1 Korinto 12
12
Ɔfuɛfuɛ dradra nɔ lɔ bidɔkɔkɔ ʋɛ
1Abla ní Ɔfuɛfuɛ dradra nɔ lɔ bidɔ kɔkɔ ʋɛ su i, benemi ba, mápɛ si mleze ni litumu me ní lɛ su u. 2Mlete si gi mleze ní kububitɛɔ mɛ ɛ, gani bedeatɔ onu i, bɛŋa mlɔ aʋa lɛ bɛgbani mlɔ ɛlila ɛtsini babua ʋa gi baʋígu kunugu kɔ ɛ. 3Lɛ loso mapɛ si misi mlɔ si ɔnutɔ gi ɛɛpani ní Aya yɛ Ɔfuɛfuɛ nɔ kigagla ese e, ɔ́tratani kupani si “Yesu onu obusionɛ”, lɛ ɔnɔnɔ ɔ́tratani kupani si “Yesu yɛ onu Ɔkaɛ”, xe aní Aya yɛ Ɔfuɛfuɛ nɔ ɛɛgbani yɛ ɛ.
4Bidɔkɔkɔ ede ede na alɛ, pɔ̀ Ɔfuɛfuɛ toleɔ lɔ klɔ ko ɛki bɛ petee e. 5Axwɛwawa la bede ede ede alɛ, pɔ̀ Ɔka tole ko banima beesumu u. 6Kitèbitɛ ede ede na alɛ, pɔ̀ Aya tole ko izɛki kitèbitɛ ki ɔnɔ kakaa ki lixwɛ nɛ gi ɛɛwa a.
7Abla kí ɔnɔ kakaa ɛ, Ɔfuɛfuɛ nɔ lɔ kibabaɛ kibasɛ isu ya ní kude kutɔ aʋa kí ɔnɔ kakaa yɛ kupɛ̀pɛ. 8Ɔfuɛfuɛ nɔ izɛɛki ɔnutɔ kuboesenu, lɛ ki ɔnɔ dzedze dɔni Ɔfuɛfuɛ tole lɔ klɔ kee me e, izɛki kuboete. 9Ɔfuɛfuɛ nɔ izɛki ɔnɔ tole e, kuziŋa lɛ ki ɔnɔ dzedze e, izɛki kigagla tɔ aakɔ̀ yɔni banima. 10Ɔfuɛfuɛ nɔ izɛɛki si ɔnutɔ aabitɛ enugutseboe; lɛ ki ɔnɔ dzedze e, izɛki si odo eboe ɔplɛ; lɛ ki ɔnɔ dzedze e, tɔ ɔtani lidzegaga kukpɛ ní ifuɛfuɛ nɛ kusi i. Ki ɔnutɔ ɛ, ɛki kupani ni siya ede ede me, lɛ ki ɔnɔ dzedze dzɛ ɛ, ɛki siya ede ede na ese kububu yo. 11La ya petee enu Ɔfuɛfuɛ toleɔ lɔ klɔ lɔ axwɛwawa, lɛ izɛɛki bidɔ kiliɛ gi ɛɛpɛ ɛ.
Kisugya tile gi kilɛ ní kupɛ̀ kupɛ̀ mɛ
12Kisugyaɛ kinu kidɔ tile ko, pɔ̀ kilɛ̀ ní kupɛ̀ kupɛ̀ mɛ, lɛ gi kɛ kupɛɔ kwisrɛ kyɛ ɛ, kisugya tile ko kinu. Lɛ nite Kristo kyɛ ɔlɛ. 13Lɛ ese linu si Ɔfuɛfuɛ nɔ ɛkpɛ kuni iiki blɔ pɔ́ si kudzi kisugya tile, xegi Yuda ɔnɛ loo Hela ɔnɛ, banɔdzidzi loo banɔ gi bali ní ba tutɔ ba isuwla mɛ, blɔ petee Ɔfuɛfuɛ toleɔ lɔ klɔ ko Aya aki blɔ.
