusi si, xegi onyime yɛ litukpo le siya sɛ sidze e, linu kuye ki yɛ na a? 15Pɔ̀ ki ɔdzɛɛ xunyɔ ɛ, binu bidɔ gi biipedi i, xegi yɛ siya sɛ sidze gblamadzaa na a? Sɛ sinu bidɔ kɔkɔ gi bɛki yɛ si tɔ siwe yɛ litukpo le e. 16Pɔ̀ xe ɔnutɔ apɛ si yihe liboe e, maapani ko si ɔkɔ ɔtɔtɔ ɔmáni blɔ awla, lɛ ɔtɔtɔ ɔma ní Aya yɛ isɔli ha lɛ kyɛ mɛ ɛ.
Kutrɔtrɔ ní Ɔkaɛ yɛ ɔkplɔ nɔ su kiŋaŋaɛ su
17Mátrakpɔ̀ mlɔ ní batrɔtrɔ ʋa ya gi bɛtrába mɛ ɛ, lɛ ese linu si mlɔ batsátsa ʋa bizeezizi bidɔ ɛsanɔ si balulɔ bɛ. 18Ní ɔtɔpu kɔ ɛ, menu si kulɛlɛ kuli ní mlɔ kusi xegi mlɛtsa ŋwisi ɔsɔli ha kinɛ ɛ, lɛ maapɛ si mizɛ lɛ aʋa ɛɛŋa a. 19Lilɛ si kulɛlɛ kuze ní mlɔ kusi tɔ biamɔ mlɔ banama aʋa gi Aya yɛ liklatrɔtrɔ lɛ lilɛ ɛ kugyesi. 20Xegi mlɛtsa ŋwisi ɔha kinɛ ɛ, aní Ɔkaɛ yɛ kiŋaŋaɛ mlɛɛzi ŋa a. 21Lɛ ese linu si xe mlɛɛŋa bidɔ mɛ ɛ, mlɔmɛ ɔkakaa izɛɛtrɛ lɛ aʋa ɛɛŋa bidɔ mɛ gi ɔ́trape bagɔgɔ ba a, liki si banɔatɔ bizeeze ni kuʋɛ kɔ batɔ pɔ̀ bɛŋwɛ emu i. 22Kupe kúma ní mlɔ tutɔ awla gi mlaaŋa bidɔ ɔ, xe mlaŋwɛ bidɔ na a? Aloo kipɛ mlɛpɛ si mlɛkpɛ Aya yɛ ɔha lɔ kakpaa tɔ mlɛkpɛ bazianete ba kuyeo na a? Liboe woli maasi mlɔ ɔ? Mikpɔ̀ mlɔ ɔkpɛ ligbã́zezee nɛ ya loo? Litrába lɛ mɛ ɛ!
23Lɛ ese linu si kidiliɛ gi mazɛ adɔ ni Ɔkaɛ klɔ ɛ, kɛ mɛ kyɛ makɔ aki mlɔ: si Ɔkaɛ Yesu i, ní elesi ala klɔ mɛ gi bebu ye ekɔ ɛ, akɔ lìklã nɛ, 24lɛ gi edo Aya ɖasee ní lɛ aʋa ɛ, ayaʋi lɛ lɛ apani si, “Lɛ ya linu mɛ kisugyaɛ, gi bɛkɔ ɛki mlɔ ɔ. Mlabitɛ lɛ tɔ mlakɔ aplɛ aŋu ní mɛ aʋa.” 25Niteme kee, agi bɛŋa bidɔ mɛ pɔ ɛ, akɔ kaŋwɛpliʋia lɛ apani si, “Kaŋwɛpliʋia lia kenu kunyanya vuvu yɔ ní mɛ ika lɛ mɛ; xegi mlɛɛŋwɛ ka onu i, atɔ mlakɔ aplɛ aŋu ní mɛ aʋa.” 26Lɛ ese linu si lipoe kakaa gi mlɛɛta aklã na ya a, xe mlɛŋwɛ ní kaŋwɛpliʋia lia ya onu i, mlɛɛklá Ɔkaɛ yɛ kutseo zɛkɔna ni lipoe lɛ gi aadzi ba ɛ.
27Lɛ loso e, xe ɔnutɔ atà Ɔkaɛ yɛ lìklã nɛ loo aŋwɛ dɔni yɛ kaŋwɛpliʋia onu ní kude gi kúgyɔ onu i, aŋa lipɔ gi abitɛ liboe zimizi ní Ɔkaɛ yɛ kisugyaɛ ni yɛ ika lɛ su u. 28Kɔlɔ lilɛ si ɔnɔ ɔtapo yɛ isu ya odi xe ableke aatà lìklã nɛ ɛ, xe ableke aaŋwɛ ní kaŋwɛpliʋia lia onu u. 29Lɛ xe ɔnutɔ ónu Ɔkaɛ yɛ kisugyaɛ ese e, xe ata lìklã nɛ ɛ, xe aŋwɛ ní kaŋwɛpliʋia onu i, aamani litsixwaxwa ní yɛ isu ya aʋa a. 30Lɛ klɔ ʋa loso mlɔmɛ banɔ glegle mlebotso lɛ mlɛdɔ bànya ʋa a, xe banɔ glegle fɛ betse e. 31Pɔ̀ xegi kwitapo isu ya edi kpɛ ɔtɔ ɛ, kutrába Aya yɛ litsixwaxwa nɛ ese e. 32Xegi Ɔkaɛ axwa litsi ni blɔ ɛ, kihe eehe blo, atɔ bakíbu blo lipɔ kɔpɔni kelea mɛ ɛ.
33Lɛ loso mɛ benemi ba a, xe mlɛtsa si mlɛɛŋa Ɔkaɛ yɛ kiŋaŋaɛ ɛ, mlepe mlɔ ahanuglɔ ba. 34Lɛ xegi kuʋɛ kwiku ɔnutɔ ɛ, ɔŋa bidɔ ní yɛ kepea mɛ, atɔ xegi mlɛtsa si mlɛŋa bidɔ mɛ ɛ, likímani Ɔkaɛ yɛ litsixwaxwa ni mlɔ aʋa a.
Lɛ xegi maba ɛ, maaki mlɔ batrɔtrɔ gɔgɔ ʋa a.
Currently Selected:
1 Korinto 11: avn
Highlight
Share
Copy
Want to have your highlights saved across all your devices? Sign up or sign in
© Ghana Institute of Linguistics, Literacy and Bible Translation, 2017 In cooperation with Wycliffe Bible Translators, Inc
