1 Korinto 10
10
Paulo Agba ba ní Kububitɛɔ su
1Mápɛ si mleze ní litumu me ní liboe lɛ ya su u, mɛ benemi ba, blɔ bakatsitsi ba petee beze ní liplɛ lɛ gi lɛ lizɛgbani ba ese e; lɛ ba pɔ́ bɛtsa axu la a. 2Lɛ ní aplɛ la ni axu la mɛ ɛ, Aya akpɛ kuni aki ba petee ŋwisi banɔ gi balɛ ni Mose kude e. 3Ba pɔ́ bɛŋa Ɔfuɛfuɛ nɔ mɛ bidɔŋaŋa lide tile; 4lɛ bɛŋwɛ Ɔfuɛfuɛ nɔ mɛ kuni yo; lɛ ese linu si bɛŋwɛ kuni yo ɛdɔni Ɔfuɛfuɛ nɔ mɛ liklakpɔ ɛlɛ gi lizeni ba kude me e, lɛ liklakpɔ ɛlɛ klɔ linu Kristo. 5Gi liba lɛ mɛ nite kyɛ ɛ, Aya ɔ́mɔ isami ní bamɛ beglegle ba, ba bekpo ʋa bɛwɔ ní ɔyaya klɔ.
6Abla ɛ, eboa la ya ɛɛba la mɛ ŋwisi liŋwitsɛ ki blɔ, tɔ kukíki si blɔ ina nɛ izeni eboe zimizi na kude kiliɛ gi bɛbitɛ ɛ. 7Mlakíze babubitɛ ŋwisi kiliɛ gi bamɛ batɔ beze kinɛ ɛ. Ŋwisi kiliɛ gi bɛŋwlimi si i: “Banima beze kesea lɛ bɛŋa bidɔ ɔ, xe bɛŋwɛ bidɔ ɔ, lɛ bɛyɔ ɛ, xe bekpese abúvu na kuyo e.” 8Líma si kuwa kihasi ye ŋwisi kiliɛ gi bamɛ batɔ bɛwa kɛ kinɛ ɛ, xe ní liwe tile me e, bamɛ akpe avitaʋa ni tiata betse e. 9Líma si kufeke Ɔkaɛ odi i, kiliɛ gi batɔ bɛbitɛ ɛ, xe bagblaga ʋa benemi ba a, xe betse e. 10Lɛ líma si kutɛ̀, kiliɛ gi bamɛ batɔ bɛbitɛ ɛ, xe Aya yɛ kutseo ɔxwɛdzɛɛ akyrɔ ba a.
11Eboa la ya ɛba ba aʋa ŋwisi liŋwitsɛ kinɛ ɛ, lɛ bɛŋwlimi la ɛplɛ ɛki blɔ ŋwisi kugbagba kinɛ ɛ, blɔ banama gi blɔ kulɛ ligba nɛ ɛ, xe kelea ka ligù nɛ liana a. 12Lɛ loso xegi wogyo odi si wɔlɛ gagla ɛ, di le aʋa si wukígleʋe e. 13Kufekedi utɔtɔ kúba mlɔ aʋa gi kuʋíba banɔdzedze ba aʋa eʋídi. Pɔ̀ Aya onu anukwarɛ onete e, gi izɛɛbitɛ ɛ ní liboe lɛ gi apani i aʋa. Lɛ ɔ́traki si biafeke mlo odi sani kiliɛ gi mlɔatani kutu u. Pɔ̀ xegi beefeke mlo edi i, yɛ aaki mlɔ kude kutɔ onu gi mlɔatani kɔ onu kulɛ ɛ.
14Lɛ loso mɛ baʋia veve ba a, mlebú isu ya ní kubusumu yo me. 15Mɛɛpani iiki mlɔ banɔ gi bete liboe e; mlegyo eboa la gi mɛɛpani iiki mlɔ edi. 16Kepliʋia gi ka loso kuzedo Aya ɖase e, xe ka su axwɛ kuzɛɛwa ní ɔkplɔ nɔ su i, Ɔkaɛ yɛ ika lɛ su axwɛ kuzɛɛwa. Lɛ àklã na gi la kuzɛɛyaʋi i, aní Kristo yɛ kisugyaɛ kɛ kapɛatɔ kunu na a? 17Lɛ ese linu si dɔni liklã̀ tile lɛ klɔ mɛ ɛ, blɔ banama gi kwisrɛ ɛ, kunu kisugya tile lɛ ese linu si kuzɛɛlɛ liklã̀ tile lɛ klɔ ʋa.