14Kisugyaɛ ɔtutɔ lɔ ɛ, ani kapɛ tiele ko kinu, pɔ̀ kɛ kupɛɔ kwisrɛ ɛ. 15Xe ɔkli lɔ aapani si, “Agi ménu ɔwla loso e, ménu kisugyaɛ kapɛa tɔtɔ ɛ,” litráki si ɔ́traze kisugyaɛ kapɛatɔ tɔɔ. 16Lɛ xegi kutu yɔ kwiapani si, “Agi ménu kimbi ye loso e, ménu kisugyaɛ kapɛa tɔtɔ ɛ,” lítraki si kútraze kisugyaɛ kapɛatɔtɔ tɔɔ. 17Lɛ xe kisugyaɛ petee kinu kimbi i, kitɛ kiabitɛ xe kianu i? Lɛ xe kisugyaɛ petee kinu kutu yɔ tete e, kitɛ kiabitɛ xe kianu ɔfu nɔ ɛ? 18Pɔ̀ ní anukwarɛɛ mɛ ɛ, Aya akpɛ kisugyaɛ kapɛ kakaa ní kisugyaɛ mɛ kiliɛ gi apɛ́ si kize e. 19Xegi si kisugyaɛ petee kize kapɛ tiele ko e, kítraze kisugya tɔɔ ɔ. 20Kiliɛ gi lilɛ ɛ, kisugyaɛ kupɛɔ kwisrɛ, pɔ̀ kisugya tile ko kinu u.
21Lɛ loso e, kimbi ye kítratani ɔwla lɔ kusɛ si, “Mázia wɔ ɔ!” Lɛ litukpo le lítratani kuklikpɔɔ kusɛ si “mázia mlɔ ɔ!” 22Boŋu i, kisugyaɛ kupɛ uliɔ su gi banima bɛmɔ si kigagla kíma ɛ, kɔ kwisazia. 23Lɛ kisugyaɛ kùpɛ uliɔ gi kuzɛɛŋwi ŋwisi kubùbù kúma ní kɔ su i, kɔsu kuzɛɛkpɛ kubùbù i sanɔ. Lɛ kupɛ uliɔ gi kúpɛ si bamɔ ɛ, kɔ kuzekpo xe kɔsu kuzɛɛkpɛ kubùbù yo o. 24Kùpɛ uliɔ gi kwipedi i, kúzia si kukyì awla ní kɔ su u. Aya ɔtutɔ akpɛ kùpɛ uliɔ klɔ ʋa likpɔ lɛ akpɛ kubùbù ʋidi ní kɔ su kiliɛ gi liziã ɛ. 25Lɛ loso e, kulɛlɛ kúma ní kisugyaɛ su, boŋu i, lilɛ si kisugyaɛ kapɛ kakaa kakɔ litɔ lɛ mɛ aki kapɛ kakaa. 26Xe kapɛ tiele kɛmɔ kini i, kùpɛ gɔgɔ fɛ kwiamɔ kinie ni ka. lɛ xe bɛkpɔ̀ kapɛ tiele e, kùpɛ gɔgɔɔ fɛ kwiamɔ isami nɛ ni ka.
27Abla ɛ, mlɔ mlenu Kristo yɛ kisugyaɛ, lɛ mlɔmɛ kakaa onu yɛ kapɛatɔ. 28Lɛ ní ɔsɔli ha lɔ mɛ ɛ, Aya edu ní ɔtɔpu kɔ ɛ, banɔkpɛkpɛ ba, ní ɔʋla kɔ ɛ, beboedoplɛ ba, ní ɔtanɛ kɔ ɛ, badɔbasɛ ba; lɛ banama gi bizɛɛbitɛ enugutseboe la ɛ, ní ba kede e, banama gi bɛki kigaglaɛ si bayɔni banyanya ba a, lɛ banama gi bɛɛpɔni banima a, lɛ banama gi bizedi axwɛ na aʋa ɛ, lɛ banɔatɔ gi bizɛpani siya ede ede na a. 29Banima petee benu banɔkpɛkpɛ ba na a? Banima pɔ́ benu beboedoplɛ ba na a? Banima pɔ́ benu badɔbasɛ ba na a? Banima pɔ́ bɛki kigaglaɛ si babitɛ enugutseboe la na a? 30Bamɛ ɔkakaa awla kigaglaɛ kilɛ si bayɔni banyanya ba na a? Aloo tɔ bapani siya ede ede na na a? Lɛ ba pɔ́ bizebu siya sɛ ese na a? 31Lɛ loso e, mlapɛ ní mlɔ ina nɛ petee bidɔkɔkɔɛ ʋɛ gi bimu isanɔ ɛ.
Lɛ abla ɛ, matrábasɛ mlɔ kude gbã liɔ gi kwisapɛ ɛ.
Currently Selected:
1 Korinto 12: avn
Highlight
Share
Copy
Want to have your highlights saved across all your devices? Sign up or sign in
© Ghana Institute of Linguistics, Literacy and Bible Translation, 2017 In cooperation with Wycliffe Bible Translators, Inc
