Bruă Mơnuă 28

Pôl Pơ Plao Ia Maltơ

1Giơ̆ng kơ gơmơi klaih laih, hlăk anŭn gơmơi thâo plao ia anŭn arăng pơanăn ñu Maltơ. 2Ƀing ană plei plao ia anŭn ngă hiam biă mă kơ gơmơi. Gơñu pơtŏ apui laih anŭn tŭ jum abih bang ƀing gơmơi, yua kơ adai čơdơ̆ng hơjan laih anŭn rơŏt. 3Pôl duñ sa čơnaŏ djuh glŏm amăng apui, hmâo sa drơi ala tơbăk tơbiă mơ̆ng djuh yua kơ pơ-iă laih anŭn ñu păl ƀơi tơngan Pôl. 4Tơ ƀing ană plei plao ia anŭn ƀuh ala păl ƀơi tơngan Pôl, gơñu pơ laĭ tơdruă: “Sĭt biă mă pô anai jing sa čô pơdjai mơnuih. Wơ̆t dah ñu klaih laih mơ̆ng ia rơsĭ tŭ mơ̆n, tơlơi tơpă ƀu brơi ñu dŏ hơdip ôh.” 5Samơ̆ Pôl añah hĭ ala anŭn amăng apui, laih anŭn ƀu hmâo tơlơi ruă hơgĕt ôh. 6Ƀing anŭn pơmĭn dah drơi jan Pôl či brah đĭ ƀôdah rơbuh djai mơtam. Samơ̆ tơdơi gơñu dŏ krăp lăng sui ƀiă, gơñu ƀu ƀuh tơlơi hơgĕt phara truh kơ gơ̆ ôh, gơñu pơplih glaĭ hĭ tơlơi pơmĭn hăng laĭ gơ̆ jing sa čô yang.

7Jĕ pơ anih anŭn hmâo lŏn lơ̆m kơ khua plao ia anŭn anăn ñu Publius. Ñu jak hăng jum gơmơi hăng tơlơi hơ̆k mơak biă mă amăng klâo hrơi. 8Hlăk anŭn, ama Publius duăm laih anŭn ruă kian juă glai drah dŏ đih ƀơi sưng. Pôl nao ngui ñu, iâu laĭ ah tơngan ƀơi gơ̆, hăng pơsuaih brơi. 9Tơ bruă anai truh, abih bang ƀing ruă pơkŏn amăng plao ia anŭn rai pơ Pôl, laih anŭn dưi suaih soh sel. 10Gơñu brơi lu mơnơ̆ng kơ gơmơi, laih anŭn tơ gơmơi đĭ kompăn đuaĭ nao, gơñu brơi kơ gơmơi djŏp mơta mơnơ̆ng gơmơi kiăng.

Mơ̆ng Maltơ Truh Pơ Plei Rôm

11Klâo blan tơdơi, gơmơi đĭ sa boh kompăn hmâo anăn Diôskur, kiăng laĭ: “Yang ƀă kơmar” mơ̆ng Aleksandri truh, jing kompăn hmâo kơđap tơdang bơyan puih ƀơi plao ia anai. 12Ƀing gơmơi truh pơ plei Sirakus laih anŭn dŏ glaĭ pơ anŭn klâo hrơi. 13Mơ̆ng anih anŭn gơmơi hluai tui hang ia rơsĭ nao truh pơ plei Rêgium. Hrơi tơdơi angĭn thut mơ̆ng dơnŭng, hnŭn yơh hrơi tal dua ƀing gơmơi truh pơ plei Pusôl. 14Pơ anŭn ƀing gơmơi bưp ƀing adơi ayŏng, laih anŭn gơñu jak ƀing gơmơi dŏ glaĭ hăng gơñu tơjuh hrơi. Hnŭn yơh gơmơi hmâo truh pơ plei Rôm. 15Ƀing adơi ayŏng pơ plei Rôm hmư̆ hing ƀing gơmơi rai, hnŭn yơh ƀing gơñu nao truh pơ Sang Sĭ Mia Apius laih anŭn anih arăng pia Klâo Sang Jưh kiăng kơ čơkă ƀing gơmơi. Tơ Pôl ƀuh ƀing gơñu, Pôl bơni hơơč kơ Ơi Adai laih anŭn hmâo tơlơi pơđĭ pran jua.

Pơ Plei Rôm

16Tơ ƀing gơmơi mŭt amăng plei Rôm, arăng brơi Pôl dưi dŏ hơjăn hrŏm hăng sa čô tơhan gak wai ñu.