18Bù Israelbanɛ ma su di; banɔaklɔ gi bizɛɛŋa bidɔ bɛklɔ gi bɛkɔ ní ɔdɔpɔʋisuʋɔ lɔ aʋa ɛ, bali likpɔ gani kidiliɛ klɔ gi bɛki Aya mɛ ɛ lɛ benu tole ni Aya a. 19Kɔlɔ ɛ kipani mlɛɛpani si, kidɔ gi bɛki babu ʋa ɛ, bínu kiditɔ na a? Aloo babu ʋa benu kiditɔ na a? 20Owo! Pɔ̀ kidɔ gi babubitɛ ʋa bizɛɛkɔ ɛ, bizɛɛkɔ ʋɛ ɛki ifuɛfuɛ zimizi ne, lɛ aní kí Aya a, lɛ loso mápɛ si mleze tole ni ifuɛfuɛ zimizi i. 21Mlatrátani Ɔkaɛ yɛ kepliʋia kuŋwɛ ɛ, xe lɛ kede e, mlaŋwɛ bidɔ ní ifuɛfuɛ zimizi ne kepliʋia kyɛ mɛ ɛ, mlatrátani bidɔ kuŋa ní Ɔkaɛ yɛ ɔkplɔ nɔ su u, xe mlazɛɛŋa bidɔ ni ifuɛfuɛ zimizi ne kyɛ ɛ. 22Kikpɛ kwikpɛ Aya kimbi kyikyi na a? Lɛ kibu kwibù si kuli gagla sani yɛ na a?
Ɔʋaziŋaɛ yɛ ɔwlamɔmɔ nɔ
23Mlɛzɛpani si “Kudeo onu kuli ki kidɔ kakaa” pɔ̀ mɛ Paulo mɛɛpani si aní kidɔ kakaa kizebu libi i. Mlɛzɛɛpani si “Bebu kudeo onu ɛki kidɔ kakaa, pɔ̀ mɛ Paulo mɛɛpani si aní kidɔ kakaa kizɛɛki kupɔnɔ ɔ.” 24Ɔnɔnɔ ɔkizeedi yɛ ɔtutɔ yɛ kupɛ̀pɛɔ ko, pɔ̀ ɔpɛ banɔ dzedze ba bapɛ́pɛ ʋa.
25Mlaŋa kidɔ kakaa gi bɛɛda ní kigyɛ kedzia mɛ ɛ, tɔ mlakízeʋi beʋiʋi i, gi biakpɛ mlɔ begyodi ʋa kunugu u. 26Lɛ ese linu si, “Kesea ni kidɔ kakaa ní ka mɛ ɛ, kinu Ɔkaɛ yɛ kinɛ.”
27Xegi ɔnɔ gi ɔ́ziŋa axwa wɔ si gaŋa bidɔ ni yɛ ɛ, xe wɔdimɛ si wɔatrɛ ɛ, ŋa kidiliɛ gi bɛkɔ edu ní wɔ ketu ya ɛ, wukíʋi liboeboe gi liakpɛ wɔ ɔna nɔ kunugu u. 28Pɔ̀ xe ɔnutɔ asi wɔ sì i, “Kiŋaŋaɛ liɛ ya bɛkɔ kɛ ɛki babu ʋa ɛ,” kɔlɔ wukíŋa kiŋaŋaɛ liɛ klɔ ɔ, kɔkpɛ ɔniliɛ klɔ gi asi wɔ liboe le e, 29aní wɔ ɔna nɔ loso o, pɔ̀ ɔnɔ ʋlaɛ yɛ ɔna nɔ loso o. Lɛ ese linu si ege loso ɔnɔ dzedze yɛ ɔna nɔ azɛɛxwa litsi ni mɛ ɔwlamɔmɔ nɔ ɛ? 30Xegi medo Aya ɖase aki mɛ kiŋaŋaɛ ɛ, ege loso ɔnutɔ aabu me lipɔ ɔkpɛ kiŋaŋaɛ gi kɛ loso medo Aya ɖase e?
31Lɛ loso e, kidɔ kakaa gi wɔŋa loo wɔŋwɛ ɛ, loo kidɔ kakaa gi wɔbitɛ ɛ, bitɛ la pɔ́ kí Aya yɛ kusudra a. 32Wukíki si ɔnɔnɔ otu kikliʋi xegi Yuda ɔnɛ loo Hela ɔnɛ aloo Aya yɛ ɔsɔli ha lɔ ɔ. 33Ŋwisi kiliɛ gi mekeni edi si miku ɔnɔ kakaa aŋu ní kude kakaa onu u. Lɛ ese linu si maʋípɛ mɛ ɔtutɔ mɛ linɛ ɛ, pɔ̀ mɛɛpɛ ligbã ɛki ɔnɔ kakaa atɔ biamɔ kubúbú u.
Currently Selected:
1 Korinto 10: avn
Highlight
Share
Copy
Want to have your highlights saved across all your devices? Sign up or sign in
© Ghana Institute of Linguistics, Literacy and Bible Translation, 2017 In cooperation with Wycliffe Bible Translators, Inc
