Tơlơi Bơrơđah 20

Rơnŭk Sa Rơbâo Thŭn

1Giơ̆ng anŭn kâo ƀuh sa čô ling jang trŭn mơ̆ng adai, tơngan ñu djă kơmla kăl hlŭng dlam laih anŭn sa ară hrĕ čuăk prŏng. 2#Čơd 3:1.Ñu mă ana grai, jing ala đưm adih, jing yang sat, laih anŭn Satan, laih anŭn akă hĭ ñu amăng sa rơbâo thŭn, 3ling jang glŏm hĭ ñu amăng hlŭng dlam, kơđơ̆l laih anŭn kơđŏm hĭ bah amăng anŭn, kiăng kơ ñu ƀu hyu plư ƀing djuai mơnuih ôh, tơl abih hĭ sa rơbâo thŭn anŭn. Giơ̆ng kơ anŭn Ơi Adai či phư ñu dơ̆ng kơnơ̆ng ƀiă hrơi.

4 # Đaniel 7:9,22. Kâo ƀuh lu boh gre pơtao, laih anŭn arăng brơi kơ ƀing dŏ ber ƀơi anŭn tơlơi dưi phat kơđi. Kâo ăt ƀuh mơ̆n bơngăt ƀing mơnuih arăng hmâo čơ̆ng laih tơkuai gơñu yua kơ ƀing gơñu ngă gơ̆ng jơlan kơ Yêsu, yua kơ boh pơhiăp Ơi Adai. Ƀing gơñu ƀu kơkuh pơpŭ kơ hlô glai ƀôdah kơ rup ñu, laih anŭn kŏn tŭ lơi tơlơi čih mrô ñu ƀơi athơi ƀôdah ƀơi tơngan ƀing gơñu. Gơñu hơdip glaĭ laih anŭn wai lăng hrŏm hơbĭt hăng Krist amăng sa rơbâo thŭn. 5(Ƀing mơnuih djai dŏ glaĭ ƀu hơdip glaĭ ôh tơl sa rơbâo thŭn anŭn abih hĭ.) Anai jing tơlơi hơdip glaĭ tal sa. 6Mơyun hiam yơh laih anŭn rơgoh hiam yơh kơ ƀing dưi tŭ mă hrŏm hơbĭt tơlơi hơdip glaĭ tal blŭng hlâo! Tơlơi djai tal dua ƀu hmâo tơlơi dưi hăng ƀing gơñu ôh, samơ̆ ƀing gơñu či jing ƀing khua ngă yang kơ Ơi Adai laih anŭn kơ Krist, laih anŭn gơñu či wai lăng hrŏm hơbĭt hăng Krist amăng sa rơbâo thŭn.

Satan Thuơ

7Giơ̆ng sa rơbâo thŭn abih hĭ, Ơi Adai či phư hĭ Satan mơ̆ng anih krư̆ ñu, 8#Êsê 7:2; Êsê 38:2,9,15.laih anŭn ñu či tơbiă nao kiăng plư ƀing djuai mơnuih dŏ djŏp djang lŏn tơnah, jing phung Gôk laih anŭn phung Magôk, kiăng pơƀŭt glaĭ ƀing gơñu kơ tơlơi pơblah. Mrô arăng yap phung anŭn jing lu kar hăng čuah pơ hang ia rơsĭ. 9Phung gơñu ling nao tar ƀar lŏn tơnah, laih anŭn wang jum dar kơđông phung rơgoh hiam laih anŭn plei arăng khăp hơeng; samơ̆ apui mơ̆ng adai trŭn rai laih anŭn čuh pơrai hĭ ƀing gơñu, 10laih anŭn Ơi Adai glŏm hĭ yang sat, pô plư ƀing gơ̆, amăng dơnao apui boh pơtâo kơsŭm, amăng anŭn hmâo laih hô glai laih anŭn pô laĭ lui hlâo ƀlor. Gơñu či tŭ tơlơi ruă tơnap hrơi hăng mlam truh pơ nanao hlŏng lar yơh.

Tơlơi Phat Kơđi Hnal Tuč

11 # Đaniel 7:9,10. Giơ̆ng kơ tơlơi anŭn kâo ƀuh sa boh gre pơtao kŏ prŏng laih anŭn Pô dŏ ber ƀơi anŭn. Lŏn tơnah laih anŭn adai đuaĭ hĭ mơ̆ng anăp ƀô̆ mơta Ñu, laih anŭn ƀu hmâo dơ̆ng tah anih kơ ƀing gơñu. 12Kâo ƀuh ƀing djai, ƀing prŏng wơ̆t ƀing anĕt, leng kơ dŏ ƀơi anăp gre pơtao; laih anŭn lu sŏp hră hmâo pŏk hĭ. Sa sŏp hră pơkŏn jing sŏp hră tơlơi hơdip ăt pŏk mơ̆n. Laih anŭn arăng phat kơđi ƀing djai tui hăng bruă ƀing gơñu hmâo ngă laih, kar hăng hmâo čih laih amăng khul sŏp hră anŭn. 13Ia rơsĭ ba glaĭ ƀing djai dŏ amăng ñu; Tơlơi Djai laih anŭn Plei Ƀing Djai ba glaĭ ƀing djai hmâo dŏ laih amăng ƀing gơñu; laih anŭn rĭm mơnuih tŭ tơlơi phat kơđi tui hăng bruă ƀing gơñu hmâo ngă laih. 14Laih anŭn Ơi Adai glŏm hĭ Tơlơi Djai laih anŭn Plei Ƀing Djai amăng dơnao apui. Dơnao apui anŭn jing tơlơi djai tal dua. 15Hlơi pô anăn ñu ƀu hmâo čih ôh amăng sŏp hră tơlơi hơdip, Ơi Adai glŏm hĭ ñu amăng dơnao apui.

Currently Selected:

Tơlơi Bơrơđah 20: JRA2016

Highlight

Copy

Compare