17Rơgao kơ klâo hrơi, Pôl jak iâu ƀing khua ană Yuđa rai. Tơdang gơñu pơƀŭt glaĭ, Pôl pơhiăp hăng gơñu: “Ơ ƀing adơi ayŏng, wơ̆t dah kâo ƀu ngă tơlơi hơgĕt pơkơdơ̆ng glaĭ hăng ană plei pla ƀôdah hăng tơlơi phiăn ƀing ơi adon ƀing ta, samơ̆ arăng mă kâo pơ plei Yêrusalem hăng jao hĭ kâo amăng tơngan ƀing Rôm. 18Giơ̆ng tơña kơsem kâo, ƀing Rôm kiăng phư hĭ kâo yua kơ ƀu hmâo tơlơi hơgĕt ôh lăp kơ pơdjai kâo. 19#Bruă 25:11.Samơ̆ ƀing Yuđa găng glaĭ ƀu tŭ ôh tơlơi arăng phư kâo, hnŭn yơh kâo khŏm iâu đĭ Sêsar. Ƀu djơ̆ kâo hmâo tơlơi pơmĭn phong, pơkơdơ̆ng glaĭ hăng kơnŭng djuai kâo ôh. 20Klih yua kơ tơlơi anŭn yơh, kâo hmâo rơkâo kiăng bưp laih anŭn pơhiăp hrŏm hăng ƀing gih, yua kơ tơlơi čang rơmang kơ ƀing Israel anŭn yơh arăng akă kâo hăng hrĕ čuăk anai.”

21Gơñu laĭ glaĭ: “Gơmơi ƀu hmâo mă hră arăng mơit mơ̆ng čar Yuđa ră ruai kơ tơlơi ih ôh. Laih anŭn ăt kŏn hmâo sa čô amăng ƀing adơi ayŏng rai pơ anai laĭ pơthâo ƀôdah pơhiăp tơlơi sat kơ ih ôh. 22Samơ̆ gơmơi kiăng hmư̆ mơ̆ng ih hơgĕt tơlơi ih pơmĭn; yua kơ gơmơi thâo tar ƀar anih arăng pơhiăp pơkơdơ̆ng glaĭ hăng tơlơi đaŏ anai.”

23Tơ truh hrơi gơñu pơkă, lu mơnuih rai pơ ñu amăng sang gơ̆ dŏ. Mơ̆ng mơguah truh pơ klam, Pôl ngă gơ̆ng jơlan hăng pơblang brơi gơñu kơ dêh čar pơtao Ơi Adai laih anŭn pơđur pơtrŭt gơñu đaŏ kơ Yêsu tui hăng tơlơi čih amăng tơlơi juăt Môis laih anŭn amăng hră ƀing pô laĭ lui hlâo. 24Đơđa mơnuih đaŏ kơ tơlơi Pôl pơhiăp, đơđa ƀu đaŏ ôh. 25Hnŭn yơh, gơñu ƀu tŭ ư tơdruă ôh laih anŭn gơñu glaĭ, yua kơ anŭn mơ̆n Pôl pơhiăp boh pơhiăp anai: “Yang Bơngăt Hiam hmâo laĭ djơ̆ biă mă, hlăk ñu yua pô laĭ lui hlâo Êsai pơhiăp hăng ơi adon ƀing gih tui anai:

26 # Êsai 6:9,10; Êsê 12:2. ‘Nao bĕ pơ ƀing ană plei pla anai hăng laĭ:

“Sĭt biă mă ƀing gih či hmư̆, samơ̆ ƀu thâo hluh ôh;

Laih anŭn sĭt biă mă ƀing gih či lăng, samơ̆ ƀu thâo ƀuh ôh.

27Yua kơ pran jua ƀing ană plei pla anai jing kơnăm mơmŏt hĭ;

Gơñu hơkăt hĭ amăng tơngia gơñu,

Gơñu pĭt hĭ mơta gơñu,

Hwĭ dah mơta gơñu dưi ƀuh,

Tơngia gơñu dưi hmư̆,

Tơlơi pơmĭn gơñu dưi thâo hluh,

Laih anŭn gơñu či wơ̆t glaĭ pơ Kâo,

Kiăng kơ Kâo pơsuaih gơñu.”’

28Tui anŭn, brơi ƀing gih thâo tơlơi pơklaih Ơi Adai arăng hmâo hyu ră ruai laih kơ ƀing djuai tuai. Gơñu či hmư̆.”#28:28 Đơđa hră Ơi Adai Pơhiăp so đưm thim jơlan 29: Giơ̆ng Pôl pơhiăp tơlơi anŭn, ƀing Yuđa tơbiă, gơñu pơrơjah tơdruă gơñu kơtang biă mă.

30Pôl dŏ amăng sang ñu apah anŭn krĕp dua thŭn. Ñu jum abih bang mơnuih nao pơ ñu, 31pơtô kơ dêh čar Pơtao Ơi Adai laih anŭn pơhrăm arăng kơ tơlơi Khua Yang Yêsu Krist hăng tơlơi rơngai, ƀu hmâo hlơi khă găn ôh.

Currently Selected:

Bruă Mơnuă 28: JRA2016

Highlight

Copy